YOSUA 7 - KITAB NU TUMPU ALLA LELE MA'IMAI'

I Akhan nombaumo dosa'

¹ Tumpu nompalentahmo aha mian nu Israel da iwi-iwi' na anu kiijo' i kota Yerikho, tionyo ahi' ohopu'imo iwi-iwi', maumo ola sa'angu' madi' timbali o ala. Panyo palentah aijo' madi' tinulutan nu aha. Samian na mo'ane sanggonyo i Akhan madi'mo nompajuli palentah aijo', sahingga Tumpu talalomo hondo nontambuha'i aha mian nu Israel. (Tuumanyo i Akhan sanggonyo i Karmi ka' utusnyo tu'a sanggonyo i Zabdi minsoop tompukan i Zerah tulunan mae nu bansa Yehuda.)

² Tempo'nyo aitu i Yosua nompokaumo tinopia-piangkuka na mian lengkat mae i Yerikho namba i Ai, sa'angu' na kota sasu kabete'an Betel, koko Bet-Awen. Mian haha aijo' binee'anmo palentah da mamba mompalesa pa' mosia na balu-balu'nyo na da'erah aijo'. Salatan aha noko pojalanmo palentah aijo',

³ aha ninsusule'mo mae ka' nompoto'imo hi Yosua. Aha notatae, “Madi' pilenje kita mamba iwi-iwi' mompahampateiakon Ai. Ola kila-kila ohua' kabai totolu' na madala na mian na osai. Boli iwi-iwi' na suludadu osaimo mamba mahampate, kalana kota aijo' ise'.”

⁴ Jadi anu mamba montumbuhi kota aijo' ola totolu' na madala na mian, panyo madi' pinoko ala nu aha, aha ola nalai mae.

⁵ Mian nu Ai haha aijo' mololoi' mae aha lengkat pe'e i sabatan daka' nu kota Ai tinoka-toka i da'erah tampat pongkekean balang anu i uno nu tano', lantas nompateimo aha tolumpulu' ka' anom na mian i tengke nu bungkutnyo. Sahingga aha mian nu Israel tinolosok'mo na kinyonyoa ka' nabuhukmo.

⁶ I Yosua ka' to pola-polaya' nu aha mian Israel sinusa'mo hondo na kinyonyoa sahingga binea-beakmo nu aha na baju' nu aha ka' sinansinaa tinoka sampe nalom na aha tinolodadupu i ahop nu Peti' Palajanjian nu Tumpu ka' nongkakambuhakonmo abu' i ubak nu aha salaku tanda sinusa'mo hondo na kinyonyoa.

⁷ I Yosua notataemo hi Tumpu, “O Tumpu Allah Tumpungku! Te mosia na tanga'an nu belento nomboa mae kami tinoka mae i santoa nu Yordan aiya? Pa' obee'mo na kami hi aha mian nu Amori? Da kami matemo? Sahanyo kami jinojoongmo kiijo' mae, i santoa nu Yordan!

⁸ O Tumpu! Sampobali' nohungku'imo ka' ninsusule'mo mae na aha mian nu Israel. Uuka aiya apaa na anu tionyo ahi' ku taloakon!

⁹ Mian nu Kana'an ka' iwi-iwi' mian sangga'at i da'erah aiya mohongomo apaa na anu jinadimo aijo'. Aha montumbuhimo mae ka' mompateimo kami iwi-iwi'! Lantas apaamo na anu obau nu belento Tumpu da kita sabole-bole ahi' o angga'i?”

¹⁰ Tinaaman nu Tumpu na i Yosua, “Pobulamo! Madi' ko kaliangannyo na beleyum tinolodadupu susumo atina'!

¹¹ Mian nu Israel nombaumo dosa'. Pinalentang-Kumo na aha da montuluti totu-totu'u Palajanjian-Ku hi aha, panyo aha madi' nompajuli! To bala-balang anu tionyo ahi' ohopu'i ingalamo nu aha. Tinomangmo nu aha ka' pinosulukmo nu aha i uno nu to bala-balang nu aha da madi' osumbu-sumbu'.

¹² Mokonyo aijo' aha madi' noko ala nongewa ka' nongahopi sampobali'. Aku madi'mo monsangalui belemiu, de balang haha aijo' anu madi' timbali o ala ma'isa pe'e ohopu'i.

¹³ Uuka aiya pobulamo Yosua! Posusi' na aha mian nu Israel ka' pokau mae na aha sabole-bole mamba mae hi beleng-Ku. Palentah na aha da sabole-bole toka mae dodop kalana Aku Tumpu Allah nu aha Israel mompoto'imo sumo uuka hi aha: 'O, to mia-mian nu Israel, to bala-balang anu pinalentahkon-Kumo hi belemiu da ohopu'i sambagian daagi' itina' hi belemiu. De ma'isa pe'e o alin nu belemiu na balang haha aijo', belemiu madi' moko ala mongahopi mompahampateakon sampobali'!'

¹⁴ Kalana aijo', Yosua, poto'i hi aha dodop subu-subu aha opaha pokilawamo toto sa'angu' na tulunan nu bansa. De Ku tiju'mo sa'angu' na tulunan nu bansa iwi-iwi' na tompukan nu tulunan aijo' tionyo ahi' toka mae toto sa'angu' na tompukannyo. Ka' de Ku tiju'mo sa'angu' na tompukan, iwi-iwi' na auwan i tompukan aijo' tionyo ahi' toka mae toto sa'angu' na auwan. Lapas aijo' de Ku tiju'mo sa'angu' na auwan toto samian anu i auwan aijo' tionyo ahi' mamba mae toto samian.

¹⁵ Lantas mian anu tinuminjo ka' sinumbu'mo nompo'una' to bala-balang anu madi' timbali o ala aijo' ia tionyo ahi' opapui hingga-hinggat tiba aha sangauwan tiba iwi-iwi' na anu nu aha; kalana iamo na anu madi' nompajuli palajanjian ka' nombaumo anu ma'idek hondo i uno nu aha mian nu Israel.”

¹⁶ Dodododopnyo subu-subu hondo, i Yosua nompokaumo aha mian nu Israel toka mae toto sa'angu' na tulunan nu bansa. Jadi kinona hi tulunan nu bansa Yehuda.

¹⁷ Lantas i Yosua nompokaumo tulunan nu bansa Yehuda mamba mae toto sa'angu' na tompuk ka' kinona hi tompukan i Zerah. Lapas aijo' tompukan i Zerah pinokaumo mamba mae toto sa'angu' na auwan, ka' kinona hi auwan i Zabdi.

¹⁸ Lapas aijo' i Yosua nompokaumo auwan i Zabdi toka mae toto samian; jadi kinona hi Akhan, anak i Karmi, makumpu i Zabdi.

¹⁹ I Yosua notataemo hi Akhan, “Anaku, pangakumo ka' poto'imo totu-totu'u aiya i ahop nu Tumpu, Tumpu Allah nu Israel, apaa na anu binaumo nu beleyum. Poto'imo mae hi belengku boli oposuluk.”

²⁰ “Totu'u,” na koonyo i Akhan, “Aku nombaumo dosa' hi Tumpu, Tumpu Allah nu Israel. Aiya na anu binaungkumo:

²¹ To bala-balang anu ihumpakto nahampate, sala'sa'angu' tinoangku jubah anu ma'ima' hondo, anu kina'ut nu aha Babilonia, ka' suele salaka ku gantang ohua' na kilogram ka' sangkolong na mosoni' mintonga' na kilogram ko labinyo sangkiding. Kinamiluankumo hondo na balang haha aijo', sahingga ingalangkumo ka' pinosulukumo i uno nu tano' kiijo' i kemah-ku; salaka kaiyong i aluknyo hondo-hondo.”

²² Lantas i Yosua nonsaimo mian lia-lia' namba i kemah i Akhan. Totu-totu'u balang haha aijo' anu madi' timbali o ala, iwi-iwi' daagi' ikiijo', pinosuluk i uno nu tano' ka' salakanyo kaiyong mae i aluknyo hondo-hondo.

²³ Ingala nu aha na balang haha aijo' ka' binoanyomo hi Yosua ka' hi mian nu Israel iwi-iwi'. Lantas balang haha aijo' pinotimpasmo i ahop nu Tumpu.

²⁴ Lapas aijo' i Yosua tiba iwi-iwi' aha mian nu Israel nohakopmo i Akhan, ka' nomboa i Bangka'nyo Kasusa'an tiba iwi-iwi' na to anak-anaknyo, potu'onnyo sapi', keledai, domba, kemah ka' iwi-iwi' na anunyo tiba salaka, jubah ka' mosoni' anu tinomangnyo.

²⁵ Lantas notataemo na i Yosua hi Akhan, “Kadaka' beleyum nompotokamo mae kasusa'an hi kita? Uuka aiya Tumpu mompotokamo mae kasusa'an hi beleyum!” Sahingga i Akhan tiba aha sangauwan pinahambunu'akonmo nu batu sampe i nate, nu aha iwi-iwi' mian nu Israel. Iwi-iwi' na halata'nyo ka' to bala-balang anu tinomangnyo pinaha papuanmo ingko-ingkot.

²⁶ Lapas aijo' tinabuhanmo nu aha nu batu jonjoo' na tampat aijo' sampe sinaa aiya daagi' ko anu ikiijo'. Mokonyo aijo' tampat kiijo' daagi' osanggohi Bangka'nyo nu Kasusa'an. Sahingga Tumpu madi'mo notambuha'.