YOSUA 6 - KITAB NU TUMPU ALLA LELE MA'IMAI'

Yerikho pinatundu'mo

¹ I kota Yerikho iwi-iwi' na sabatan daka' nu kota jinagaanmo totu-totu'u ka' tinumbanmo hoso-hoson da aha mian nu Israel madi' moko ala minsoop. Madi' timbali ko samian pe'e na anu opobee' minsoop kabai mosabat i kota aijo'.

² Tumpu notataemo hi Yosua, “Uuka aiya Ku bee'mo hi beleyum na Yerikho tiba tomundo'nyo ka' suludadunyo iwi-iwi' anu singkaap baani aijo'.

³ Beleyum ka' suludadu nu beleyum tionyo ahi' mojiji ka' lumajang montikubi kota aijo' sansinaa obau minsan, ka' obau anon sinaa.

⁴ Aha popitu' na mian, toto samian momboa tolompet, tionyo ahi' lumajang mamba momona lapas nutuntunije nu Peti' Palajanjian. I sinaa anu ko ipitunnyo beleyum ka' suludadu nu beleyum tionyo ahi' montikubimo kota aijo' pimpitun na sunsum ka' to ima-imam mompuhimo tolompetnyo.

⁵ Lapas aijo' to ima-imam mompuhimo tolompetnyo ka' opomantanmo na mompuhi. Salatan beleyum mohongomo onyi'nyo anu pinomantanmo aijo' iwi-iwi' na suludadu aijo' lewa'mo molo'ais daka-daka', sahingga pagan mesen haha aijo' i kota; mohobo'mo. Lantas belemiu iwi-iwi' tionyo ahi' mompinsoopimo kota aijo'.”

⁶ Sahingga i lagamo i Yosua na to ima-imam, ka' notatae, “Hangkatmo na Peti' Palajanjian aijo'; aha popitu' na mian atina' hi belemiu tionyo ahi' lumajang mamba momona momboa tolompet.”

⁷ Lantas pinokaumo i Yosua na suludadunyo mojiji ka' lumajang montikubi kota aijo', panyo anu ko toongan bau pahampate na lumajang mamba momona, lapas aijo' nutuntunije nu Peti' Palajanjian nu Tumpu.

^8-9 Susumo anu pinalentahkonmo i Yosua nambamo momona na anu ko toongon bau mahampate, lapas aijo' to ima-imamje anu mompuhi tolompet, lapas aijo' mule' to ima-imamje anu molemban Peti' Palajanjian, ka' lapas aijo' atina'je na anu ko toongon bau pahampate montuntuni aitu mae i mihi. Hau-hauinyo aha lumajang, saja'mo o puhi na tolompet.

¹⁰ Iwi-iwi' na suludadu pinalentahmo da bolimo mojiji ka' bolimo montaloakon apa-apaa de ma'isa nubee'i i Yosua tanda.

¹¹ Sumo aijo' na i Yosua nompalentahmo suludadunyo nomboa Peti' Palajanjian montikubi minsan kota aijo', lapas aijo' minsusule'mo i kemah ka' male'mo ikiijo' mae.

^12-13 Dodododopnyo subu-subu hondo, i Yosua nobulamo lantas ko pinduannyomo na to ima-imam ka' suludadu nojiji ka' ilumajang montikubi kota aijo' susumo anu binaumo momona; anu namba momonanyo aha anu ko toongon bau pahampate lapas aijo' aha popitu' na imam anu mompuhi tolompet, lapas aijo' atina'je mae na to ima-imam anu molemban Peti' Palajanjian ka' anu imihinyo mae atina'je ka' anu ko toongon bau pahampate. Hau-haunyo aijo' tolompet saja'mo o puhi.

¹⁴ I sinaa ko ohua'nyo aijo' aha montikubi kota ola minsan lapas aijo' minsusule'mo i kemah, sumo aijo' na nubau nu aha sansinaa toka sansinaa kopinnyo anon sinaa.

¹⁵ I sinaa ko ipitunnyomo aha nobulamo daagi' subu hondo batu nu sinaa sala'je bete' mae lantas nojiji mule' montikubi kota Yerikho aijo' susumo anu saja'mo binau. Ola i sinaa anu ko ipitunnyomo aijo' yo aha nontikubimo kota aijo' pinopimpitunmo na sinunsum.

¹⁶ Anu ko pimpitunnyomo, salatan pinuhanmo nu to ima-imam na tolompet binee'anmo i Yosua tanda na suludadu iwi-iwi' da molo'aismo daka-daka'. I Yosua notataemo, “Binee'mo nu Tumpu na kota aiya hi belemiu!

¹⁷ Iwi-iwi' na kota ka' isinyo mule' iwi-iwi' tionyo ahi' ohopu'i ingko-ingkot salaku bau palasombahan hi Tumpu. Ola i Rahab, boune anu lewa' masala' aijo' tiba to utu-utusnyo ka' aha sambonua na opotumuu' kalana ia nontulungimo anu sinainto nondoyoni.

¹⁸ Madi' timbali mongala maumo pa' apaa panyo iwi-iwi' aijo' tionyo ahi' ohopu'i. De belemiu mongala saba' kemah nu mian Israel nutokaimo nu balaa' kapatean.

¹⁹ Iwi-iwi' na pakakas, salaka, mosoni', tambaga ka' besak aijo' bau bagi nu Tumpu ka' opo'una' i tampat pompo'una'an halata' nu Tumpu.”

²⁰ Lantas pinuhanmo nu to ima-imam na tolompetnyo. Ka' salatan mian nu Israel haha aijo' nohongomo onyi' nu tolompet aijo' aha lewa'mo nolo'ais daka-daka', lantas pagan mesen nu kota Yerikho nohobo-hobo'mo. Iwi-iwi' na suludadu nu aha Israel balomo nompoliba'i ka' nompinsoopi kota aijo' ka' nahampate.

²¹ Iwi-iwi' na anu i kota aijo', mian anu motu'amo kabai mian anu daagi' anak, boune kabai mo'ane pinahantabasakonmo nu bajak sahingga natemo. Iwi-iwi' na potu'on sapi', domba ka' suele keledai pinateanmo.

²² Aha ua'aha na anu namba nondoyoni pinoto'imo i Yosua, “Lako' i laigan nu boune anu lewa' masala' aijo', ka' boamo mae na ia, sabatakon mae hingga-hinggat tiba to utu-utusnyo tiba aha motoanak sambonua susumo anu jinanji'mo nu belemiu hi aha.”

²³ Sahingga ua'aha anu namba nondoyoni aijo' nambamo ka' nosabatakonmo mae i Rahab hingga-hinggat tiba tuuma ka' tinanyo, ka' to utu-utusnyo, ka' to julu-julunyo sangga'at. Iwi-iwi' na aha sambonua i Rahab aijo' tiba to posa-posaihonnyo sinabatakonmo ka' binoamo mae i tampat anu madi' ko anu mompoposia koko kemah nu aha mian nu Israel.

²⁴ Lapas aijo' suludadu nu aha mian Israel nompapuimo kota aijo' iwi-iwi', tiba iwi-iwi' na anu i unonyo, panyo to paka-pakakas mosoni', salaka, tambaga ka' besak na madi' pinapuan. Pakakas haha aijo' ingala nu aha ka' binoa i tampat pompo'una'an halata' nu Tumpu.

²⁵ Panyo i Rahab boune anu lewa' masala' aijo' tiba to julu-julu'nyo iwi-iwi' pinotumuu' i Yosua, kalana nontulungimo ua'aha na anu namba nondoyoni Yerikho pinokau i Yosua. (Sampe uuka aiya i Rahab daagi' kiijo' i Israel.)

²⁶ Tempo'nyo aijo' i Yosua nompoto'imo palentah madi' mompobee' sumo uuka, “Maumo pa' ihe na ko kahanda' po'ule' mombau kota aiya, mohumpak kutuk nu Tumpu. Ihe na mombau mesennyo bau pompotinjoan kota aiya anaknyo tumpe sila kamo; ka' ihe na mombau sabatannyo anu to daka-daka', anaknyo tampalui' silakamo.”

²⁷ Tumpu saja' mombaya'i i Yosua, ka' sanggo i Yosua tinalasanggomo i songko-songko na lipu' aijo'.