YOSUA 4 - KITAB NU TUMPU ALLA LELE MA'IMAI'

Sampulu' ka' ohua' na batu pinotinjo bau pontandai

¹ Salatan iwi-iwi' na bansa aijo' kiijo'mo i santoanyo, Tumpu notataemo hi Yosua.

² “Pile'i aha sampulu' ka' ohua' na mian, toto sa'angu' na tulunan nu bansa samian na o ala.

³ Pokau na aha da mongala sampulu' ka' ohua' na batu aijo' i totonga'nyo nu Kaunyo Yordan, i tampat kinatinjoan nu to ima-imam. Pokau na aha da monsimbu mae batu haha aijo' toka-toka i tampat pinombauan nu belemiu kemah de malomo.”

⁴ Sahingga ilagamo i Yosua na aha anu sampulu' ka' ohua' na mian anu pinile'anmo aijo',

⁵ lantas pinoto'inyomo, “Lako' i totonga' nu Kaunyo nu Yordan, i ahop nu Peti Palajanjian nu Tumpu Allah nu belemiu. Toto samian tionyo ahi' mohangkat sa'angu' na batu ikiijo' – konjoo'nyo sampulu' ka' ohua' na batu sumo konjoo'nyo nu to tulu-tulunan nu bansa Israel.

⁶ Batu haha aijo' salaku bau pompo'ingat bansa aiya mongkona apaa na anu binaumo nu Tumpu. Saidi' mae imihinyo de to ana-anak nu belemiu mompokilawa apaa na alati'nyo nu batu haha aiya hi belemiu,

⁷ tionyo ahi' opoto'i nu belemiu hi aha taalu' Kaunyo nu Yordan madi'mo no'ili tempo'nyo Peti' Palajanjian nu Tumpu tinaapakonmo i kaunyo aijo'. Batu haha aijo' bau tanda da saja' monginau' na bansa Israel apaa na anu jinadimo i aiya.”

⁸ Aha sampulu' ka' ohua' na mian haha aijo' nombaumo apaa na anu pinalentahkonmo i Yosua. Susumo apaa na anu pinotiju'mo nu Tumpu hi Yosua aha nongalamo sampulu' ka' ohua' na batu i totonga' nu Kaunyo Yordan – konjoo'nyo sumo konjoo' nu to tulu-tulunan nu bansa Israel – lantas binoamo i tampat pinombauan nu aha kemah.

⁹ I totonga' nu Yordan aijo' suele i Yosua nompotambunmo sampulu' ka' ohua' na batu i tampat kinatinjoan nu to ima-imam anu nolemban Peti' Palajanjian aijo'. (Batu haha aijo' daagi' sabole-bole ikiijo' sampe tempo' uuka aiya.)

¹⁰ To ima-imam haha aijo' tataap satinjonyo i totonga' nu Yordan sampe mian haha aijo' noko baumo iwi-iwi' anu pinalentahkonmo nu Tumpu hi aha susumo anu pinoto'i-Nyomo hi Yosua. Aijo' pokakana sumo anu pinotiju'mo i Musa hi Yosua. Lantas sampamo na aha mian nu Israel notaap i Kaunyo nu Yordan.

¹¹ Salatan iwi-iwi' tinokamo i santoanyo to ima-imam anu nolemban Peti' Palajanjian aijo' i lumajangmo namba momona lantas aha imihi-mihije.

¹² Susumo anu pinalentahkonmo i Musa, to sulu-suludadu nu tulunan bansa Ruben, Gad ka' sambahagian na tulunan nu bansa Manasye nambamo momona notaap kaunyo.

¹³ Iwi-iwi' 40.000 na to momo'ane anu ko toongon bau pahampate ka' hau-haunyomo mosadia mahampate. I ahop nu Tumpu, aha notaapmo namba i hatanyo koko Yerikho.

¹⁴ Sinaa aijo' Tumpu nombaumo hahan anu opalias sahingga bansa Israel nongadatimo i Yosua salaku mian daka'. Sidu-sidutu' i uno nu kantumuu'annyo, aha mongadatimo ia susumo aha nongadatimo i Musa.

¹⁵ Lapas aijo' Tumpu nompokaumo i Yosua,

¹⁶ da mompalentahmo to ima-imam anu nolemban Peti' Palajanjian aijo' da opala'imo na Yordan.

¹⁷ Binaumo i Yosua apaa na anu pinalentahkonmo nu Tumpu hi ia.

¹⁸ Salatan imam haha aijo' tinokamo aijo' mae i sonibi nu kaunyo, uee nu kaunyo aijo' po'ule'mo no'ili ka' dinaka'mo susumo uuka mae momonanyo.

¹⁹ Mian nu Israel tinokamo i santoanyo nu Yordan i tanggan sampulu' bitu'on anu momonanyo ka' aha binakemahmo i Gilgal i sasu kabete'an Yerikho.

²⁰ Tinoka ikiijo' i Yosua nontambunmo sampulu' ka' ohua' na batu anu ingala i totonga' nu Yordan.

²¹ Lantas i Yosua notataemo hi aha mian nu Israel, “Saidi' mae imihinyo de to ana-anak nu belemiu mompokilawa alati'nyo nu batu haha aiya,

²² poto'iakon hi aha taalu' aha mian nu Israel notaapmo i kaunyo nu Yordan aiya anu notismo.

²³ Sisikakon hi aha taalu' Tumpu Allah nu belemiu nompo'otimo uee nu Kaunyo Yordan aijo' da belemiu iwi-iwi' toka i santoanyo susumo ia nompo'otimo Ambai Gelagah da kinajalanan mami,

²⁴ da iwi-iwi' na mian anu i dunia aiya monsumbu' palias na kodaka'nyo na kuasanyo nu Tumpu. Ka' tiba jalan anu sumo aijo' belemiu mongadatimo Tumpu, Tumpu Allah nu belemiu sampe toka sidu-sidutu'.”