YOSUA 20 - KITAB NU TUMPU ALLA LELE MA'IMAI'

Kota-kota bau palaihan

¹ Lapas aijo' Tumpu nompokaumo i Yosua,

² poto'i sumo uuka hi aha mian nu Israel, “Aku nompalentahmo i Musa da ia mompoto'i hi belemiu mongkona kota-kota bau palaihan, aijo'mo kota-kota bau palaihan nu mian da boli opatei. Uuka aiya pile'imo na kota haha aijo'.

³ Mian anu mompatei mian sangga'at panyo madi' tinotonggolakon, timbali malai mamba i kota aijo', da boli opatei nu mian anu ko kahanda' mombalosakon hi ia.

⁴ Ia timbali malai i sala'sa'angu' na kota haha aijo', ka' mamba i tampat nu mian kopian i sabatan daka' nu kota aijo', lantas monsisik hondo-hondo hi to pola-polaya' ikiijo' apaa na anu jinadimo. Aha to pola-polaya' ikiijo' mompobee'je ia minsoop i kota aijo' ka' mombee'i ia tampat bau kajojoongannyo.

⁵ De mian anu kahanda' mombalosakon aijo' mololoi' mae ia toka-toka mokiijo', mian anu jojoong i kota aijo' madi' timbali mombee' hi mian aijo'. Aha tionyo ahi' monjagai ia, kalana ia nompatei mian madi' tinotonggolakon, ka' misa' kalana mongka'ideki.

⁶ Ia timbali jojoong i kota aijo' sampe palakalanyo lapasmo na oputusi i ahop nu mian da'isan, ka' sampe mian anu montoongi Imam Daka' tempo'nyo aijo' silakamo. Lapas aijo' atina'je ka' mian aijo' timbalimo minsusule' i kampung kajojoongannyo anu pinolengkatannyo mae ia nalai mae.”

⁷ Sahingga i da'erah sasu kinsoban Kaunyo nu Yordan aha mian nu Israel nontantukanmo kota-kota haha aijo' salaku kota bau palaihan: Kedes i bungkutnyo nu Naftali i da'erah Galilea, Sikhem i bungkutnyo nu Efraim, ka' Hebron i bungkutnyo nu Yehuda.

⁸ I da'erah Kaunyo nu Yordan sasu kabete'an aita' i hatanyo nu bungkutnyo anu i da'erah padang bone' sasu kabete'an Yerikho aha nontantukanmo kota-kota haha aijo' salaku kota bau palaihan: Kota Bezer anu minsoop da'erah Ruben kota Ramot i da'erah Gilead anu minsoop da'erah Gad, ka' kota Golan i da'erah Basan anu minsoop da'erah Manasye.

⁹ Aijo'mo na kota iwi-iwi' anu bau palaihan anu tinantukan kona hi iwi-iwi' mian nu Israel ka' kona' hi mian anu lengkat mae i salipu'an anu jinojoongmo hi aha. Batu-batu mian anu nompateimo mian sangga'at, panyo madi' tinotonggolakon timbali ojagai da boli opatei i kota haha aijo' de o loloi' nu mian anu ko kahanda' mombalosakon hi ia, ia madi' timbali opatei de ma'isa pe'e o ulus na palakalanyo i ahop nu mian da'isan.