YOSUA 17 - KITAB NU TUMPU ALLA LELE MA'IMAI'

Tulunan nu bansa Manasye i sasu kinsoban Kaunyo nu Yordan

¹ Sambahagian na da'erah sasu kinsoban Kaunyo nu Yordan binee'mo na sangga'at hi to utu-utus lee' mae i Manasye, anak tumpe i Yusuf. I Makhir tuuma i Gilead, aijo'mo na anak tumpe i Manasye. Kalana ia mian anu toho'mo nahampate, sahingga da'erah Gilead tiba Basan anu i sasu kabete'an Kaunyo nu Yordan binee'mo hi ia.

² Da'erah sasu kinsoban Kaunyo nu Yordan binee'mo hi to utu-utusnyo sangga'at lee' mae i Manasye aijo'mo to utu-utusnyo: i Abiezer, i Helek, i Asriel, i Sekhem, i Hefer ka' i Semida; iwi-iwi' aijo' lee' mo'ane i Manasye, anak i i Yusuf. Aha to tu'a-tu'anyo nu auwan.

³ I Zelafehad, anak i Hefer, makumpu i Gilead (i Gileaf anak i Makhir, makumpu i Manasye), madi' ko anak mo'ane, ola anak boune aijo'mo: I Makhla, i Noa, i Hogla, i Milka, i Tirza.

⁴ Aha namba hi imam Eleazar, i Yosua anak i Nun, tiba to pola-polaya', ka' notatae, “Koonyo nu Tumpu hi Musa, kami suele tionyo ahi' mohumpak tano' susumo to utu-utus mami anu to momo'ane.” Kalana aijo' susumo anu ponalentahkonmo nu Tumpu to ana-anak boune i Zelafehad aijo' obee'i ahi tano suele susumo to utu-utus nu aha anu to momo'ane.

^5-6 Jadi, misa' ola lee' to momo'ane i Manasye na mohumpak pombahagian tano', panyo suele lee'nyo anu to bouboune. Mokonyo aijo' kadaka' tulunan nu bansa Manasye binee'an sampulu' na bahagian, misa' ola tano' Gilead tiba Basan anu i sasu kabete'an Kaunyo nu Yordan. Tano' Gilead binee'mo hi lee' i Manasye sangga'at.

⁷ Potempasan nu da'erah tulunan i Manasye otampu'uni lengkat mae hi Asyer nokiijo' hi Mikhmetat i sasu kabete'an da'erah nu Sikhem. Lengkat ikiijo, potempasan aijo' mokaiyongmo i sasu selatan toka-toka i da'erah nu aha mian nu En-Tapuah.

⁸ Da'erah Tapuah anu nu aha tulunan nu bansa Manasye, panyo kota Tapuah anu i sasu potempasan, anu nu aha lee' mae i Efraim.

⁹ Ka' mule' potempasan nu da'erah i Manasye aijo' nokaiyongmo toka-toka i panga' nu Kaunyo Kana. Kota-kota anu i sasu selatan panga'nyo nu kaunyo aijo' anu nu aha Efraim, maumo i uno nu da'erah i Manasye. Potempasan nu da'erah i Manasye aijo' suele montulu jalan sasu utara i panga'nyo nu kaunyo aijo' lantas puusnyomo i Ambai anu Totonga'nyo.

¹⁰ Sumo aijo' na i Efraim jinojoongmo i sasu selatan, ka' i Manasye na i sasu utara, ka' Ambai anu Totonga'nyo atina'mo na potempasan nu aha i sasu kinsoban. I bahagian kinsoban sasu ambai da'erah tulunan nu bansa Manasye aijo' motempas tiba da'erah i Asyer, ka' i sasu kabete'an bahagian ambai, motempas tiba da'erah i Isakhar.

¹¹ I uno nu da'erah i Isakhar tiba i Asyer aijo' daagi' ko tano' anu i Manasye, aijo'mo: Bet-Sean tiba Yibleam tiba kampu-kampungnyo anu ikiijo'. Ka' suele: Dor (kota anu i sonibi nu ambai), En-Dor, Taanakh, Megido, tiba kampu-kampungnyo anu ikiijo'.

¹² Panyo tulunan nu bansa Manasye madi' noko ala nolaa' mian anu jojoong i kota haha aijo'; mokonyo aijo' aha mian nu Kana'an sinajojoongnyomo ikiijo'.

¹³ Ka' mule' salatan aha mian nu Israel nompaka panjoo'mo aha madi'mo nolaa' mian nu Kana'an iwi-iwi'; ola ahi' lewa'mo opakisa nu aha mokalaja na mian haha aijo' mombau kapalaluan nu aha.

Tulunan nu bansa Efraim tiba tulunan nu bansa Manasye, anu i sasu kinsoban momoita da otuangi na tano'

¹⁴ Lee' i Yusuf notataemo hi Yosua, “Kadaka' kami ola binee'an sambahagian na tano' padahan kami da'isan hondo, kalana binalakatanmo nu Tumpu na kami?”

¹⁵ Tinaaman i Yosua, “Kalana belemiu talalo da'isan ka' da'erah bungkutnyo nu Efraim madi' ewa bau kajojoongan miu, lako'mo i da'erah nu aha mian Feris tiba Refaim. Pombaumo tampat-tampat anu sala'je obau, i alas nu aha haha aijo'.”

¹⁶ Tinaaman nu lee' i Yusuf haha aijo', “Da'erah anu i bungkutnyo aijo' madi' ewa na bau kajojoongan mami sadang aha bansa Kana'an anu jojoong i hatanyo ko kareta besak bau pahampate, aha anu jojoong i Bet-Sean tiba i kampu-kampung anu i da'erah nyo ka' suele aha anu jojoong i Bangka'nyo Yizreel.”

¹⁷ Sahingga i Yosua notataemo hi tulunan nu bansa Efraim tiba Manasye anu i sasu kinsoban aijo', “Memang totu'u, belemiu da'isan hondo ka' nahosonmo, ka' nukonamo na obee'i molabi sa'angu' na bagian na tano'.

¹⁸ Alamo na da'erah anu i bungkutnyo, kalana maumo da'erah aijo' daagi' alas timbali okalaja nu belemiu na da'erah aijo', ka' o alamo iwi-iwi'. Ka' mian nu Kana'an haha aijo' opoko alamo o laa' miu, maumo aha mahoson ka' ko kareta besak anu opake mahampate.”