YOSUA 16 - KITAB NU TUMPU ALLA LELE MA'IMAI'

Da'erah anu binee'mo bau bagi i Efraim ka' hi Manasye sasu Kinsoban

¹ Potempasan nu tano' anu binee'mo bau bagi nu lee' i Yusuf, otampu'uni lengkat mae i Kaunyo nu Yordan koko Yerikho sasu kabete'an anu ko matanyo nu uee kiijo' i Yerikho toka-toka mokiijo' i bone' anu ewa na tampatnyo sumomo padang. Lengkat mae i Yerikho, potempasannyo aijo' mokiita'mo toka-toka i Betel i da'erah nu bungkutnyo.

² Lengkat mae i Betel, potempasannyo aijo' mokiijo'mo mompanjolongi Lus, motulu i Atarot, aijo'mo tampat kajojoongan nu aha mian Arki.

³ Lengkat mae ikiijo' potempasannyo aijo' mokiijo'mo mompanjolongi kinsoban i da'erah nu aha mian nu Yaflet toka-toka mokiijo' i Bet-Horon-sasu Poiliannyo, lau-laus mokiijo' i Gezer, lantas puusnyomo i Ambai anu Totonga'nyo.

⁴ Aijo'mo na da'erah anu binee'mo hi tulunan nu bansa Manasye tiba i Efraim, lee' mae i Yusuf da tano' timbalimo aha na tumpunyo.

Tulunan nu bansa Efraim

⁵ Ka' mule' aiya na potempasan nu tano' anu binee'mo hi to utu-utus tulunan nu bansa Efraim. Sasu kabete'an potempasan nu tano' nu aha otampu'uni lengkat mae i Atarot-Adar toka-toka i Bet-Horon-Sasu Matanyo.

⁶ Lantas lau-laus mokiijo' mompanjolongi Ambai anu Totonga'nyo. Mikhmetat i sasu utaranyo. O sasu kabete'annyo, potempasan aijo' noselemo mongahopi sasu Taanat-Silo, lantas motulu i sasu kabete'an mompanjolongi Yanoah.

⁷ Lengkat ikiijo' potempasannyo aijo' mokaiyongmo i Atarot ka' Naharot, lantas lau-lausmo montuusakon Yerikho ka' puusnyo toka-toka i Kaunyo nu Yordan.

⁸ I sasu kinsoban, potempasan nu aha Efraim aijo' otampu'uni lengkat mae i Tapuah toka-toka i panga'nyo nu Kaunyo Kana, lantas puusnyomo i Ambai anu Totonga'nyo. Aijo'mo na tano' anu binee'mo hi to utu-utus tulunan nu bansa Efraim, da tano' aijo' timbalimo aha na tumpunyo.

⁹ Tibamo to pia-piangkuka na kota toto ise-ise' tiba kampung anu ikiijo'; i da'erah Manasye.

¹⁰ Panyo tulunan nu bansa Efraim madi' nolaa' mian nu Kana'an i da'erah Gezer. Mokonyo aijo' sangkutnyo tempo' uuka aiya aha mian nu Kana'an daagi' kiijo' i Gezer hingga-hinggat tiba aha mian nu Efraim, panyo aha opakisa mokalaja salaku posaihon hi aha mian nu Efraim.