YOSUA 14 - KITAB NU TUMPU ALLA LELE MA'IMAI'

Da'erah sasu kinsoban Kaunyo nu Yordan binagimo

¹ Uuka aiya monsisikakonmo mosia na lipu' Kana'an anu i sasu kinsoban Kaunyo nu Yordan binagi-bagiakonmo hi aha mian nu Israel. Anu nombagi-bagiakon tano' aijo' hi aha mian nu Israel i Imam Eleazar, i Yosua anak i Nun, tiba to tu'a-tu'anyo nu auwan anu hi aha tulunan nu bansa Israel.

² Sumo anu pinalentahkonmo nu Tumpu hi Musa, iwi-iwi' na da'erah anu i sasu kinsoban, Kaunyo nu Yordan anu obee'mo hi aha osio' ka' mintonga' na tulunan nu bansa Israel, tionyo ahi' mompake onde na mombagi-bagiakon.

^3-4 Tano' i sasu kabete'an Kaunyo nu Yordan binee'mo i Musa hi aha ohua' ka' mintonga' na tulunan nu bansa sangga'at. (Palalu osumbu' na aiya saba' lee' i Yusuf binagi ohua' na tulunan nu bansa. Tulunan nu bansa Manasye tiba tulunan nu bansa Efraim.) Mongkona tulunan nu bansa Lewi, madi' ko tano' anu binee' i Musa hi aha. Aha ola binee'an to kota-kota' bau tampat kajojoongan, ka' anu ko padangnyo da nukaan nu sapi anu opotuu' tiba domba nu aha.

⁵ Sumo aijo' na aha mian nu Israel nombagi-bagi tano' aijo' susumo anu pinalentahkon mo nu Tumpu hi Musa.

Hebron binee'mo hi Kaleb

⁶ Daagi' kino sansinaan aha mian tulunan nu bansa Yehuda tinokamo mae da singkabot tiba i Yosua kiijo' i Gilgal. Sala'samian na aha aijo'mo i Kaleb anak i Yefune mian nu aha Kenas, notatae, “Koonyo: Yosua! Belento nonsumbu'mo apaa na anu pinoto'imo nu Tumpu hi Musa anu sinaimo mae nu Tumpu Allah aijo', kiijo' i Kades-Barnea mongkona belento tiba aku.

⁷ Umunku patompulu'mo na taun tempo'nyo i Musa, posaihon nu Tumpu aijo', nonsaimo aku lengkat mae i Kades-Barnea salaku anu mondoyoni da osumbu' na lipu' aiya. Ka' aku po'ule' ninsusule' hi ia nomboa lele ka' nompoto'i anu sahondo-hondonyo.

⁸ To mia-mian anu namba tiba aku, nompopobuhukmo aha mian nu Israel. Panyo aku sabole-bole saja' nohongo-hongo Tumpu Allah-ngku.

⁹ Jadi kalana aijo', i Musa nonjanji'mo tukoonyo tano' anu jinalanankumo memang obee'mo hi belengku ka' hi to ana-anaku da kamimo na tumpunyo sampe toka sidu-sidutu'.

¹⁰ Uuka aiya patompulu'mo ka' olima' na taun salatanmo pe'e Tumpu nompoto'i han aijo' hi Musa. Aijo' jinadi tempo'nyo bansa Israel hau-haunyo lewa' namba sinongko i tampat anu ewa ola saja' bone' sumomo padang. Ka' susumo anu jinanji'mo nu Tumpu, Tumpu suele nonjagaimo aku sahingga aku sabole-bole tinumuu' sampe uuka aiya. Soba toa, umunku uuka aiya ualumpulu'mo ka' olima' na taun,

¹¹ panyo daagi' mahoson susumo tempo'nyo i Musa nonsai aku. Daagi' sukup na kahosonanku mahampate kabai pa' mombau apa-apaa.

¹² Kalana aijo', bee'mo mae uuka aiya na da'erah nu bungkutnyo anu jinanji'mo nu Tumpu hi belengku tempo'nyo aku tiba to mia-mian anu hingga-hinggat tiba aku ninsusule'mo mae ka' nomboa mae lele ka' pinoto'imo. Tempo'nyo aitu posi belentomo na nohongo, saba' kiijo' mae daagi' ko bansa anu toto daka-daka' osanggohi bansa Enak. Aha jojoong i kota toto daka-daka' anu pinagan nu mesen. Ihe na monsumbu' Tumpu montulungije aku, sahingga ku poko ala na molaa' aha susumo anu pinoto'imo nu Tumpu.”

¹³ Sahingga i Yosua nonsitujuimo i Kaleb anak i Yefune lantas nombee'mo hi ia kota Hebron da timbalimo anunyo na tano' aijo'.

¹⁴ Sangkutnyo uuka aiya kota aijo' daagi' salaku pusaka' nu lee' i Kaleb anak i Yefune, mian nu Kenas aijo', kalana ia saja' mohongo-hongo ka' tulu-tulutan hi Tumpu Allah nu aha Israel.

¹⁵ Naipuan mae Hebron sinanggohan kota Arba. (Arba aijo'mo mian anu daka' hondo hi aha bansa Enak.) Jadi lipu' aijo' madi'mo ko anu nompoposia kalana madi'mo daagi' ko anu nompahampateakon.