YOSUA 13 - KITAB NU TUMPU ALLA LELE MA'IMAI'

Da'erah anu daagi' tionyo ahi' opatundu'

¹ Uuka aiya i Yosua i langkai'mo hondo. Tumpu notataemo hi Yosua, “Beleyum i langkai'mo, Yosua! Panyo daagi' manjoo' na da'erah anu tionyo ahi' opatundu'.

² Iwi-iwi' na da'erah nu Filistin ka' Gesur,

³ ka' iwi-iwi' na da'erah nu Awi mompatui sasu selatan. (Da'erah nu Kaunyo Sikhor i potempasan tiba Mesir toka-toka i potempasan tiba Ekron i sasu utara, iwi-iwi' aijo' minsoop da'erah bansa nu Kana'an; ka' aha tomundo nu Filistin jinojoong i Gaza, Asdod, Askelon, Gat, ka' Ekron.)

⁴ Suele anu daagi' tionyo ahi' opatundu'; iwi-iwi' na da'erah Kana'an tiba Meara (anu nu aha bansa Sidon), toka-toka i Afek i potempasan nu da'erah bansa Amori;

⁵ ka' mule' da'erah nu bansa Gebal, ka' iwi-iwi' na da'erah Libanon mompatui sasu kabete'an, lengkat mae i Baal-Gad sasu selatan Bungkutnyo nu Hermon, lau-laus mompatui toka-toka i jalan anu mamba i Hamat.

⁶ Tibamo suele iwi-iwi' na da'erah nu aha mian Sidon, anu jojoong i da'erah nu bungkutnyo olotnyo nu to bungku-bungkutnyo nu Libanon ka' Misferot-Maim.” “Iwi-iwi' na bansa haha aijo' ku laa'mo saidi' mae salatan aha mian nu Israel mahampatemo tiba aha,” sumo aijo' na koonyo nu Tumpu hi Yosua. “Tano haha aijo' tionyo ahi' nu bagi-bagiakonmo hi aha mian nu Israel da timbalimo anu nu aha na tano' aijo', susumo anu pinalentahkon-Kumo hi belemiu.

⁷ Jadi, uuka aiya bagi-bagiakonmo na tano' aijo' hi aha osio' na tulunan nu bansa Israel, ka' hi sambahagian na tulunan nu bansa Manasye, da tano aijo' timbalimo aha na tumpunyo.”

Tano' i da'erah sasu kabete'an Kaunyo nu Yordan binagimo

⁸ Tulunan nu bansa Ruben ka' Gad ka' sambagian na tulunan nu bansa Manasye mohumpakmo tano' anu binee'mo i Musa, posaihon nu Tumpu, aijo'mo tano' anu i sasu kabete'an Kaunyo nu Yordan.

⁹ Da'erah nu aha monsangkup Aroer (i sohipi' nu Bangka'nyo Kaunyo nu Arnon), ka' kota anu i totonga' nu bangka'nyo aijo'. Ka' suele songko-songko na da'erah i hatanyo aita' i bungkutnyo lengkat mae i Medeba toka-toka i Dibon,

¹⁰ ka' toka-toka i potempasan nu da'erah Amon, tibamo iwi-iwi' na kota anu toho'mo pinalentah i Sihon, tomundo nu aha Amori anu jinojoong i Hesybon.

¹¹ Ka' suele tiba da'erah Gilead, da'erah songko-songko Gesur tiba Maakha, tiba iwi-iwi' na Bungkutnyo nu Hermon, ka' iwi-iwi' na da'erah Basan toka-toka i Salkha.

¹² Da'erah nu aha suele monsangkup da'erah anu nu palentah i Tomundo Og, aha mian nu Refaim anu pupuusnyo nompalentah Asytarot tiba Edrei. I Musa nompatundu'mo bansa haha aijo' ka' nolaa'mo aha da madi'mo jojoong i da'erah nu aha.

¹³ Panyo aha anu jojoong i Gesur tiba i Makha madi' i laa' nu aha mian Israel; aha daagi' jinojoong i Israel.

¹⁴ Tulunan nu bansa Lewi madi' nohumpak tano' anu binagi i Musa, kalana pinoto'imo nu Tumpu hi Musa tukoo-Nyo bagi nu aha tulunan i Lewi aijo'mo iwi-iwi' na koloban anu opotunu i Mezbah anu salaku bau ponsombah Tumpu Allah nu aha Israel.

Da'erah anu binee'mo bau bagi i Ruben

¹⁵ Sambahagian na tano' anu jinanji'mo nu Tumpu hi aha mian nu Israel aijo' binee'mo i Musa hi to utu-utus nu aha tulunan nu bansa Ruben, da timbalimo aha na tumpunyo.

¹⁶ Da'erah nu aha aijo' monsangkup Aroer (i sohipi' nu Bangka'nyo Kaunyo nu Arnon) tiba anu i totonga' nu bangka'nyo aijo' toka-toka mokiita' iwi-iwi' i hatanyo nu bungkutnyo songko-songko na Medeba;

¹⁷ ka' suele Hesybon tiba iwi-iwi' na kota i hatanyo nu bungkutnyo aijo': aijo'mo Dibon, Bamot-Baal, Bet-Baal-Meon,

¹⁸ Yahas, Kedemot, Mefaat,

¹⁹ Kiryataim, Sibma, Zeret-Hasahar anu aita' i bungkutnyo i da'erah nu bangka'nyo aijo',

²⁰ Bet-Peor, i sohipi' nu Bungkutnyo Pisga tiba Bet-Yesimot.

²¹ Ka' mule' suele iwi-iwi' na kota i hatanyo aijo' ka' iwi-iwi' na da'reah kakuasa'an i Sihon, tomundo nu aha bansa Amori, anu u'utu mae jinojoong i Hesybon. Ia ka' anu mompalentah suele Midian, aijo'mo: i Ewi, i Rekem, i Zur, i Hur tiba i Reba, pinatundu'mo i Musa. Iwi-iwi' na anu balakuasa haha aijo' toho'mo nompalentah lipu' aijo', panyo tundu' hi Tomundo Sihon.

²² Aha mian anu pinateanmo nu aha bansa Israel aijo'mo i Bileam anak i Beor, anu saja' montahi'i.

²³ Kaunyo nu Yordan atina'mo na potempasan sasu kinsoban da'erah nu aha tulunan nu bansa Ruben. Aijo'mo na to kota-kota ka' to kampu-kampung anu binee'mo hi to utu-utus tulunan nu aha bansa Ruben da tano' aijo' timbalimo aha na tumpunyo.

Da'erah anu binee'mo bau bagi nu tulunan, nu bansa Gad

²⁴ Sambahagian na tano' anu jinanji'mo nu Tumpu hi aha mian nu Israel aijo' suele binee'mo i Musa hi to utu-utus tulunan nu bansa Gad, da timbalimo aha na tumpunyo.

²⁵ Da'erah nu aha monsangkup Yaezer tiba iwi-iwi' na kota i Gilead tiba sambahagian na da'erah nu bansa Amon kojo'onnyo toka-toka i Aroer, lau-laus i Raba sasu kabete'an;

²⁶ da'erah lengkat mae i Hesybon toka-toka i potempasan tiba Lodebar, iwi-iwi' aijo' suele minsoopmo da'erah tulunan nu bansa Gad.

²⁷ I Bangka'nyo nu Yordan da'erah nu tulunan nu bansa Gad aijo' monsangkup Bet-Haram, Bet-Nimra, Sukot, tiba Zafon, aijo'mo na anu madi' minsoop da'erah anu nu kuasai i Tomundo Sihon anu jojoong i Hesybon. Potempasan sasu kinsoban da'erah nu tulunan nu bansa Gad aijo', aijo'mo Kaunyo nu Yordan kojo'onnyo toka-toka i Dowiwi Galilea sasu utara.

²⁸ Aijo'mo na to kota-kota tiba to kampu-kampung anu binee'mo hi to utu-utus tulunan nu bansa Gad da tano' aijo' timbalimo aha na tumpunyo.

Da'erah sasu kabete'an Kaunyo nu Yordan anu binee'mo da bau bagi nu aha sambagian na tulunan nu bansa Manasye

²⁹ Sambahagian na tano' anu jinanji'mo nu Tumpu hi aha mian nu Israel aijo' suele binee'mo i Musa hi to utu-utus sambagian na tulunan nu bansa i Manasye da baumo anu nu aha.

³⁰ Potempasan nu da'erah haha aijo' nu aha toka-toka i Mahanaim, tibamo songko-songko na Basan aijo'mo iwi-iwi' na da'erah anu nu kuasai i Og, tomundo nu aha Basan ka' mule' anu anompulu' na to kampu-kampung Yair kiijo' i Basan.

³¹ Ka' mule' suele sambagian na da'erah Gilead tiba Asytarot ka' Edrei, aijo'mo ohua' na puso nu kota i da'erah anu nu palentah i Tomundo Og kiijo' i Basan. Songko-songko na da'erah aijo' binee'mo hi sambagian na to utu-utus lee' mae i Makhir, anak i Manasye.

³² Sumo aijo' na i Musa nombagi tano' sasu kabetean Yerikho, i santoa nu Kaunyo Yordan, tempo'nyo ia kiijo' mae i hatanyo nu Moab.

³³ Panyo tulunan nu bansa Lewi madi' nohumpak tano' mau ola sangkiding hi Musa. Pinoto'i i Musa hi aha tukoonyo bagi anu obee' hi aha aijo'mo iwi-iwi' na koloban anu osombahkon hi Tumpu Allah nu aha Israel.