YOSUA 12 - KITAB NU TUMPU ALLA LELE MA'IMAI'

To tomu-tomundo' anu pinatundu'mo i Musa

¹ Da'erah Yordan sasu kabete'an lengkat mae i Bangka'nyo nu Kaunyo Armon lau-laus mokiita' i Bangka'nyo nu Yordan kojo'onnyo toka-toka i Bungkutnyo nu Hermon sasu utara, pinatundu'mo ka' ingalamo ka' jinojoonganmo nu aha mian Israel. Ohua' na tomundo na pinatundu' nu aha.

² Samian sanggonyo i Sihon, tomundo nu aha Amori anu jojoong i Hesybon. Da'erah anu nu palentah monsangkup sambahagian da'erah Gilead; lengkat mae i Aroer (i sohipi' nu Bangka'nyo Arnon) ka' kota anu i totonga' nu bangka'nyo aijo' kojo'onnyo toka-toka i Kaunyo nu Yabok mompaha tempas da'erah nu aha bansa Amon;

³ ka' mule' monsangkup da'erah Bangka'nyo nu Yordan sasu kabete'an lengkat pe'e mae i dowiwi Galilea mamba mompatui sasu selatan toka-toka Bet-Yesimot (i sasu kabete'an Ambai Mate), lau-laus mamba i tengke nu Bungkutnyo Pisga.

⁴ Tomundo sangga'at anu pinatundu'mo nu aha mian Israel aijo'mo i Tomundo Og lengkat mae i lipu' Basan, anu jojoong i Asytarot ka' i Edrei. Ia sala'samian bansa Refaim anu daagi' tinontuha'.

⁵ Da'erah anu nu palentah monsangkup Bungkutnyo nu Hermon, Salkha, tiba songko-songko na Basan kojo'onnyo toka-toka i da'erah nu Gesur tiba Makha; ka' suele monsangkup sambagian na da'erah nu Gilead kojo'onnyo toka-toka i da'erah anu nu kuasai nu tomundo Sihon i kota Hesybon.

⁶ Aijo'mo na tomundo ua'aha anu pinatundu'mo i Musa hingga-hinggat tiba bansa Israel, tano' nu tomundo' haha aijo' binee'mo i Musa, posaihon nu Tumpu aijo' hi tulunan i Ruben, i Gad ka' sambahagian na tulunan nu bansa Manasye, da ahamo na tumpunyo nu tano' aijo'.

To tomu-tomundo anu pinatundu'mo i Yosua

⁷ To tomu-tomundo anu pinatundu'mo i Yosua hingga-hinggat tiba bansa Israel aijo'mo iwi-iwi' na tomundo i da'erah sasu kinsoban Kaunyo nu Yordan, lengkat mae i Baal-Gad i Bangka'nyo nu Libanon lau-laus i Bungkutnyo anu Madi' ko anu tumuu' sasu selatan koko Edom. Da'erah haha aijo' binagi-bagiakonmo i Yosua hi to tulu-tulunan nu bansa Israel da timbalimo anu nu aha na tano' aijo'.

⁸ Da'erah aijo' monsangkup da'erah nu bungkutnyo, da'erah tengkenyo nu bungkutnyo sasu kinsoban, Bangka'nyo nu Yordan tibamo da'erahnyo i tengke nu bungkutnyo, da'erah anu i sohipi' nu bungkutnyo sasu kabete'an, ka' da'erah padang bola sasu selatan. Da'erah haha aijo', aijo'mo na da'erah anu toho'mo kinajojoongan nu bansa Het, Amori, Kana'an, Feris, Hewi ka' Yebus.

^9-24 To tomu-tomundo anu pinatundu'mo, iwi-iwi' konjoo'nyo aha tolumpulu' ka' sa'angu' na mian; aijo'mo to tomu-tomundo anu i kota haha aiya: Yerikho, Ai (koko Betel), Yerusalem, Hebron, Yarmut, Lakhis, Eglon, Gezer, Debir, Geder, Horma, Arad, Libna, Adulam, Makeda, Betel, Tapuah, Hefer, Afek. Lasaron, Madon, Hazor, Simron-Meron, Akhsaf, Taanakh, Megido, Kedes, Yokneam (kiijo' i Karmel), Dor (i sonibi nu ambai), (kiijo' i Galilea) ka' Tirza.