YOSUA 11 - KITAB NU TUMPU ALLA LELE MA'IMAI'

I Yosua nohungku'imo i Yabin tiba anu nonsangaja'i ia

¹ Salatan i Tomundo Yabin kiijo' mae i Hazor nohongomo Israel saja'mo inguntung na nahampate, ia nonsaimo mian namba hi Tomundo Yobab anu kiijo' mae i kota Madon, ka' hi to tomu-tomundo nu kota Simron, tiba Akhsaf,

² mamba hi to tomu-tomundo anu aita' mae i bungkutnyo sasu utara, i Hatanyo nu Yordan sasu Selatan Galilea, i daerah tengkenyo nu bungkutnyo ka' da'erah sonibi nu ambai koko Dor.

³ Ia suele nonsai mian namba hi mian nu Kana'an sasu kinsoban ka' sasu kabete'an nu Yordan, namba hi mian nu Amori, Het, Feris, tiba aha mian nu Yebus i da'erah nu bungkutnyo, ka' mule' aha mian nu Hewi i tengke nu Bungkutnyo nu Hermon i da'erah nu Mizpa.

⁴ Sahingga tinokamo na tomundo haha aijo' tiba suludadunyo aha iwi-iwi' talalo hondo manjoo' sumomo bone' i sonibi nu ambai. Ajahan ka' kareta bau pahampate nu aha suele manjoo' hondo.

⁵ Iwi-iwi' na tomundo haha aijo' nosa'angu'mo ka' hingga-hinggat tinokamo mae i sa'angu' na tampat anu binau kajojoongan nu aha koko panga' nu Kaunyo Merom kahanda' montumbuhimo Israel.

⁶ Tumpu notataemo hi Yosua, “Boli okabuhuk na aha. Dodop susumo sinaa uuka aiya Ku pateimo na aha iwi-iwi' kalana monginau' Israel. Ajahan nu aha tionyo ahi' opengko'i nu beleyum ka' kareta nu aha iwi-iwi' anu opake nu aha nahampate tionyo ahi' opapui nu belemiu.”

⁷ Sahingga i Yosua tiba iwi-iwi' na suludadunyo nontumbuhimo sampobali' nu aha aijo' pinotolokengkeng nu aha koko panga' nu Kaunyo nu Merom.

⁸ Ka' pino'untungmo nu Tumpu na Israel nongewa aha. Aha mian nu Israel nontumbuhimo ka' nololoi'mo aha kojo'onnyo tinoka-toka i Misrefot-Maim tiba Sidon sasu utara, ka' kojo'onnyo toka-toka i Bangka'nyo nu Mizpa sasu kabete'an. Sabole-bole saja'mo nahampate sahingga sampobali' madi'mo ko anu tinontuha', iwi-iwi' i natemo.

⁹ I Yosua nombaumo aha sumo aijo' susumo apaa na anu pinalentahkonmo nu Tumpu: ia nompengko'imo ajahan nu aha ka' nompapuimo kareta iwi-iwi' nu aha anu pinake nahampate.

^10-11 Salatan i Yosua ninsusule'mo mae ia nompatundu'mo Hazor anu tempo'nyo aitu mahoson hondo molingkudui iwi-iwi' na kalaja'an anu mompalentah ikiijo'. Kota aijo' pinapuanmo, tiba tomundo'nyo ka' iwi-iwi' na mian anu jojoong ikiijo' pinalentahmo; mau pe'e ola samian madi'mo daagi' ko anu pinotumuu'.

¹² Iwi-iwi' na kota haha aijo' pinatundu'mo i Yosua, ka' to tomu-tomundo'nyo i hakopmo ka' pinateanmo susumo anu pinalentahkonmo i Musa posaihon nu Tumpu aijo'.

¹³ Panyo iwi-iwi' na kota anu binau i tambulan nu abu' anu naipuan mae toho'mo pinapuan na kota'nyo, mau pe'e ola sa'angu' madi' pinapuan nu aha mian Israel, ola Hazor na posi Yosua na nompapui.

¹⁴ Iwi-iwi' na mian anu jojoong i kota haha aijo' pinateanmo; mau pe'e ola samian madi'mo daagi' ko anu pinotumuu'. Panyo iwi-iwi' na balangnyo anu mahan na olinyo ka' potuu'on nu aha ingalamo nu aha mian Israel tinimbalimo aha na tumpunyo.

¹⁵ Iwi-iwi' na anu pinalentahkonmo nu Tumpu hi Musa, posaihon-Nyo, pinotokakonmo i Musa hi Yosua; mau pe'e ola sa'angu' madi' ko anu kinolilimannyo.

Da'erah anu pinatundu'mo i Yosua

¹⁶ I Yosua nompatundu'mo songko-songko na lipu' aijo' – da'erah anu aita' i bungkutnyo da'erah i tengke nu bungkutnyo, mau anu i sasu utara, mau anu i selatan; ka' mule' suele songko-songko na da'erah Gosyen ka' da'erah padang anu mateges sasu selatan Gosyen, ka' mule' bangka'nyo nu Yordan.

^17-18 Ko ewanyo nu da'erah aijo' lengkat pe'e mae i Bungkutnyo anu Madi' ko anu tumuu' i sasu selatan koko Edom, toka-toka i sasu utara kojo'onnyo toka-toka i Baal-Gad i Bangka'nyo nu Libanon sasu selatan Bungkutnyo nu Hermon. Pinin hondo na i Yosua nahampate tiba to tomu-tomundo i da'erah aijo', panyo ahennyo pinaha hakopnyomo na aha ka' pinateannyomo na aha iwi-iwi'.

¹⁹ Iwi-iwi' na kota anu songko-songko i da'erah aijo' mau pe'e ola sa'angu' na kota madi' nombau palajanjian da mobe la' tiba Israel, ola ahi' Gibeon, kota nu aha bansa Hewi. Iwi-iwi' na kota sangga'at pinatundu'mo tempo'nyo nahampate.

²⁰ Pinobaanimo nu Tumpu na aha da jukut na mahampate tiba aha mian nu Israel da aha ohopu'imo ka' opateimo iwi-iwi' madi'mo daagi' ko ampunnyo susumo anu pinalentahkonmo nu Tumpu hi Musa.

²¹ Tempo'nyomo aitu suele na i Yosua namba nompatei iwi-iwi' bansa Enak, aijo'mo bansa anu toto daka-daka' na butong nu aha anu jojoong i da'erah nu bungkutnyo – kiijo' mae i Hebron, Debir, Anab, ka' songko-songko na da'erah nu bungkutnyo Yehuda tiba Israel. Aha iwi-iwi' pinateanmo i Yosua ka' iwi-iwi' na kota nu aha ingideanmo.

²² Mau pe'e ola samian na bansa Enak aijo' madi'mo daagi' ko anu tinontuha i da'erah Israel, ola kiijo' i Gaza, Gad ka' Asdod na daagi'.

²³ Songko-songko na lipu' aijo' pinatundu'mo i Yosua susumo anu pinalentahkonmo nu Tumpu hi Musa, ka' binee'mo hi bansa Israel tinimbalimo aha na tumpunyo. Lipu' haha aijo' binagi-bagimo ka' toto sa'angu' na tulunan nu bansa nohumpakmo sa'angu' na bahagian. Bansa Israel madi'mo lewa' nahampate ka' lipu' nu aha madi'mo ko anu lewa' mompoposia.