YOSUA 1 - KITAB NU TUMPU ALLA LELE MA'IMAI'

Tumpu Allah nompokaumo i Yosua da mamba mompo'ago Kana'an

¹ Salatan i Musa sinilakamo, posaihon nu Tumpu aijo', Tumpu nompoto'imo hi wakin i Musa, aijo'mo i Yosua, anak i Nun.

² Tumpu notatae, “Posaihon-Ku i Musa sinilakamo. Jadi uuka aiya beleyum ka' iwi-iwi' na aha mian nu Israel pogogaumo da motaapmo mokiijo' i Kaunyo nu Yordan, ka' mompinsoopimo lipu' anu Ku bee'mo hi aha.

³ Pinoto'ing-Kumo hi Musa tukoong-Ku toto sa'angu' na da'erah anu so' osahak nu belemiu Ku bee'mo hi belemiu, Yosua, ka' hi iwi-iwi' na mian anu pinalesayamo hi beleng-Ku.

⁴ Da'erah nu belemiu otampu'uni lengkat mae i padang bola sasu Selatan toka-toka i Bungkutnyo nu Libanon sasu Utara ka' lengkat mae i Kaunyo nu Efrat anu daka' aijo' i sasu kabete'an lau-laus mokiijo' monsangkup lipu' nu bansa Het toka-toka i Ambai anu Totonga'nyo i sasu kinsoban.

⁵ Madi' ko samian pe'e na anu moko ala mohungku'i beleyum, Yosua de beleyum daagi' tumuu': Kalana Aku saja' monsangalui susumo naipuan mae Aku nonsangaluimo i Musa. Aku madi' mompala'i beleyum.

⁶ Tionyo ahi' beleyum palesaya totu-totu'u ka' baani kalana beleyumo na molaya' bansa aiya de aha jojoongmo i lipu' anu jinanji'-Kumo hi mompolee' nu aha.

⁷ Ola, tionyo ahi' beleyum totu-totu'u na kinyonyoa ka' baani. Beleyum tionyo ahi' sabole-bole monginau' ka' beleyum sabole-bole ahi' montuluti atulan iwi-iwi' anu binee'mo i Musa posaihon-Ku hi beleyum, boli nu kolilimi mau ola pa' to sangkuka, da apaa na anu nu kahanda'i tionyo ahi' nu humpak.

⁸ Kitab nu atulan aijo' tionyo ahi' saja' nu basa'akon hi mian anu pinalesayamo hi beleng-Ku. Ogulu'i na kitab aijo' sinaa ka' malom, da saja' nu bau iwi-iwi' apaa na anu tuli-tulis kiijo' i unonyo. De nu baumo na aijo' iwi-iwi' kantumuu'an nu beleyum mohumpakmo kasanangan ka' apaa na anu nulio nu beleyum ohumpakmo.

⁹ O inau', Aku nompalentahmo beleyum da beleyum totu-totu'u na kinyonyoa ka' baani! Boli beleyum mabuhuk kabai hente na kinyonyoa, kalana Aku na Tumpu Allah nu beleyum saja' monsangalui beleyum maumo pa' moya na kalambanan nu beleyum.”

I Yosua nombee'imo palentah ka' pokinde' hi aha mian nu Israel

¹⁰ Jadi, i Yosua nompalentahmo to pola-polaya' nu aha mian Israel

¹¹ da mamba i songko-songko na kemah nu aha mian Israel ka' nombee'i palentah sumo uuka, “Potoukai na mantu kalana daagi' tolun sinaa belemiu tionyo ahi' motaapmo i Kaunyo nu Yordan da jojoongmo i lipu' anu binee'mo nu Tumpu Allah nu belemiu hi belemiu.”

¹² Hi aha tulunan nu bansa Ruben, tulunan nu bansa Gad, ka' sambagian na tulunan nu bansa Manasye, i Yosua notatae,

¹³ “O inau'! I Musa posaihon nu Tumpu aijo' nompoto'imo hi belemiu tukoonyo tano' anu i sasu kabete'an Kaunyo nu Yordan aiya binee'mo nu Tumpu Allah hi belemiu da baumo lipu' nu belemiu.

¹⁴ Iwi-iwi' na anak ka' bengkele' nu belemiu ka' potuu'on nu belemiu timbalimo opo'una' i aiya, panyo belemiu anu mahampate na tionyo ahi' saja' mosadia mahampate ka' aha na mamba momona motaap i Kaunyo nu Yordan, mian nu Israel sangga'at mombatukije i mihi.

¹⁵ Belemiu tionyo ahi' montulungi aha sahingga aha jojoongmo i tano' sasu kinsoban Kaunyo nu Yordan aijo' anu binee'mo nu Tumpu Allah nu belemiu hi aha. De nubee'imo nu Tumpu ka'amanan ka' madi'mo ko anu mompoposia aha iwi-iwi' bansa Israel, atina'je ka' belemiu timbali minsusule' i posi tano' nu belemiu anu i sasu kabete'an nu Yordan aiya. Anu binee'mo i Musa posaihon nu Tumpu aijo' hi belemiu.”

¹⁶ Sahingga tulunan nu bansa Ruben, Gad ka' sambagian na tulunan nu bansa Manasye aijo' nontaamimo, “Maumo pa' apaa na anu opalentahkon nu belento hi kami obaumo mami, ka' maumo pa' moya na ponsaian nu belento kami mamba, kami mambamo.

¹⁷ Kami tulu-tulutanmo hi belento, susumo kami suele tinulu-tulutanmo hi Musa. O amalakon da Tumpu Allah nu belemiu saja' monsangalui susumo Ia nonsangaluimo i Musa!

¹⁸ Batu-batu mian anu madi' mongka'oho' ta'aluk i kakuasa'an nu beleyum kabai madi' montuluti palentah nu beleyum, mohumpak hukuman mate. Tionyo ahi' beleyum totu-totu'u na kinyonyoa ka' baani!”