YOHANES 7 - KITAB NU TUMPU ALLA LELE MA'IMAI'

I Yesus tiba to utu-utus-Nyo

¹ Lapas aijo' i Yesus nambamo noyaya i Galilea. Ia madi' mongka'oho' mamba i tano' nu Yudea kalana anu mongkuasai Yahudi i kiijo' mae kahanda'mo mompatei Ia.

² Tempo'nyo aitu ohanimo na lamean Sinaa Daka' Pondok Daun.

³ Sahingga to utu-utus i Yesus notatae hi Ia, “Pala'imo na tampat aiya ka' lako'mo i Yudea, da anu saja' mombatuki Beleyum timbali ahi' montoa kalajaum.

⁴ Madi' ko mian anu mompohowini apaa na anu binaunyo, de ia mongka'oho' da talasanggo. De Beleyum mombau hahan anu sumo aijo', songko-songko na dunia tantu tionyo monsumbu'!” (

⁵ Kalana posi to Utu-utus-Nyo pe'e madi' palesaya hi Ia.)

⁶ “Ma'isa pe'e tempo'nyo kona hi beleng-Ku,” koo-Nyo i Yesus hi aha, “panyo komiu, yaya na tempo' timbali.

⁷ Dunia aiya madi' toho' mongka'ideki komiu. Panyo Aku memang nu ka'ideki nu dunia, kalana Aku saja' montaloakon i dunia kalakuannyo aijo' ma'idek.

⁸ Posi lako'mo na komiu i lamean aijo'. Aku madi' mamba kalana misa' pe'e tempo'nyo kona hi beleng-Ku.”

⁹ Sumo aijo' na koonyo i Yesus hi to Utu-utus-Nyo, ka' Ia mule' jinojoongmo kiijo' i Galilea.

I Yesus kiijo' i lamean Pondok Daun

¹⁰ Salatan to Utu-utusnyo inambamo i lamean aijo', hoko-hokot na i Yesus namba posi sausa'nyo madi' sinumbu' nu mian.

¹¹ Tempo'nyo nu lamean aijo', anu mongkuasai Yahudi saja' molio Ia ka' saja' moleleki, “Iyamae na Ia?”

¹² Da'isan na mian lewa'mo mongoyongakon Ia. Daagi' ko anu motatae, “Ia mian ma'ima'.” Daagi' mule' ko anu motatae, “Madi'! Ia monsaduakon pikilan nu mian da'isan timbali ponga'.”

¹³ Panyo madi' ko samian pe'e na baani motatae i aho-ahop mongkona Ia, kalana aha mabuhuk hi anu mongkuasai Yahudi.

¹⁴ Hau-haunyo lamean, i Yesus ninsoopmo i uno nu Laigan nu Tumpu, lantas nontampu'uni nompogulu'.

¹⁵ Anu mongkuasai Yahudi binangang hondo ka' notatae, “Mosia na mian aiya ka' manjoo' na anu nusumbu', padahan Ia madi' toho' nosikolah?”

¹⁶ I Yesus nontaami, “Anu Ku pogulu' aiya misa' pangajalan-Ku, panyo pangajalan-Nyo anu nonsai mae Aku.

¹⁷ Mian anu montuluti pongka'oho' nu Tumpu, monsumbu' pa' pangajalan-Ku lengkat mae hi Tumpu kabai posi lengkat mae hi beleng-Ku.

¹⁸ Mian anu mombee' posi pangajalannyo, molio da o'adati na butongnyo. Panyo mian anu molio da o'adati na anu nonsai mae Ia, mian aijo' hodi' madi' baleko' na ia.

¹⁹ Te misa' i Musa nombee'imo pale-palentah nu Tumpu hi beleyum? Panyo itina' hi komiu madi' ko anu mombatuki pale-palentah haha aijo'. Ka' kadaka' komiu kahanda'mo mompatei Aku?”

²⁰ Mian da'isan aijo' nontaami, “Beleyum motutuang! Ihe na kahanda'mo mompatei Beleyum?”

²¹ I Yesus nontaami, “Ola sa'angu' na kalaja anu binaung-Kumo i sinaa nu Sabat, ka' binangang na komiu.

²² I Musa nombee'i komiu atulan da o sunat – mau mule' sunat aijo' sabenannyo misa' nolengkat mae hi Musa, panyo lengkat mae hi to tutuuma nu nompolee' ma'isa pe'e kino i Musanyo. Kalana aijo', mau mule' i sinaa nu Sabat komiu mongka'oho' monsunat mian.

²³ De komiu mombau anu sumo aijo' da boli molanggai atulan i Musa mongkona sunat, kadaka' komiu motambuha' hi beleng-Ku kalana nompa'alin butong nu mian songko-songko i sinaa nu Sabat?

²⁴ Boli mompisala'i mian ola kalana mompintongi anu otoa, panyo kalana mompintongi ka'adilan.”

Pa' totu'u na i Yesus Tomundo anu Momposalamat?

²⁵ Lapas aijo' daagi' ko to pia-piangkuka na mian nu Yerusalem notatae, “Te misa' aiyamo na mian anu oli-olio da o patei?

²⁶ Toamo, Ia motatae lamba-lamba i ahop nu mian da'isan, ka' madi' ko anu montaloakon apa-apaa hi Ia! Ugaat anu mongkuasai kita nonsumbu'mo saba' aiyamo na Ia Tomundo anu Momposalamat?

²⁷ Panyo de Tomundo anu Momposalamat aijo' toka, madi' ko samian pe'e monsumbu' pa' iyamae na pinolengkatan-Nyo! Padahan osumbu'to iyamae na pinolengkatan nu mian aiya.”

²⁸ Lapas aijo' hau-haunyo i Yesus mompogulu' i uno nu Laigan nu Tumpu, Ia noloboo'mo notatae daka-daka', “Jadi osumbu'mo miu ihe na Aku aiya, ka' lengkat mae iya na pinolengkatan-Ku? Aku tinoka misa' posi pongka'oho'-Ku. Aku sinai mae nu Ia anu ko hak monsai mae Aku, ka' Ia timbali opalesaya. Panyo komiu madi' monsumbu' Ia.

²⁹ Aku monsumbu' Ia, kalana Aku nolengkat mae hi Ia, ka' Iamo na nonsai mae Aku.”

³⁰ Tempo'nyo aitu aha kahanda'mo mohakop i Yesus, panyo madi' ko anu baani montongi Ia, kalana ma'isa pe'e tinoka na tempo'nyo.

³¹ Da'isan na mian anu i kiijo' montampu'unimo palesaya hi Ia, ka' notatae, “De Tomundo anu Momposalamat aijo' tokamo, ugaat Ia na timbali mombau lebe manjoo' na anu okabangangi molingkudui mian aiya?”

Tanga'an mohakop i Yesus

³² To mia-mian nu Farisi nohongomo mosia na mian da'isan haha aijo' mompaha oyo-oyong mongkona i Yesus. Kalana aitu, hingga-hinggat tiba to kapa-kapala nu imam, aha nonsaimo to pia-piangkuka ponjagai Laigan nu Tumpu mamba mohakop i Yesus.

³³ I Yesus notatae hi mian da'isan i uno nu Laigan nu Tumpu, “Me sasaingoni' uuka, Aku daagi' hingga-hinggat tiba komiu. Lapas aijo' Aku minsusule'mo hi anu nonsai mae Aku.

³⁴ Komiu molioje Aku, panyo madi' opoko humpak na Aku; kalana komiu madi' moko ala toka i tampat kajojoongan-Ku.”

³⁵ Lantas anu mongkuasai Yahudi notataemo samian ka' samian, “Mian aiya kahanda'mo mamba moya sahingga madi' opoko humpakto na Ia? Te Ia kahanda'mo mamba hi to mia-mian Yahudi anu jojoong i sambiha' nu lipu' santano'an i totonga' nu mian Yunani ka' mompogulu' mian nu Yunani?

³⁶ Apaa na poso' nu potatae tukoo-Nyo kita molioje Ia, panyo madi' opoko ala ohumpak ka' mule' kita madi' moko ala montoka tampat kajojoongan-Nyo?”

Uee anu mombee'i kantumuu'an

³⁷ I sinaa kamingkotannyomo nu lamean aijo', aijo'mo sinaa anu talalo hondo penting, i Yesus tinuminjomo i Laigan nu Tumpu ka' notatae daka-daka', “Mian anu megot toka mae hi beleng-Ku da monginum.

³⁸ Mongkona mian anu palesayamo hi beleng-Ku tinulismo i uno nu Kitab nu Tumpu. ‘Lengkat i kinyonyoa mo'ili na uee anu mombee'i kantumuu'an.’ ” (

³⁹ I Yesus binasisik mongkona Roh nu Tumpu, anu saidi' mae nu talimaje nu to mia-mian anu palesayamo hi Ia. Kalana tempo' aitu Roh nu Tumpu ma'isa binee'; kalana i Yesus ma'isa pinopodaka' i uno nu kasilakan-Nyo.)

⁴⁰ Da'isan na mian anu nohongo apaa na anu tinaloakonmo i Yesus, ka' i totonga' nu aha daagi'mo ko anu notatae, “Mian aiya matantumo Nabi!”

⁴¹ Sangga'at notatae, “Aiyamo na Tomundo anu Momposalamat!” Panyo daagi' mule' ko anu notatae, “Ha, te toho' Tomundo anu Momposalamat toka lengkat mae i Galilea?

⁴² I uno nu Kitab nu Tumpu tinulis, ‘Tomundo anu Momposalamat te lee' mae i Daud, ka' anu toka lengkat mae i Betlehem, aijo'mo kampung kajojoongan i Daud.’ ”

⁴³ Ahennyo to mia-mian montampu'unimo pinainggaga mongkona i Yesus.

⁴⁴ Daagi' ko anu mompai hakopmo Ia, panyo madi' ko samian pe'e na moko toongi Ia.

Anu mongkuasai Yahudi madi' palesaya

⁴⁵ Tempo'nyo anu monjagai Laigan nu Tumpu sina-sinai mamba mohakop i Yesus ninsusule'mo mae, to kapa-kapala nu imam tiba to mia-mian Farisi nompokilawamo hi aha, “Ka' kadaka' komiu madi' nomboa mae Ia?”

⁴⁶ Anu monja-monjagai aijo' nontaami, “Bee', ma'isa toho' ko mian anu notatae sumo Ia!”

⁴⁷ “Pa' komiu suele pinotimbali-Nyomo ponga'?” koonyo nu to mia-mian nu Farisi aijo'.

⁴⁸ “Te daagi' ko anu mongkuasai mae kita kabai mian nu Farisi anu pinalesayamo hi Ia?

⁴⁹ Panyo mian da'isan aiya, aha madi' monsumbu' atulan i Musa, ka' mau mule' mosia aha kinutukanmo.”

⁵⁰ Sala'samian anu kiijo' i mian nu Farisi, aijo'mo i Nikodemus anu toho'mo tinoka hi Yesus. I Nikodemus notatae hi to mia-mian nu Farisi sangga'at,

⁵¹ “Koonyo nu Atulan, batu-batu mian madi' timbali o hukum de ma'isa pe'e palakalanyo ohongo, ka' anu binaunyomo o palesa.”

⁵² “Te beleyum suele lengkat mae i Galilea?” tinaaman nu aha. “Soba palesaya na Kitab nu Tumpu! Beleyum montoaje saba' madi' ko Nabi anu molengkat mae i Galilea!” [

Samian na boune tinokaan masala'

⁵³ Lapas aijo', iwi-iwi' na mian ninsusule'mo i laigan.