YOHANES 4 - KITAB NU TUMPU ALLA LELE MA'IMAI'

I Yesus tiba boune nu Samaria

¹ To mia-mian nu Farisi nohongo i Yesus nohumpak ka' nompalamandikan lebe da'isan molingkudui anu mombatuki Yohanes. (

² Sabenannyo i Yesus madi' nompalamandikan, panyo ola ahi' anu saja' mombatuki Ia.)

³ Salatan sinumbu'mo i Yesus na to mia-mian nu Farisi nohongomo lele aijo', Ia namba nompala'i Yudea ninsusule' i Galilea.

⁴ Ia namba aijo' Ia tionyo motulu i Samaria.

⁵ Sahingga tinoka na i Yesus i sa'angu' na kota nu Samaria sanggonyo Sikhar, madi' majo'on lengkat i tano' anu tempo'nyo naipuan mae binee' i Yakub hi Yusuf anaknyo.

⁶ I kiijo' daagi' ko bubung i Yakub. I Yesus nalawemo hondo kalana i lumajang, kalana aitu Ia sinumuhang i sohipi' nu bubung. Tempo'nyo aijo' kila-kila jam sampulu'mo ka' ohua' sonsu'unmo na sinaa.

^7-8 Ka' anu saja' mombatuki Yesus nambamo i kota mongoli anu okaan. Lantas tinoka na boune nu Samaria montauk uee. I Yesus notatae hi ia, “Kita tina, de timbali Aku mompoita monginum?”

⁹ Boune nu Samaria aijo' nontaami, “Kita Tuan mian nu Yahudi, aku mian nu Samaria; kadaka' kita Tuan mompoita monginum hi belengku?” (Kalana to mia-mian nu Yahudi madi' mompahasumbu' tiba mian nu Samaria.)

¹⁰ I Yesus nontaami, “De beleyum monsumbu' apaa na anu nubee' nu Tumpu ka' ihe na mompoita monginum hi beleyum tantu beleyum na momoita monginum hi Ia, ka' Ia tionyo mombee'i beleyum uee kantumuu'an.”

¹¹ Koonyo nu boune aijo', “Kita Tuan madi' ko pontauk, ka' bubung aiya maleeng hondo. Lengkat mae iya na pohumpakan i Tuan uee kantumuu'an?

¹² I Yakub, tuuma nu mompolee' mami, na nombee' bubung aiya hi kami. Ia mongala uee anu o inum i aiya; sumo aitu mule' na to ana-anaknyo tiba to bina-binatang potuu'onnyo. Te osangkanto Tuan, i Tuan lebe daka' molingkudui Yakub?”

¹³ “Mian anu monginum uee aiya saidi' mae po'ule' megot,” na koonyo i Yesus,

¹⁴ “panyo mian anu monginum uee anu Ku bee', madi'mo daagi' megot sidu-sidutu'. Kalana uee anu Ku bee' aijo' timbalimo mata nu uee i uno nu butongnyo anu mo'ili mosabat ka' mombee'i ia kantumuu'an talakana' sampe toka sidu-sidutu'.”

¹⁵ Koonyo nu boune aijo', “Tuan, bee'i mae na aku uee aijo', da aku madi'mo po'ule' megot; ka' madi'mo pilenje minsusule' mae i aiya mongala uee.”

¹⁶ “Lako', laga mae na langkai'um, lantas pinsusule' mae aiya,” na koonyo i Yesus.

¹⁷ “Aku madi' ko langkai',” na koonyo nu boune aijo'. “Memang totu'u na kooyum,” tukoonyo i Yesus.

¹⁸ “Kalana beleyum no'osoa pinilimanmo, ka' mo'ane anu tumuu' tua-tuang uuka misa' langkai'um.”

¹⁹ “Uuka aiya kusumbu' kita Tuan samian na Nabi,” na koonyo nu boune aijo'.

²⁰ “Mompolee' mami monsombah Tumpu i bungkutnyo aiya, panyo bansanto Tuan montaloakon ola i Yerusalem na tampatnyo mian monsombah Tumpu.”

²¹ “Palesayamo,” na koonyo i Yesus hi ia, “tokaje na tempo'nyo mian monsombah Tuuma, misa'mo i bungkutnyo aiya, ka' misa' mule' i Yerusalem.

²² Komiu mian nu Samaria monsombah anu madi' osumbu' miu, panyo kami mian nu Yahudi monsombah Ia anu osumbu' mami, kalana kasalamatan toka lengkat mae hi mian nu Yahudi.

²³ Panyo tokaje na tempo'nyo, ka' memang tinokamo kalana Roh-je nu Tumpu na mongkuasai sahingga to mia-mian monsombah Tuuma salaku Tumpu anu totu-totu'u susumo anu nunu kahanda'i nu Tuuma.

²⁴ Kalana Tumpu aijo' Roh, ka' ola kalana kuasa nu Roh nu Tumpu, to mia-mian moko ala monsombah Tuuma susumo daagi' ko Ianyo.”

²⁵ Boune aijo' notatae hi Yesus, “Kusumbu' Tomundo anu Momposalamat (anu osanggohi Kristus) tokaje mae. De Ia tokamo iwi-iwi' na apa-apaa nu poto'ije hi kita.”

²⁶ “Akumo na Ia,” koonyo i Yesus, “Akumo na anu aiya hau-haunyo motatae tiba beleyum.”

²⁷ Tempo'nyo aitu anu saja' mombatuki Yesus ninsusule'mo. Aha binangang nontoa i Yesus basisik tiba samian na boune. Panyo madi' ko samian pe'e anu aijo' hi aha nompokilawa hi boune aijo', “Kita tina palalu apaa?” kabai anu nompokilawa hi Yesus, “Ka' kadaka' kita Tuuma basisik tiba boune aijo'?”

²⁸ Saba' pinala'ian nu boune aijo' na gumbangnyo i kiijo', lantas nopadeka' namba i kota ka' notatae hi to mia-mian anu i kiijo' mae,

²⁹ “Imbo', mamba toa na mian anu nompoto'i hi belengku iwi-iwi' na anu toho'mo binaungku. Ugaat Iamo ai-aijo' na Tomundo anu Momposalamat?”

³⁰ Saba' mian haha aijo' nompala'i kota ka' namba hi Yesus.

³¹ Hau-haunyo aijo' anu saja' mombatuki Ia nompasomo i Yesus mongkaan, “Kita Tuumangku Gulu',” na koonyo nu aha, “imbo' da mongkaan.”

³² Panyo i Yesus nontaami, “Daagi' ko anu okaan hi beleng-Ku anu madi' osumbu' miu.”

³³ Sahingga anu saja' mombatuki Ia nontampu'unimo nompaha poki-pokilawa, “Te ko anu nomboai mae anu okaan hi Ia?”

³⁴ Lantas i Yesus notatae, “Anu Ku kaan aijo'mo mombatuki pongka'oho'-Nyo anu nonsai mae Aku, ka' mompotimbali kalaja anu binee'-Nyo hi beleng-Ku.

³⁵ Komiu motatae, ‘Daagi' opat na bitu'on pompadakanmo.’ Panyo Aku motatae hi komiu: Tanggalakon na to ale-ale' singkapmo kinangkinian me montanda'i o padak!

³⁶ Mian anu mompadak montampu'unimo montalima tamboonyo, ka' molimu' hasinnyo da bau kantumuu'an anu talakana' sampe toka sidu-sidutu'. Sahingga mian anu montugan tiba mian anu mompadak timbali mongoa'i kasanangan hingga-hinggat.

³⁷ Ande-andeon aiya totu'u suele, ‘Samian na motugan, mian sangga'at na mompadak.’

³⁸ Aku monsai komiu mamba mompadak i ale' anu madi' kinalaja miu; mian sangga'at nokalajamo kiijo' mae, lantas komiu na montalima ka'untungannyo i kalaja nu aha.”

³⁹ Da'isan na mian nu Samaria anu jojoong i kota aijo' pinalesayamo hi Yesus, kalana boune aijo' notatae, “Ia nontaloakonmo hi belengku iwi-iwi' na anu toho'mo binaungku.”

⁴⁰ Saba' tempo'nyo mian nu Samaria haha aijo' siningkabotmo tiba i Yesus, pagala kinakase nu aha, da Ia jojoong tiba aha. Jadi i Yesus jinojoong i kiijo' inguansinaa na kopinnyo.

⁴¹ Lapas aitu nompaka panjoo'mo na mian palesaya hi Yesus kalana nohongomo apaa na anu pinogulu'-Nyo hi aha.

⁴² Aha notatae hi boune aijo', “Kami palesayamo uuka aiya, misa' ola kalana apaa na anu tinaloakonmo nu beleyum hi kami, panyo kalana posi ihongomo mami na Ia, ka' nonsumbu'mo taalu' memang Ia anu Momposalamat dunia.”

I Yesus nompa'alin anak nu anu ko pangkat mokalaja i laigan nu tomundo

⁴³ Lapas inguansinaa na jinojoong i Sikhar, i Yesus nambamo i Galilea.

⁴⁴ Posi i Yesus nontaloakonmo, “Samian na nabi madi' o'adati i posi kampungnyo.”

⁴⁵ Panyo tempo'nyo Ia tinoka i Galilea, mian haha i kiijo' mae sanang na kinyonyoa nolabot Ia, kalana aha kiijo'mo i Yerusalem kakona i Sinaa nu Lamean Daka' Paskah, ka' toho'mo nontoa na iwi-iwi' apaa na anu binau i Yesus.

⁴⁶ Lapas aijo' i Yesus ninsusule'mo i Kana i tano' nu Galilea, kiijo' mae Ia toho'mo nongabali' uee tinimbali anggur. I kota kiijo' daagi' ko samian anu ko pangkat bakalaja i pamalentah, anaknyo hau-haunyo masakit kiijo' i Kapernaum.

⁴⁷ Salatan ihongonyo na i Yesus tinokamo i Galilea, lengkat mae i Yudea, ia inamba hi Yesus ka' nompoita da i Yesus toka mae i Kapernaum mompa'alinakon anaknyo anu kiniboli' sinilakamo.

⁴⁸ I Yesus notatae hi anu ko pangkat mokalaja i pamalentah aijo', “De komiu madi' montoa anu okabangangi, komiu madi' palesaya.”

⁴⁹ “Tuan,” tinaaman nu anu ko pangkat mokalaja i pamalentah aijo', “palia' mae toka da ma'isa pe'e anakku silaka.”

⁵⁰ Koonyo i Yesus hi ia, “Lako'mo, anakum na'alinmo.” Mian aijo' palesaya i potatae i Yesus, lantas ia nambamo.

⁵¹ I tonga' nu jalan, to posa-posaihon tinokamo hi ia, ka' nompoto'i, “Anak i Tuan na'alinmo.”

⁵² Lantas pinokilawanyo hi aha, jam sangkuka na anak aijo' nontampu'unimo ma'alin. Aha nontaami, “Nabongi kila-kila jam sambatu sonsu'un na sinaa, panasnyo na'alinmo.”

⁵³ Lantas tuuma nu anak aijo' tinonginau'mo saba' tempo'mo ai-aijo' na i Yesus notatae hi ia, “Anakum ma'alinmo.” Sahingga ia ka' iwi-iwi' na anu sampoto utusannyo pinalesayamo hi Yesus.

⁵⁴ Aijo'mo na anu okabangangi ko ohua'nyo anu binau i Yesus i Galilea salatan Ia tinokamo lengkat mae i Yudea.