YOHANES 3 - KITAB NU TUMPU ALLA LELE MA'IMAI'

I Yesus tiba i Nikodemus

¹ Daagi' ko samian anu pande i agama gampanyo nu aha mian Farisi, sanggonyo i Nikodemus.

² Ia tinoka pihi-pihi hi Yesus ka' notatae, “Tuumangku Gulu', osumbu' mami na Kita Tuuma sinai mae nu Tumpu. Kalana madi' ko samian anu moko ala mombau anu okabangangi susumo anu binau nu Kita Tuuma, de Tumpu madi' montombaya'i ia.”

³ I Yesus nontaami, “Palesayamo, madi' ko samian pe'e timbali minsoop anu palesayamo hi Tumpu, de madi' ia po'ule' ohampeakon.”

⁴ “Te toho' mian anu motu'amo po'ule' ohampeakon,” koonyo i Nikodemus hi Yesus. “Te ia moko ala po'ule' minsoop i uno nu kompong nu tinanyo ka' po'ule' ohampeakon?”

⁵ I Yesus nontaami, “Totu-totu'u na potataeng-Ku aiya: de mian madi' ohampeakon nu uee ka' mule' nu Roh nu Tumpu, mian aijo' madi' timbali mian anu palesayamo hi Tumpu.

⁶ Butong nu mian susumo aiya anu kantoan, ohampeakon nu tu'a nyonyo, panyo palesaya hi Tumpu ohampeakon nu Roh nu Tumpu Allah.

⁷ Boli bangang de Ku taloakon: komiu iwi-iwi' tionyo po'ule' ohampeakon.

⁸ Mombun lumap pa' moya na nu kahanda'i; ohongonto na onyi'nyo, panyo madi' osumbu'to pa' iyamae na pinolengkatannyo, ka' pa' moya na kalambanannyo. Sumo aijo'mo na anu ohampeakon nu Roh nu Tumpu.”

⁹ “Mosia na anu sumo aijo' timbali?” pinokilawa i Nikodemus.

¹⁰ I Yesus nontaami, “Beleyum gulu' nu Israel; ka' kadaka' madi' nusumbu'?

¹¹ Palesayamo: kami monsisik ola apaa na anu osumbu' mami, ka' kami timbali sakisi ola apaa na anu tinoamo mami; panyo komiu madi' mongka'oho' montalima anu sinakisian mami.

¹² Komiu madi' palesaya de aku monsisikakon hi komiu mongkona hahan anu i dunia aiya; mosia na komiu timbali palesaya, de aku monsisikakon hi komiu hahan mongkona suluga'?

¹³ Ma'isa toho' ko samian pe'e anu noliba'mo i suluga', ola ahi' Ia anu nintatau' i Dunia aijo'mo Anak nu Mian.

¹⁴ Susumo i Musa noliba'akon ulo tambaga i sangkau na kau' bololang i padang bolaa, sumo aitu mule' Anak nu Mian tionyo oliba'akon,

¹⁵ da iwi-iwi' na mian anu palesaya hi Ia mohumpak kantumuu'an talakana' ka' toka sidu-sidutu'.”

¹⁶ Kalana sumo aitu na Tumpu mongkalibosi mian i dunia aiya, sahingga Ia nombee' Anak-Nyo samba-sambatunyo da ihehe na mian anu palesaya hi Ia madi' mohumpak ka'idekan, panyo mohumpak kantumuu'an talakana' ka' sampe toka sidu-sidutu'.

¹⁷ Kalana Tumpu nompokau mae Anak-Nyo misa' da mohukum dunia aiya, panyo da momposalamat.

¹⁸ Mian anu palesaya hi Ia madi' o hukum. Panyo anu madi' palesaya polo'mo i hukum nu Tumpu, kalana ia madi' palesaya hi Anak nu Tumpu anu sa'a-sa'angu'nyo.

¹⁹ Ia otuntut kalana han aiya: Jingka aijo' tinokamo i dunia, panyo mian madi' mongka'ima'i jingka, ola lebe mongka'ima'i pintung kalana apaa na anu nubau nu aha ma'idek.

²⁰ Batu-batu mian anu mombau anu ma'idek, mongka'ideki jingka; ia madi' mongka'oho' toka i jingka, da anu ma'idek nunu bau nu aha boli kantoan.

²¹ Panyo mian anu mombau pongka'oho' nu Tumpu, toka i jingka da kantoan apaa na anu binaunyo memang mombatuki pongka'oho' nu Tumpu.

I Yesus tiba i Yohanes anu Mompalamandikan

²² Lapas aijo' i Yesus tiba anu saja' mombatuki Ia nambamo i Yudea. Ia jinojoong mae kiijo' tino pia-piam pahu na kopinnyo tiba aha ka' nompalamandikan.

^23-24 Tempo'nyo aitu i Yohanes ma'isa ninsoop i talungku'. Ia nompalamandikan i lipu' Ainon, madi' majo'on lengkat i Salim, kalana i kiijo' mae manjoo' na uee. To mia-mian tinoka hi ia, ka' pinalamandikannyo na aha.

²⁵ Toto sangga'at anu saja' mombatuki Yohanes, nontampu'unimo pinainggaga tiba mian nu Yahudi mongkona atulan nu mompobelesi' butong.

²⁶ Aha namba hi Yohanes ka' notatae, “Kita Tuumangku Gulu', ugaat daagi' osumbu' nu kita Tuuma na mian anu nojajalan tiba kita Tuuma i santoa nu Kaunyo Yordan aijo', anu pipinotiju' nu kita Tuuma hi kami u'utu mae? Ia tempo' uuka singkona mompalamandikan ka' iwi-iwi' na mian namba hi Ia!”

²⁷ I Yohanes nontaami, “Mian madi' moko ala montumpui apa-apaa, de madi' nubee' nu Tumpu hi ia.

²⁸ Posi komiu nohongomo aku notatae, ‘Aku misa' Tomundo anu Momposalamat. Aku sinai mamba momona, Ia imihije.’

²⁹ Boting boune tumpunyo boting mo'ane. Bela' nu boting mo'ane aijo' ola tuminjo monsangalui ka' mohongo, ka' ia sanang de mohongo potatae nu boting mo'ane. Sumo aitumo na aku. Uuka aku sanang hondo.

³⁰ Ia na anu tionyo mompaka penting, ka' aku na anu komadi-madi'nyomo penting.”

Ia na anu tinoka lengkat mae i suluga'

³¹ Anu toka lengkat mae kiita' i bawo molingkudui iwi-iwi'. Anu toka lengkat mae i dunia minsoop mian nu dunia, ka' motatae mongkona hahan nu dunia. Ia anu toka lengkat mae kiita' i bawo molingkudui iwi-iwi'.

³² Ia notatae mongkona apaa na anu tinoamo ka' anu ihongo-Nyomo, panyo madi' ko samian pe'e palesaya hi anu sinakisian-Nyomo.

³³ Mian anu palesaya hi anu sinakisian-Nyomo aijo', mongakui saba' Tumpu aijo' totu'u.

³⁴ Kalana mian anu sinai nu Tumpu mompotokakon potatae nu Tumpu, kalana Roh nu Tumpu binee'mo hi Ia iwi-iwi'.

³⁵ Tuuma mongkalibosi Anak-Nyo, ka' nombee'mo iwi-iwi' na kuasa hi Ia.

³⁶ Mian anu palesaya hi Anak aijo' tionyo mohumpak kantumuu'an talakana' ka' toka sidu-sidutu'. Panyo mian anu madi' montapali Anak aijo', madi' mohumpak kantumuu'an. Ia ohukum nu Tumpu sidu-sidutu'.