YOHANES 20 - KITAB NU TUMPU ALLA LELE MA'IMAI'

Lamunan i longkangmo

¹ Subu-subu i sinaa nu duminggu daagi' pintung, i Maria Magdalena namba i pinolamunan. Tinoanyo na batu pinongkulubi tinondedensu'mo lengkat i bolo' nu pinolamunan aijo'.

² Sahingga ia nopadeka' nolio i Simon Petrus ka' anu saja' mombatuki nunu kalibosi Yesus, ka' notatae hi aha, “Tumpu ingalamo aijo' mae i pinolamunan, madi' kusumbu' pa' iya na pinonguna'an-Nyo.”

³ Lantas i Petrus ka' sangga'at anu saja' mombatuki aijo' nambamo i pinolamunan.

⁴ Ua-ua'aha nopadeka', panyo sangga'at anu saja' mombatuki aijo' na lebe nalia' noliu-liu i Petrus, ia na tinoka momona i pinolamunan.

⁵ Ia nolenga nokaiyong i uno nu pinolamunan, nontoa hude pinonsaput timpa-timpas i kiijo', panyo ia madi' ninsoop.

⁶ I Simon Petrus nontuloi' lengkat mae mihi, lantas lau-laus ninsoop i uno nu pinolamunan aijo'. Tinoanyo na hude pinonsaput timpa-timpas i kiijo'.

⁷ Panyo hude anu pinosegot i ubak i Yesus madi'mo ko anu kiijo' oha-ohani, panyo kumu-kumun nanintademo.

⁸ Lapas aijo' anu saja' mombatuki tino-tinoka tinongkoi moona i pinolamunan ninsoop suele. Ia nontoa ka' pinalesayamo. (

⁹ Sangkutnyo tinoka tempo' aitu aha ma'isa nonsumbu' pa' apaa na anu tinulis i uno nu Kitab nu Tumpu tukoonyo Ia tionyo silaka, panyo po'ule' opotumuu'.)

¹⁰ Lapas aitu anu saja' mombatuki Yesus aijo' ninsusule'mo.

I Yesus nompotoa butong-Nyo hi Maria Magdalena

¹¹ I Maria Magdalena tinuminjo i ahop nu pinolamunan ka' i humaang. Hau-haunyo humaang ia nolenga nokaiyong i pinolamunan.

¹² Lantas nontoa ua'aha na malaikat nibaju' mopute'. Aha aijo' sinumuhang i tampat anu pinonguna'an bangke' i Yesus samian sasu ubak, ka' sangga'atnyo i sasu tengke.

¹³ To mala-malaikat haha aijo' nompokilawa, “Kita Tina, kadaka' humaang?” I Maria nontaami, “Tumpungku ingalamo, ka' madi' ku sumbu' pa' iya na pinonguna'an Ia.”

¹⁴ Noko potatae sumo aijo', ia nosiloi i hiku ka' nontoa i Yesus tinuminjo i kiijo'. Panyo madi' sinumbu'nyo taalu' aijo' i Yesus.

¹⁵ I Yesus nompokilawa hi ia, “Kita Tina, kadaka' humaang? Kita Tina molio ihe?” I Maria nonsangka aijo' topo bau ale', sahingga ia notatae, “Kita Tuuma, de kita Tuuma na nolalin Ia lengkat i aiya, tulungi poto'iakon mae hi belengku iya na pinonguna'an nu Kita Tuuma Ia, da ku ala na ia.”

¹⁶ I Yesus notatae hi ia, “Maria!” I Maria nosiloi hi Yesus, lantas notatae i sisik nu Ibrani, “Rabuni!” (Alati'nyo “Gulu'”.)

¹⁷ “Boli o toongi na Aku,” koonyo i Yesus hi ia, “kalana Aku ma'isa noliba' namba hi Tuuma. Panyo lako'mo hi to utu-utus-Ku, ka' poto'iakon hi aha, taalu' uuka aiya Aku moliba'mo mamba hi Tuumang-Ku, ka' Tuumaum Tumpung-Ku, ka' Tumpuum.”

¹⁸ Sahingga i Maria namba nompoto'i hi anu saja' mombatuki Yesus, tukoonyo ia nontoamo i Tumpu, tiba mule' i Tumpu nontaloakonmo iwi-iwi' aijo' hi ia.

I Yesus nompotoa butong-Nyo hi anu saja' mombatuki Ia

¹⁹ Sinaa nu duminggu suele aijo' salatan i nalomo, anu saja' mombatuki Yesus sinilimu'mo i sa'angu' na laigan, panyo tumban kaho kinunsi, kalana aha mabuhuk hi anu mongkuasai Yahudi. Monti-montiik i Yesus tinokamo ka' tinuminjo i pohintonga'an nu aha ka' notatae, “Tabea', kasalamatan tinokamo hi komiu.”

²⁰ Noko potatae sumo aijo', Ia nompotoa hi aha lima ka' sihung-Nyo. Tempo'nyo nontoa i Tumpu, aha ilame'mo hondo.

²¹ Lantas i Yesus po'ule' notatae hi aha, “Tabea' kasalamatan tinokamo hi komiu. Sumo i Tuuma nonsai mae Aku, sumo aitu suele na aku monsai komiu.”

²² Lantas Ia nompuuhakon sawo-Nyo hi aha ka' notatae, “Talimamo na Roh nu Tumpu.

²³ De komiu mongampuni dosa' nu toto samian, Tumpu suele mongampuni ia. De komiu madi' mongampuni dosa' nu toto samian, Tumpu suele madi' mongampuni ia.”

I Yesus ka' i Tomas

²⁴ I Tomas, (anu osanggohi “Hapi”), sala'samian anu sampu-sampulu' ka' ohua' na anu saja' mombatuki Yesus, madi' kino ianyo hingga-hinggat tiba sangga'at tempo'nyo i Yesus tinoka.

²⁵ Sahingga anu saja' mombatuki Yesus sangga'at notatae hi Tomas, “Kami nontoamo i Tumpu!” Panyo i Tomas nontaami, “De ma'isa ku toa na pinompaku'an lima-Nyo, ma'isa ku susukakon na bua' nu limangku i anu bine-binelan nu paku aijo', ka' ma'isa ku susuk nu limangku na sihung-Nyo, madi' hondo aku mongka'oho' palesaya.”

²⁶ Ilapas sinaduminggu anu saja' mombatuki Yesus po'ule' mule' nokiijo' i tampat aitu, ka' kino i Tomasmo. Iwi-iwi' na tumban ginunsing. Panyo i Yesus tinoka ka' tinuminjo i totonga' nu aha lantas notatae, “Tabea' kasalamatan tinokamo hi komiu.”

²⁷ Lapas aijo' koo-Nyo i Yesus hi Tomas, “Toa na limang-Ku, ka' posusuk na bua' nu limaum i aiya. Tajuakon mae na limaum ka' posusuk i sihung-Ku. Boli daagi' bata-bata, panyo palesayamo!”

²⁸ I Tomas notatae hi Yesus, “Tumpungku ka' Tumpu Allah-ngku!”

²⁹ Sahingga i Yesus notatae hi ia, “Te misa' o beleyum palesayamo kalana nontoamo Aku? Higahi na mian anu palesaya mau mule' madi' montoa Aku.”

Kahanda' nu kitab aiya

³⁰ Daagi' manjoo' na anu okabangangi sangga'at, anu binaumo i Yesus i ahop nu anu saja' mombatuki Ia, panyo madi' tinulis i uno nu Kitab aiya.

³¹ Panyo iwi-iwi' aiya tinulis, da komiu palesaya taalu' i Yesus aijo' Tomundo anu Momposalamat, Anak nu Tumpu, ka' kalana palesaya hi Ia, komiu mohumpakmo kantumuu'an.