YOHANES 19 - KITAB NU TUMPU ALLA LELE MA'IMAI'

¹ Lapas aijo' i Pilatus ninsoop lantas nompokau mian nompohos i Yesus.

² To sulu-suludadu nomboa sa'angu' na makota kandang anu kohii'nyo, lantas nomposoku' aita' i ubak i Yesus. Lapas aijo' aha nompopusokmo hi Ia juba' buhitnyo mingkamumu',

³ lantas saja'mo aha nokiijo' hi Ia motatae, “Higahi na tomundo mian nu Yahudi.” Lapas aijo' nuhapa-hapa'mo nu aha na Ia.

⁴ Lapas aijo' i Pilatus po'ule' mule' nosabat ka' notatae hi mian da'isan aijo', “Toa! Aku nonsabatakonmo i sambiha'-Nyo hi komiu, da osumbu' miu aku madi' nohumpak sa'angu' pe'e na kasala'an hi Ia.”

⁵ Lantas i Yesus nosabat soku-soku na makota ko hii'nyo ka' juba' kamumu'. I Pilatus notatae hi aha, “Toa na mian aiya.”

⁶ Salatan to kapa-kapala nu imam, ka' ponjaga-ponjaga aijo' nontoa i Yesus, aha noloboo'mo, “Salibmo na Ia! Salibmo na Ia!” I Pilatus notatae hi aha, “Ala na Ia, ka' komiumo na mosi salib, aku madi' nohumpak sa'angu' pe'e na kasala'an hi Ia.”

⁷ To mia-mian nu Yahudi aijo' nontaami, “De pongka'oho' nu atulan mami, Ia tionyo o hukum mate, kalana Ia mangaku butong-Nyo Anak nu Tumpu.”

⁸ Salatan i Pilatus nohongo potatae nu aha sumo aijo', ia nompaka pabuhukmo mule'.

⁹ Sahingga ia po'ule' ninsoop i laigan daka', ka' salatan i Yesus pinosoopmo, i Pilatus nompokilawamo hi Ia, “Beleyum nolengkat mae iya?” Panyo i Yesus madi' nontaami.

¹⁰ Sahingga i Pilatus po'ule' notatae, “Beleyum madi' mongka'oho' motatae hi belengku? Da osumbu' aku ko kuasa mompobebas Beleyum ka' kuasa monsalib Beleyum!”

¹¹ I Yesus nontaami, “De Tumpu madi' nombee' kuasa aijo' hi beleyum, beleyum madi' hondo moko kuasai beleng-Ku. Mokonyo aitu mian anu nomboa mae Aku hi beleyum, lebe daka' na dosa'nyo molabii beleyum.”

¹² Salatan i Pilatus nohongomo aijo', ia nompai usahakonmo da o polapasmo na i Yesus. Panyo to mia-mian nu Yahudi nolo-noloboo'mo, “De Kita Tuan mompobebas Ia, Kita Tuan misa' sangalu i Kaisar! Mian anu mangaku butongnyo tomundo, ia bali' i Kaisar!”

¹³ Salatan i Pilatus nohongo potatae haha aijo', ia nomboamo i Yesus nosabat, lantas sinumuhangmo i kadela pomputusian palakala i tampat sanggonyo Salo Batu. (I uno nu sisik nu Ibrani sanggonyo Gabata.)

¹⁴ Tempo'nyo aitu malia'mo sonsu'un na sinaa, ma'isa pe'e Sinaa Daka' nu Paskah. I Pilatus notatae hi to mia-mian haha aijo', “Aiyamo na tomundo miu!”

¹⁵ Aha nolo-noloboo'mo, “Pateimo na Ia! Pateimo na Ia! Salibmo na Ia!” I Pilatus nompokilawa, “Tionyo ku salibmo na tomundo miu?” To kapa-kapala nu imam nontaami, “Samata-mata i Kaisar na tomundo mami!”

¹⁶ Lantas i Pilatus nombee' i Yesus hi aha da o salibmo. Aha nongala i Yesus, lantas nambamo nomboa Ia.

I Yesus sinalibmo

¹⁷ I Yesus nosabat nosi simbu salib-Nyo nokiita' i tampat sanggonyo, “Tampat nu Popoke'.” (I uno nu sisik nu Ibrani o sanggohi Golgota.)

¹⁸ I kiita' mae na Ia sinalib. Hingga-hinggat tiba Ia daagi' ko ua'aha na mian sangga'at sinalib; samian i sasu kowi, ka' samian i sasu koanan, ka' i Yesus i totonga'nyo.

¹⁹ I kau' salib i Yesus, i Pilatus nompokau mompokona tulisan aiya: “Yesus lengkat mae i Nazaret, Tomundo Mian nu Yahudi.”

²⁰ Da'isan na mian nu Yahudi nombasa'mo tulisan aijo', kalana tampat i Yesus aijo' sinalib madi' majo'on lengkat i kota. Tulisan aijo' tinulis nu sisik nu Ibrani, Latin, tiba Yunani.

²¹ To kapa-kapala nu imam notatae hi Pilatus, “Boli montulis ‘Tomundo nu Mian Yahudi’, panyo o tulis, ‘Mian aiya notatae, Aku Tomundo nu Mian Yahudi.’ ”

²² Panyo i Pilatus nontaami, “Anu tinuliskumo, tataap o potulis.”

²³ Ilapas na suludadu haha aijo' nonsalib i Yesus, aha nongalamo baju'-Nyo. Baju'nyo aijo' binagi opat: toto samian nohumpak sambahagian. Aha nongala mule' juba'-Nyo. Juba' aijo' madi' ko ka'utannyo – tinonun lengkat mae bawo toka-toka i aluknyo.

²⁴ To sulu-suludadu notatae hi samian ka' samian, “Boli o botu-botu'to na juba' aiya. Imbo' da o bagi mompake onde, bau pompotantu ihe na timbali mohumpak.” Han aijo' sinumo aitu da timbali apaa na anu tinulismo i uno nu Kitab nu Tumpu aijo'mo: “Aha mombagi-bagi baju'-Ku, ka' nompake onde na nombagi juba'-Ku.” Ka' memang suludadu haha aijo' nombaumo sumo aijo'.

²⁵ Koko salib i Yesus, tinuminjomo na tina i Yesus, utus boune nu tina-Nyo, ka' i Maria bengkele' i Klopas, tiba i Maria Magdalena.

²⁶ Salatan i Yesus nontoa tina-Nyo tiba anu saja' mombatuki nu Nu kalibosi tinjo-tinjo i kiijo', Ia notataemo hi tina-Nyo, “Kita Tina, aijo' na anak nu Kita Tina.”

²⁷ Lapas aijo' i Yesus notataemo hi anu saja' mombatuki Ia aijo', “Aijo' tinaum.” Nolengkat pe'e i aijo' anu saja' mombatuki aijo' nompoboamo tina i Yesus da jojoongmo i laigannyo.

I Yesus sinilakamo

²⁸ Sinumbu'mo i Yesus uuka aiya iwi-iwi' ilapasmo, ka' da apaa na tinulismo i uno nu Kitab nu Tumpu aijo' sidamo, Ia notataemo, “Aku negotmo.”

²⁹ I kiijo' daagi' ko sa'angu' na mangko' ingisian nu uee nu anggur nobuke' panyo malosing. Lantas sa'angu' na bunga karang i lobong i uno nu uee anggur aijo', ka' sinusukakon i sangkolong na hisop,

³⁰ I Yesus nontumi' uee nu anggur aijo' lantas notataemo, “I lapasmo!” Balo Ia tinompalupek na ubak-Nyo ka' sinilaka.

I Yesus sinusuk nu talombo'

³¹ Anu mongkuasai Yahudi madi' mongka'oho' bangke' nu to mia-mian mate anu sinalib aijo' tataap kala-kalayo' i kau' salib i Sinaa nu Sabat, pakalaus uuka aiya Sabat aijo' Sinaa Daka' anu samata-mata aijo' na anu o lame'akon. Kalana i Yesus sinalib kinona ma'isa pe'e Sinaa nu Sabat aijo', to mia-mian nu Yahudi nomoita hi Pilatus da opobee' mompato'akon tengke nu aha anu sinalibmo ka' montau'akon bangke'nyo haha aijo' i kau' salib.

³² Lantas suludadu haha aijo' inamba ka' nompato'i lebe i moona tengke nu ua'aha anu sinalib hingga-hinggat i Yesus.

³³ Salatan aha tinokamo hi Yesus, tinoa nu aha Ia i natemo. Sahingga aha madi'mo nompato'i tengke-Nyo.

³⁴ Panyo sihung i Yesus sinusuk nu talombo' nu sala'samian suludadu haha aijo'; balo nosabat na baso' tiba uee.

³⁵ Mian anu nositoa bauon aijo', iamo na nompoto'i han aijo' da komiu suele palesaya. Ka' anu sinakisiannyo aijo' totu'u, ka' nu sumbu' saba' aijo' memang totu'u.

³⁶ Han aijo' timbali da sampa' na anu tinulis i uno nu Kitab nu Tumpu, aijo'mo “Madi' ko sa'angu' pe'e na buku-Nyo na o pato'akon.”

³⁷ I uno nu Kitab nu Tumpu tinulis, “Aha montanggalakonje Ia anu sisinusuk nu aha.”

I Yesus ilamunmo

³⁸ Lapas aijo' i Yusuf lengkat mae i Arimatea nomoita de timbali hi Pilatus, da mongala bangke' i Yesus. (I Yusuf anu aja' mombatuki Yesus, panyo matikohowini kalana ia mabuhuk hi anu mongkuasai Yahudi.) I Pilatus nompobee' ia, jadi ia namba nongala bangke' i Yesus.

³⁹ I Nikodemus anu toho' tinoka u'utu mae hi Yesus pihi-pihi, namba suele hingga-hinggat tiba i Yusuf. I Nikodemus nomboa lampa-lampa te mur tiba gaharu – iwi-iwi' kila-kila tolumpulu' na kilogram na konjoo'nyo.

⁴⁰ Ua-ua'aha na mian aijo' nongala bangke' i Yesus ka' sinaputnyo na butong-Nyo nu hude ponsaput tiba lampa-lampa manohong aijo' sumo adat molamun nu aha mian Yahudi.

⁴¹ Tampat i Yesus sinalib aijo' daagi' ko sa'angu' na tampat sinu'anan kau' ka' bunga-bunga lewa' basanangan. I uno nu tampat basanangan aijo' daagi' ko sa'angu' na polamunan bu'ou anu ma'isa toho' pinolamunan mian.

⁴² Kalana lamunan aijo' ohani ka' sinaa nu Sabat malia'mo montampu'uni, ilamunmo nu aha na i Yesus i kiijo'.