YOHANES 16 - KITAB NU TUMPU ALLA LELE MA'IMAI'

¹ Iwi-iwi' aijo' Ku sisikakon hi komiu, da komiu boli tolo ule' i kapalesaya'an.

² Komiu osabatakon i laigan anu saja-saja' pogalejaan. Ka' tokaje na tempo'nyo saba' mian anu mompatei komiu tukoonyo ia mombau anu nu palentahkon nu Tumpu.

³ Aha mombau sumo aijo' hi komiu kalana aha ma'isa monsumbu' Tuuma tiba suele Aku.

⁴ Panyo uuka-Ku taloakon na aijo' hi belemiu, da de aijo' saidi' mae timbalimo, komiu tonginau'mo saba' polo'mo pinoto'ingku hi komiu.” “Han aiya madi' pinoto'ing-Ku hi komiu imoonanyo pe'e, kalana Aku daagi' saja' mo'imboa ka' komiu.

Kalaja nu Roh nu Tumpu

⁵ Panyo u'uka Aku mambamo hi Ia anu nonsai mae Aku; ka' madi' ko samian pe'e anu atina' hi komiu na mompokilawa moya na kalambanan-Ku.

⁶ Uuka ola o kinyonyoaum timbalimo susa' kalana Aku nontaloakonmo aijo' hi beleyum.

⁷ Panyo Aku montaloakon anu totu'u hi beleyum: Da bau ka'ima'an nu belemiu, lebe ma'ima' Aku mamba; kalana de Aku madi' mamba, Pontulungi aijo' madi' koko toka hi belemiu. Panyo de aku mambamo kusaije mae na Ia hi beleyum.

⁸ De Ia tokamo Nu ponyata'je i dunia na pangalati'an nu dosa' anu sahondo-hondonyo, ka'pohukum nu Tumpu.

⁹ Nu ponyata'je tukoonyo de madi' palesaya hi beleng-Ku aijo' dosa';

¹⁰ saba' Aku totu'u, kalana Aku mambamo hi Tuuma, ka' komiu madi'mo daagi' nontoa Aku mule';

¹¹ ka' Tumpu momtampu'unimo mohukum, kalana anu mongkuasai dunia aiya i hukummo.

¹² Daagi' manjoo' na anu ka'oho' Ku taloakon hi beleyum, panyo uuka aiya komiu ma'isa moko ala montalima.

¹³ Panyo de Roh aijo' tokamo, aijo'mo Ia na momponyata' katotu'uan mongkona Tumpu, komiu nu potiju'je da monsumbu' iwi-iwi' anu totu'u. Ia madi' monsisik posi butong-Nyo, panyo montaeakon apaa na anu i hongo-Nyomo, ka' nu poto'ije hi komiu apaa na anu timbali i sinaimihi mae.

¹⁴ Ia na mompopodaka' Aku, kalana apaa na anu Nu potoka hi komiu, tinalima-Nyo lengkat hi beleng-Ku.

¹⁵ Iwi-iwi' anu daagi' hi Tuuma, aijo' anung-Ku. Mokonyo aijo', Aku motatae, apaa na anu nupotoka nu Roh hi komiu, tinalima-Nyo lengkat hi beleng-Ku.”

Kasusa'an ka' kalame'an

¹⁶ “Me sasaingoni' komiu madi'mo daagi' montoa Aku. Ka' mule' me sasaingoni komiu po'ule'je montoa Aku.”

¹⁷ To pia-piangkuka na anu saja' mombatuki Yesus nontampu' unimo mompaha poki-pokilawa hi samian ka' samian, “Pa' mosia na koonyo, Ia notatae hi kita: ‘Me sasaingoni' komiu madi'mo daagi' montoa Aku, ka' mule' me sasaingoni' komiu po'ule'je montoa Aku’? Pa' mosia mule' na koonyo: ‘Aku mamba hi Tuuma’?”

¹⁸ Saja'mo pino ileekan nu aha, “Apaa na alati'nyo nu potatae, ‘me sasaingoni'’? Kita madi' monsumbu' pa' apaa na tinaloakon-Nyo!”

¹⁹ Nusumbu' i Yesus na aha kahanda'mo mompokilawa hi Ia. Jadi Ia notatae, “Uuka tinaloakon-Ku, ‘Me sasaingoni' komiu madi'mo montoa Aku, ka' mule' me sasaingoni' komiu po'ule'je montoa Aku.’ Aijo'mo na lewa' opo ileeki' nu bubuu' komiu?

²⁰ Palesayamo, komiu humaangje ka' montando'i, panyo dunia ola lame'. Komiu susa' na kinyonyoa, panyo kasusa'anum aijo' timbalije kalame'an.

²¹ De samian na boune ohanimo na mohampeakon, ia susa' kalana tempo'nyomo na ia mongoa'i sansala. Panyo salatan anaknyo i hampemo, nukolilimimo nu boune aijo' na sansala anu ingoa'annyo, kalana lame' samian na bungamea' i hampemo i dunia.

²² Sumo aitu mule' na komiu: Uuka komiu susa' na kinyonyoa, panyo Aku singkabotje mule' tiba komiu, sahingga kinyonyoaum po'ule'je lame'; ka' madi' ko samian pe'e na moko ala kalame'an aijo' i kinyonyoaum.

²³ I sinaa aitu, komiu madi'mo daagi' mompokilawa apa-apaa hi beleng-Ku. Palesayamo: Mau mule' apaa na opoita miu hi Tuuma de momboa sanggong-Ku, aijo' nubee' nu Tuuma hi beleyum.

²⁴ Sampe tempo' uuka komiu ma'isa toho' nompoita apa-apaa momboa sanggong-Ku. Poitamo, komiu tionyo mohumpak, da kalame'an miu ma'ima'.”

Ka'untungan i dunia

²⁵ “Iwi-iwi' aiya Ku taloakon hi beleyum nu ande-andeon. Panyo tokaje mae na tempo'nyo Aku madi'mo daagi' mompake ande-andeon, panyo osisikmo nasa-nasa hi beleyum mongkona Tuuma.

²⁶ Tempo'je aitu na komiu mompoita hi Tuuma momboa sanggong-Ku; da osumbu', Aku madi'mo mompoita hi Tuuma bau kapalaluan miu.

²⁷ Kalana posimo Tuuma na mongkalibosi komiu. Ia mongkalibosi komiu, kalana komiu mongkalibosi Aku, ka' palesaya saba' Aku lengkat mae hi Tumpu.

²⁸ Memang Aku nolengkat mae hi Tuuma, ka' tinokamo i uno nu dunia. Panyo uuka Ku pala'imo na dunia minsusule'mo hi Tuuma.”

²⁹ Lantas anu saja' mombatuki Yesus notatae hi Ia, “Uuka Tumpu basisik nu ponasamo, ka' madi'mo mombau ande-andeon,

³⁰ ka' osumbu' mami te Tumpu monsumbu' iwi-iwi'. Madi' pilenje samian mompokilawa apa-apaa hi Tumpu. Kalana aijo' opalesaya mami Tumpu nolengkat mae hi Tumpu.”

³¹ I Yesus nontaami, aha, “Jadi palesayamo na komiu uuka?

³² O'inau'! Tempo'nyo tokaje mae, aitu pe'e tinokamo, komiu oposungkehetmo. Komiu minsusule' i posi laigan ka' mompala'i Aku sausa'. Panyo Aku madi' posi sausa', kalana Tuuma na mosangalu ka' Aku.

³³ Iwi-iwi' aiya Ku taloakon da komiu mohumpak ka' ima'an, kalana mosa'angu' tiba Aku. I dunia komiu sansala, panyo potataap na kinyonyoa miu! Ihungku'ankumo na dunia!”