YOHANES 12 - KITAB NU TUMPU ALLA LELE MA'IMAI'

I Yesus dinudu'an nu minya-minya' manohong i Betania

¹ Daagi' anon sinaa tokaje na Sinaa Daka' Lamean nu Paskah i Yesus nambamo i Betania. I kiijo' mae jinojoong na i Lazarus anu sini-sinilakamo po'ule' pinotumuu' i Yesus.

² Kiijo' mae i Yesus pinokaan nu aha, i Marta na nongatuni. I Lazarus tiba anu pinasoo sinumuhang nongkaan hingga-hinggat tiba i Yesus.

³ Lapas aitu i Maria nomboa mae kila-kila mintonga' na liter minya-minya' manohong narwastu, lampa-lampa anu manohong na binau ka' mahan hondo na olinyo. Ia nondudu'akon minya-minya' aijo' i tengke i Yesus, ka' sinapuannyo nu ubaknyo. Sinongko nu nohong na laigan aijo', kalana minya-minya' aijo'.

⁴ Panyo i Yudas Iskariot, sala'samian anu saja' mombatuki Yesus – anu saidi' mae nonggeguani Ia – notatae,

⁵ “Kadaka' minya-minya' manohongo aijo' madi' sahanyo pinobaluk, olinyo tolu'atu na doi salaka, ka' doinyo binee' hi mian kasiasi?”

⁶ I Yudas notatae sumo aijo' misa' kalana monginau' mian kasiasi, panyo kalana ia pambuling. Ia toto minsan mongala doi anu olimu' nu aha ka' o'una' hi ia.

⁷ Panyo i Yesus notatae, “Pobee' na boune aijo'! Ia mombau aiya baumo sinaa poliwangi Aku.

⁸ Mian kasiasi saja' aiya hi komiu, panyo Aku madi'.”

Posa'angu'an mongewa i Lazarus

⁹ Da'isan na mian nu Yahudi anu nohongo taalu' i Yesus kiijo' i Betania, sahingga aha namba nokiijo'. Aha namba misa' ola kalana i Yesus, panyo mule' kalana aha kahanda' montoa i Lazarus anu sini-sinilakamo po'ule'mo pinotumuu'.

¹⁰ Aijo' na sababnyo to kapala-kapala nu imam kahanda' mompatei i Lazarus suele.

¹¹ Kalana ia na nonsabapi da'isan na mian nu Yahudi nosabatmo hi aha ka' nompalesaya i Yesus.

Pinopodaka' na i Yesus ninsoop i Yerusalem

¹² Dodododopnyo mian da'isan anu tinokamo molame'akon Paskah nohongo i Yesus hau-haunyo utumae laja-lajang mokiijo'mo i Yerusalem.

¹³ Aha nongala te hoon nu palem ka' namba nolabot Ia, baloo nontaligalai, “Puji'mo na Tumpu! Balakatiakon na ia anu toka momboa sanggo nu Tumpu. Balakatiakon na Tomundo' nu Israel!”

¹⁴ I Yesus nohumpak sa'angu' na keledai bata'nyo, ka' sinake'annyo. Sahingga tinimbalimo na anu tinulis i uno nu Kitab nu Tumpu:

¹⁵ “Boli mabuhuk, langkoyang nu Sion! Toa na Tomundo'um tinokamo, monsake'i sa'angu' na keledai bata'nyo!”

¹⁶ Tempo'nyo aitu anu mombatuki Yesus ma'isa nonsumbu' iwi-iwi' aijo'. Panyo salatan i Yesus pinopodaka'mo i kasilakaan-Nyo, atina'je na aha tinonginau' taalu' anu binau nu to mia-mian hi Ia, tinulismo i uno nu Kitab nu Tumpu mongkona Ia.

¹⁷ To mia-mian anu tinoka tempo'nyo i Yesus nolaga i Lazarus posabat mae lengkat i lamunan ka' po'ule' nompotumuu' lengkat i kasilakaan, baloo nombee'i katalangan mongkona han aijo'.

¹⁸ Aijo' na sababnyo mian da'isan aijo' namba hi Yesus, kalana aha nohongo taalu' Iamo na nombau anu okabangangi aijo'.

¹⁹ Sahingga to mia-mian Farisi notatae samian ka' samian, “Kita madi' moko ala mombau apa-apaa! Toamo ahi', songko-songko na dunia mamba mombatuki Ia!”

To pia-piangkuka na mian nu Yunani noliomo i Yesus

²⁰ To mia-mian anu namba nokiijo' i Yerusalem mogaleja tempo'nyo nu lamean aijo', daagi' ko to pia-piangkuka mian nu Yunani.

²¹ Aha tinoka hi Filipus ka' notatae, “Kita utus, de timbali kami mongka'oho' singkabot tiba i Yesus.” (I Filipus nolengkat mae i Betsaida i Galilea.)

²² Atina' ka' i Filipus namba nompoto'i hi Andreas, ka' ilapas aitu ua-ua'aha nompotokakonmo hi Yesus.

²³ I Yesus notatae hi aha, “Tempo'nyomo Anak nu Mian opopodaka'.

²⁴ Totu'u hondo na potataeng-Ku aiya: De sambatu na gandum madi' o tugan i uno nu tano' ka' mate, ia tataap samba-sambatunyo. Panyo de batu nu gandum aijo' mate, atina'je ka' mohasinakon manjoo' na gandum.

²⁵ Mian anu mongkalibosi kantumuu'annyo, saidi' mae molapus na kantumuu'annyo. Panyo mian anu mongka'ideki kantumuu'annyo i dunia aiya, tionyo mompokopiani da tumuu' kopian ka' da' toka sidu-sidutu'.

²⁶ Mian anu mongka'oho' mohongo Aku, tionyo mombatuki Aku; da posaihon-Ku mo'imboa ka' Aku i tampat kajojoongan-Ku. Mian anu mohongo Aku, nu angga'i nu Tuumang-Ku.”

I Yesus nonsisikakonmo kasilakaan-Nyo

²⁷ “Kinyonyoang-Ku meat; apaa na anu tionyo Ku taloakon uuka? Pa' tionyo Ku taloakon, ‘Tuuma, opimpaliakon na Aku uuka aiya?’ Panyo kalana da mongoa'i sakisa aiya, mokonyo aitu Aku tinoka.

²⁸ Tuuma popodaka' na sanggon-To!” Lantas i hongo na potatae lengkat i langit nontaloakon, “Pinopodaka'-Kumo, na sanggo-Nyo ka' po'ule'je Ku popodaka' na Ia.”

²⁹ Mian da'isan anu i kiijo' nohongo potatae aijo'. Aha nontaloakon, “Aijo' gohung!” Panyo daagi' mule' ko anu notatae, “Misa'! Malaekat na notatae hi Ia!”

³⁰ Lantas i Yesus notatae hi aha, “Potatae aijo' i hongo, misa' ola da bau kapentingan-Ku, panyo da bau kapentingan miu.

³¹ Uuka aiya tempo'nyomo na dunia oputusi na palakalanyo; uuka aiya anu mongkuasai dunia aiya otua'akonmo.

³² Panyo Aku aiya, de Aku ohangkatmo tangka-tangkas i bawo nu dunia aiya, aha iwi-iwi' na mian Ku pahaboamo hi beleng-Ku.”

³³ Ia nontaloakon sumo aitu mompotiju' mosia na balu-balu'nyo de Ia silakamo.

³⁴ Mian da'isan aijo' notatae hi Ia, “De koonyo nu Kitab nu Atulan mami, Tomundo' anu Momposalamat tumuu' sidu-sidutu'. Mosia ka' Beleyum timbali montaloakon Anak nu Mian tionyo ohangkat tangka-tangkas i bawo nu dunia? Ihe na Anak nu Mian aijo'?”

³⁵ I Yesus nontaami, “Ola sasaingoni' na jingka aijo' daagi' aiya hi komiu. Jadi, lajangmo da tempo' u'uka komiu daagi' ko jingka, da komiu boli nukona nu kapintungan. Mian anu lumajang i uno nu pintung, madi' nusumbu' pa' iyana kalambanannyo.

³⁶ Palesayamo i jingka aijo', de jingka aijo' hau-haunyo daagi' hi belemiu, o usahakon da komiu timbali ana-anak nu jingka.” Noko taloakon na i Yesus sumo aijo', Ia nambamo nompala'i tampat aijo' ka' madi'mo mongka'oho' manintoa hi aha.

To mia-mian Yahudi madi' palesaya

³⁷ Mau mule' manjoo'mo na anu okabangangi binau i Yesus i ahop nu aha, aha madi' palesaya hi Ia.

³⁸ Sahingga tinimbalimo apaa na anu tinaloakonmo i Nabi Yesaya, “Tumpu, ihemo na palesaya i lele anu opo lele mami? Hi ihena pompotoaan kuasa nu Tumpu?”

³⁹ Mokonyo aijo' aha madi' palesaya, kalana i Yesaya notataemo suele, “Tumpu notatae,

⁴⁰ ‘Ku popisok na mata nu aha, mombau aha mokuut na kinyonyoa; da mata nu aha boli montoa, pikilan nu aha boli monsumbu'. Da aha boli minsusule' mae hi beleng-Ku, lantas Ku po'alinmo na aha.’ ”

⁴¹ I Yesus notatae sumo aijo' kalana ia nontoamo kadaka'an i Yesus, ka' nonsisikmo mongkona Ia.

⁴² Mau mule' sumo aitu, da'isan na mian, tiba sangga'at na anu mongkuasai Yahudi pinalesayamo hi Yesus. Panyo aha aijo' palesaya nu pohowini nu aha, kalana aha mabuhuk boli-boli mian nu Farisi madi' mompobee' aha minsoop i Laigan Pogalejaan.

⁴³ Aha lebee mongka'ima'i nu puji' nu mian molingkudui pongangga'i nu Tumpu.

Potatae i Yesus na momputusi palakala

⁴⁴ Lantas i Yesus notatae daka-daka', “Mian anu palesaya hi beleng-Ku, misa' palesaya hi beleng-Ku, panyo hi Ia anu nonsai mae Aku.

⁴⁵ Ka' mian anu montoa aku, montoa ia anu nonsai mae aku.

⁴⁶ Aku toka i dunia aiya sumo jingka, da iwi-iwi' na mian anu palesaya hi beleng-Ku boli jojoong i uno nu pintung.

⁴⁷ Mian anu mohongo apaa na anu Kupogulu', panyo madi' mombatuki – misa' Aku na mohukum ia. Kalana Aku toka misa' momputusi palakala nu dunia aiya, panyo da momposalamat.

⁴⁸ Mian anu madi' montalima Aku ka' madi' mohongo potataeng-Ku, daagi'mo ko anu momputusi palakalanyo. Potatae anu Ku potokakon, aijo'mo na anu momputusi palakala i Sinaa Kakiamatan.

⁴⁹ Kalana Aku madi' motatae lengkat i posi pongka'oho'-Ku; Tuuma anu nonsai mae Aku, iamo na nompalentakon hi belengku apaa na anu tionyo Ku taloakon ka' Ku potoka.

⁵⁰ Ka' Kusumbu' saba' palentah-Nyo aijo' mombee'i kantumuu'an kopian ka' toka sidu-sidutu'. Jadi Aku mompotokakon sumo anu pinogulu'mo nu Tuuma hi belengku.”