YOHANES 10 - KITAB NU TUMPU ALLA LELE MA'IMAI'

Kantuang mongkona Domba tiba polaya'nyo

¹ “Totu'u hondo na potataeng-Ku aiya: Mian anu minsoop i pangkun nu domba malaluan i pagan, ka' madi' montulu sabatan, panyo moliba' montulu jalan sangga'at, mian aijo' anu mombuling ka' mule' ia tololang.

² Panyo anu minsoop montulu sabatan, ia polaya' domba.

³ Pontamongi pangkun mombukai tumban de ia minsoop ka' to domba-domba mombatuki potataenyo de ia molaga sanggonyo toto sa'angu' ka' montuntuni aha mosabat.

⁴ Salatan domba-domba aijo' osabatakonmo, anu molaya' aijo' lumajang i moona ka' domba-domba haha aijo' mombatuki ia, kalana nusumbu' nu aha na potataenyo.

⁵ Aha madi' mongka'oho' mombatuki mian sangga'at, panyo ola ahi' malai nu pala'i na mian aijo', kalana madi' nusumbu' na potataenyo.”

⁶ I Yesus nonsisik kantuang aijo', panyo aha madi' mangalati' pa' apaa na anu Nu palui.

I Yesus polaya' anu manonong

⁷ Lantas i Yesus po'ule' mule' notatae minsan, “Totu'u na potataeng-Ku aiya: Akumo na sabatan pinsoopan nu domba.

⁸ Iwi-iwi' anu tinoka ma'isa pe'e kino Akunyo, aijo' anu buling tiba tololang, panyo domba-domba madi' mohongo potatae nu aha.

⁹ Akumo na sabatan. Ihe na minsoop montulu Aku salamat; ia mosabat minsoop ka' mohumpak kaanon.

¹⁰ Anu buling toka ola da mombuling, da mompatei tiba mongidei. Panyo Aku toka da mian mohumpak kantumuu'an – tumuu' molabi-labi.

¹¹ Aku polaya' anu manonong. Polaya' anu manonong mombee' nyawanyo kalana monsawani domba-dombanyo.

¹² Mian anu mongala tambo anu misa' polaya', ka' misa' tumpu nu domba-domba aijo', saidi' mae malai mompala'i domba-domba de ia montoa serigala toka mae. Te domba-domba haha aijo' nu sa'u ka' nuposungkehet nu serigala.

¹³ Mian anu mongala tambo aijo' malai, kalana ia mokalaja ola kalana tambo. Ia madi' mompajuli domba-domba haha aijo'.

^14-15 Akumo na polaya' anu manonong. Susumo Tuuma monsumbu' Aku, ka' Aku monsumbu' Tuuma, sumo aitumo mule' Aku monsumbu' domba-dombang-Ku ka' aha suele monsumbu' Aku. Aku mombee' nyawang-Ku, kalana monsawani aha.

¹⁶ Daagi' mule' ko domba-domba sangga'at aijo' suele anung-Ku, panyo madi' pinosoop i pahasan nu domba haha aiya. Aha suele tionyo Kuboa, ka' aha mule' tionyo mohongo potataeng-Ku. Aha iwi-iwi' tionyo timbali sampahas ka' sa'angu' na polaya'.

¹⁷ Tuuma mongkalibosi Aku kalana Aku nombee'mo nyawang-Ku, panyo po'ule'je o talima.

¹⁸ Madi' ko samian pe'e moko ala mongala aiya hi beleng-Ku. Aku nombee' posi pongka'oho'-Ku. Aku ko kuasa mombee', ka' ko kuasa po'ule' mongala. Aijo'mo na palentah anu ingalang-Ku hi Tuumang-Ku.”

¹⁹ Kalana i Yesus notatae sumo aijo', to mia-mian nu Yahudi nontampu'unimo pinainggaga.

²⁰ Da'isan na anu notatae, “Ia pininsoopanmo nu setan! Ia motutuang! Bau apaa na komiu mohongo Ia?”

²¹ Panyo daagi' mule' ko anu notatae, “Mian anu pininsoopanmo nu setan, madi' basisik sumo aijo'! Timbali na setan moko potimbali mian mapisok timbali montoa?”

Mian nu Yahudi madi' mongka'oho' montalima i Yesus

²² I Yerusalem to mia-mian hau-haunyo molame'akon Sinaa Daka' Nomposawe'i Laigan nu Tumpu. Tempo'nyo aitu, tempo' nu bakin.

²³ I Yesus hau-haunyo i lumajang i Lambing i Salomo i uno nu Laigan nu Tumpu,

²⁴ salatan to mia-mian nu Yahudi tinoka sinilimu'mo titikub hi Yesus. Aha notataemo, “Ipian na kopinnyo Beleyum mompopilaya kami bata-bata? Taloakonmo mae sahondo-hondonyo, de Beleyum totu'u Tomundo' anu Momposalamat.”

²⁵ I Yesus nontaami, “Tinaloakon-Kumo hi komiu, panyo komiu madi' palesaya. Te kalaja anu Kubau kalana sanggo nu Tuumang-Ku, mompobukuti' mongkona Aku.

²⁶ Komiu madi' palesaya, kalana komiu madi' pinosoop i domba-dombang-Ku.

²⁷ Domba-dombang-Ku mohongo potataeng-Ku. Aku monsumbu' aha, ka' aha nombatukimo Aku.

²⁸ Aku mombee'i aha kantumuu'an kopian ka' toka sidu-sidutu', ka' sidu-sidutu' aha madi' silaka. Madi' ko samian pe'e mongagoi aha i limang-Ku.

²⁹ Tuumang-Ku anu nombee'mo aha hi beleng-Ku molingkudui iwi-iwi'. Ka' madi' ko samian pe'e moko agoi aha lengkat i lima nu Tuuma.

³⁰ Aku tiba Tuuma sa'a-sa'angu'nyomo.”

³¹ Lantas to mia-mian nu Yahudi po'ule'mo nongala batu bau pombunu' i Yesus.

³² Panyo i Yesus notatae hi aha, “Komiu nontoamo Aku nombau manjoo' na hia anu ma'ima', anu pinalentahkon nu Tuuma hi beleng-Ku. Iwi-iwi' na hia aijo', iya na anu monsaduakon komiu mongka'oho'mo mombunu' Aku nu batu?”

³³ To mia-mian nu Yahudi aijo' nontaami, “Misa' kalana hia-Um anu toto ima-ima' aijo' na monsaduakon kami kahanda'mo mombunu' Beleyum nu batu, panyo kalana Beleyum mompisala'i Tumpu. Beleyum mian mompai potimbalimo butong-Um sumo Tumpu.”

³⁴ Lantas i Yesus nontaami, “Te misa' i uno nu Kitab nu Atulanum tinulis: Tumpu notatae, ‘Te beleyum tumpu?’

³⁵ Osumbu'to apaa na anu tinulis i uno nu Kitab nu Tumpu opake sidu-sidutu'. Jadi de Tumpu monsanggohi ‘tumpu’ hi to mia-mian anu montalima potatae-Nyo,

³⁶ ka' kadaka' komiu montaloakon Aku mompopo'ise' Tumpu, kalana notataemo Aku Anak nu Tumpu? Padahan Aku pinile'anmo nu Tuuma, ka' sinaimo mae mamba i dunia.

³⁷ De Aku madi' mombau hia anu pinalentahkon nu Tuuma, boli opalesaya na Aku.

³⁸ Panyo kalana Aku mombau palentah-Nyo, opalesaya apaa na anu Kubau aijo', mau mule' komiu madi' mongka'oho' palesaya hi beleng-Ku. Atina'je ka' osumbu' miu, ka' mangalati' taalu' Tuuma tataap mosa'angu' tiba Aku, ka' Aku tataap mosa'angu' tiba Tuuma.”

³⁹ Aha po'ule' mule' batanga' mohakop i Yesus, panyo Ia ma'isa pinoko hakop nu aha.

⁴⁰ I Yesus ninsusule' i santoa nu Kaunyo nu Yordan, i tampat i Yohanes naipuan mae nompalamandikan, lantas jinojoong mae kiijo'.

⁴¹ Da'isan na mian tinoka hi Ia. Aha notatae, “I Yohanes madi' mombau anu okabangangi, panyo iwi-iwi' tinaloakonnyomo mongkona mian aiya totu'u.”

⁴² Lantas da'isan na mian anu kiijo' mae pinalesaya hi Yesus.