YOHANES 1 - KITAB NU TUMPU ALLA LELE MA'IMAI'

Potatae nu Tumpu anu mombee'i kantumuu'an

¹ Momonanyo, ma'isa pe'e dunia pinotimbali, Potatae nu Tumpu Allah polo-polo'mo daagi'. Potatae nu Tumpu sa'a-sa'angu'mo tiba Tumpu ka' Potatae nu Tumpu sumo-sumomo Tumpu.

² Salatanmo pe'e imoona Ia sa'a-sa'angu'mo tiba Tumpu.

³ Iwi-iwi' na anu pinotimbali nolengkat mae hi Ia, ka' iwi-iwi' na anu daagi', madi' ko sa'angu' pe'e na anu pinotimbali de misa' Ia.

⁴ Potatae nu Tumpu aijo' pu'un nu kantumuu'an, ka' kantumuu'an monjingkai mian.

⁵ Jingka aijo' monjingkai kapintungan, ka' kapintungan madi' moko poho' ia.

⁶ Tinoka na mian anu sinai mae nu Tumpu, sanggonyo i Yohanes.

⁷ Ia toka mombebakon jingka aijo', da iwi-iwi' na mian palesaya.

⁸ Ia misa' jingka ai-aijo', ia ola mombebakon.

⁹ Jingka totu-totu'u anu monjingkai iwi-iwi' na mian, tinokamo i dunia.

¹⁰ Potatae nu Tumpu daagi'mo i dunia, dunia pinotimbali nu potatae-Nyo, panyo dunia madi' monsumbu' Ia.

¹¹ Ia tinoka i posi lipu'-Nyo panyo bansa-Nyo madi' montalima Ia.

¹² Panyo daagi' ahi' ko anu montalima Ia, ka' palesaya hi Ia; aha binee'an-Nyo hak timbali Anak nu Tumpu,

¹³ anu i hampeakon misa' nolengkat mae i mian, kalana tumuu' bu'ou aijo' lengkat mae hi Tumpu na pinolengkatannyo.

¹⁴ Potatae nu Tumpu tinimbalimo mian, Ia jinojoongmo aiya hi kita, ka' kita nontoamo katalasanggoan-Nyo. Katalasanggoan-Nyo tinalimanyomo salaku anak sa'a-sa'angu'nyo nu Tuuma. Kalana Ia, sahingga kita nontoamo Tumpu ka' kalibosan-Nyo hi kita.

¹⁵ I Yohanes tinoka salaku sakisi-Nyo, ia mompolele: “Aiyamo Ia na anu titinaloakonku: Ia toka lebe tongkoimihi, aku na moona toka, panyo lebe talasanggo molingkudui aku, kalana ma'isa pe'e ko akunyo, Ia polo-polo'mo daagi'.”

¹⁶ Ia saja' mongkalibosi; madi' ko kamingkotannyo, Ia mombalakati kita.

¹⁷ Atulan nu Tumpu otalimanto hi Musa. Panyo liibos ka' kanonongan nu Tumpu pinonyata'-Nyomo hi Yesus Kristus.

¹⁸ Madi' ko anu toho'mo nontoa Tumpu, de misa' anak nu Tuuma anu samba-sambatumo, anu pokakana tiba Tuuma ka' anu mompahakona hondo Ia. Ia na anu momponyata' Tuuma hi kita.

Anu sinakisian i Yohanes

¹⁹ To mia-mian Yahudi anu ko kuasa i Yerusalem nompokau to ima-imam ka' to mia-mian nu Lewi namba hi Yohanes, ka' nompokilawa hi ia, “Beleyum aiya ihe?”

²⁰ I Yohanes nangaku sahondo-hondonyo, “Aku misa' Tomundo anu Momposalamat.”

²¹ “Desumo aitu, beleyum ihe?” pinokilawa nu aha. “Pa' beleyum i Elia?” “Misa',” na koonyo i Yohanes. “Pa' beleyum Te Nabi?” pinokilawa nu aha mule'. “Misa',” na koonyo.

²² “Desumo aitu, taloakon mae hi kami ihe na beleyum aiya,” na koonyo nu aha, “da ko pontaami mami hi to mia-mian anu nompokau mae kami. Apaa na kooyum mongkona butongum?”

²³ I Yohanes nontaami, “Akumo na ia anu titinaloakon i Nabi Yesaya: ‘Mian anu noloboo' i padang bone': Pohata na jalan da bau kajalanan nu Tumpu.’ ”

²⁴ To mia-mian anu sinai nu mian Farisi,

²⁵ nompokilawa, “De beleyum misa' Tomundo anu Momposalamat, misa' i Elia, misa' mule' Te Nabi, kadaka' beleyum mompalamandikan?”

²⁶ I Yohanes nontaami, “Aku mompalamandikan nu uee. Panyo itina' hi komiu daagi' ko mian anu madi' osumbu' komiu.

²⁷ Aku tinoka momona, Ia imihije, panyo mombukai pomputi nu sapatu-Nyo pe'e, aku madi' pantas.”

²⁸ Iwi-iwi' aijo' tinimbali i Betania, sasu kabete'an nu Kaunyo Yordan tampat i Yohanes nompalamandikan.

Anak Domba nu Tumpu

²⁹ Dodododopnyo, i Yohanes nontoa i Yesus namba mae hi ia. Lantas i Yohanes notatae, “Toa, aijo'mo na Anak Domba nu Tumpu Allah anu mongalini dosa' nu dunia.

³⁰ Iamo na anu titinaloakonku aku na moona toka ia imihije, panyo Ia na lebe daka' molingkudui aku, kalana ma'isa pe'e aku i hampe, Ia polo-polo'mo daagi'.

³¹ Ma'isa pe'e Ia tinoka, aku madi' monsumbu' pa' ihe na Ia aitu. Padahan aku tinokamo nompalamandikan nu uee da bansa Israel monsumbu' Ia.”

³² I Yohanes suele nompoto'imo anu sinakisiannyo aiya, “Aku nontoa Roh nu Tumpu nintatau' sumo tomonsi' malapati', lengkat mae i langit ka' nanintengke' i buan-Nyo.

³³ Tempo'nyo aitu ma'isa sinumbu'ku pa' ihe na Ia. Panyo Tumpu Allah na nompokau aku mompalamandikan nu uee notataemo hi belengku, ‘De beleyum montoa Roh nu Tumpu mintatau', lantas manintengke' i buan nu sala'samian, Iamo na saidi' mae mompalamandikan nu Roh nu Tumpu.’

³⁴ Pinositoang-Kumo,” na koonyo i Yohanes, “ka' aku nompoto'imo anu sinakisiankumo saba' Iamo na Anak nu Tumpu.”

Anu momona nombatuki Yesus

³⁵ Dodododopnyo i Yohanes po'ule' mule' daagi' i tampat aijo' tiba ua'aha na anu saja' mombatuki ia.

³⁶ Salatan tinoanyo na i Yesus notulu, ia notatae, “Toa! Aijo'mo na Anak Domba nu Tumpu.”

³⁷ Ua-ua'aha na anu saja' mombatuki Yohanes nohongo potatae aijo', lantas nambamo nombatuki Yesus.

³⁸ I Yesus nosiloi i hiku ka' nontoa aha aitu mae hau-haunyo mombatuki Ia. Ia nompokilawa, “Komiu molio apaa?” Tinaaman nu aha, “Gulu', iyamae na jojoongan i Gulu'?” (Sanggo ‘Rabi’ alati'nyo Gulu'.)

³⁹ “Imbo' posi toa,” tukoonyo i Yesus. Aha namba tiba Ia ka' nontoa iya na kajojoongan-Nyo. Tempo'nyo aijo' jam opatmo mamaalom. Sinaa aijo' aha jinojoongmo hingga-hinggat tiba Ia.

⁴⁰ Sala'samian anu ua'aha noho-nohongomo apaa na anu tinaloakon i Yohanes, ka' ilapas aitu nambamo mombatuki Yesus, aijo'mo i Andreas, utus i Simon Petrus.

⁴¹ Lia-lia' na i Andreas nolio i Simon utusnyo ka' notatae hi ia, “Kami siningkabotmo i Mesias!” (Mesias pokakanamo i Kristus, aijo'mo: Tomundo anu Momposalamat.)

⁴² I Andreas nolaya' i Simon namba hi Yesus. I Yesus nondin i Simon, lantas notatae, “Beleyum i Simon anak i Yona. Beleyum osanggohije i Kefas.” (Kefas pokakanamo i Petrus, alati'nyo: bungkut nu batu.)

I Yesus nolaga i Filipus ka' i Natanael

⁴³ Dodododopnyo i Yesus nompatikolomo namba i Galilea. Ia siningkabot ka' i Filipus, ka' notatae hi ia, “Imbo' batuki na Aku!”

⁴⁴ I Filipus mian anu nolengkat mae i Betsaida, aijo'mo jojoongan i Andreas ka' i Petrus.

⁴⁵ I Filipus siningkabot tiba i Natanael ka' notatae hi ia, “Kami siningkabotmo mian anu sisinanggo i Musa i uno nu kitab Atulan nu Tumpu ka' anu bibinebakonmo nu to nabi-nabi. Aijo'mo Ia i Yesus anu lengkat mae i Nazaret, anak i Yusuf.”

⁴⁶ Panyo i Natanael nontaami, “Toho' mule' anu ma'ima' molengkat mae i Nazaret?” “Imbo' posi toa,” na koonyo i Filipus.

⁴⁷ I Yesus nontoa i Natanael tinoka, lantas notatae mongkona ia, “Toa, aijo' mian nu Israel totu-totu'u. Madi' ko baleko'nyo hi ia.”

⁴⁸ “Mosia na Kita Tuuma nonsumbu' aku?” pinokilawa i Netanael hi Yesus. I Yesus nontaami, “Ma'isa pe'e i Filipus nolaga beleyum, tinoang-Kumo na beleyum i patu nu kau' ara aijo'.”

⁴⁹ “Kita Tuumangku Gulu',” na koonyo i Natanael, “Kita Tuuma Anak nu Tumpu! Kitamo Tuuma na Tomundo bansa nu Israel!”

⁵⁰ I Yesus notatae, “Beleyum palesaya, ola kalana Aku nontaloakonmo tukoongku Aku nontoamo beleyum i patu nu kau' ara aijo'? Hahan anu lebe daka' molingkudui aitu nutoaje!”

⁵¹ Koonyo i Yesus mule', “Totu'u, palesayamo, beleyum montoaje langit tontuhea', ka' to mala-malaikat nu Tumpu moliba' mintau' hi Anak nu Mian.”