YOËL 3 - KITAB NU TUMPU ALLA LELE MA'IMAI'

Tumpu nomputusimo to bansa-bansa

¹ Tumpu notatae, “Tempo'nyo aijo' Yerusalem tiba Yehuda Ku po ule'mo na kasanangan i uno nu kantumuu'an nu aha.

² Iwi-iwi' na bansa, Ku posihukmo ka'Ku boamo i Bangka'nyo nu Pomputusian. Lantas Ku putusimo na palabuatan nu aha ma'i-ma'idek aijo' bibinaumo nu aha hi mian-Ku anu palesayamo kalana aha nombagi-bagimo tano' nu Israel ka' mule' mian-Ku anu palesayamo binoamo nu aha i yayamae na lipu'.

³ Aha nombuangmo onde da osumbu' pa' ihe na mongala mian anu binoamo mae aijo'. Aha nompobalukmo to lalangkoyang tiba to oli-olitau da opotimbali botuan. Ka' doinyo nu pake nu aha ikapaluan lewa' masala' ka' lewa monginum anggur.

⁴ Oposiamo nu belemiu na Aku aiya o Tirus, Sidon ka' iwi-iwi' na daerah nu Filistin? Pa' kahanda'mo na belemiu mombalosakon apa-apaa na anu binaung-Kumo hi belemiu? Soba alamo na bau pombalosing-Ku anu malia'mo mae toka aiya.

⁵ Mosoni' tiba salaka anu Aku ahi' na tumpunyo binulingmo nu belemiu ka' mule' halata'-Ku anu mahan na olinyo binoamo nu belemiu i laigan nu pilogot nu belemiu.

⁶ Mian anu jojoong i Yehuda ka' mule' i Yerusalem binoamo nu belemiu jo'o-jo'on lengkat ilipu'nyo; lapas aitu opobalukmo nu belemiu hi bansa Yunani.

⁷ Uuka aiya Ku sabatakonmo mae lengkat itampat pipinompobalukanmo nu belemiu ka' Ku balosakonmo na palabuatan nu belemiu anu ma'i-ma'idek hi aha.

⁸ To oli-olitau ka' to lalangkoyang Ku pobalukmo hi mian anu jojoong i Yehuda ka' anu po ule' mule' mompobaluk ilipu' Syeba, lipu' anu majo'on hondo. Aku na Tumpu anu notataemo.

⁹ Bebakonmo na anu pinoto'imo aiya hi aha to bansa-bansa. Posadiamo na mahampate ka' osabung na butong nu belemiu! Potumbumo mae na anu toto babaani tiba to tale-talenga', posihukmo mae na suludadu iwi-iwi' ka' pahampatemo!

¹⁰ Tutukmo na mata nu pajeko ka' baumo bajak, ka' piso' anu bau pongkiis potimbalimo bau ponjalo' ka' suele mian anu lupe tionyo ahi' motatae, ‘Aku timbali mamba mahampate susumo suludadu!’

¹¹ Soba tokamo mae lia-lia' o, to bansa-bansa anu lengkat mae iyaya i pasu'nyo nu dunia! Posa'angu'mo aijo' mae i bangka'nyo.” O, Tumpu, palentahmo mae na suludadu nu Belento montumbuhi aha!

¹² Tumpu poule' mule' notatae, “To bansa-bansa posadiamo ka' lako'mo i Bangka'nyo nu Pomputusian. Ikiijo' mae Aku Tumpu momputusimo to bansa-bansa anu mompaha ohani mian-Ku anu palesayamo.

¹³ Aha talalo hondo ma'idek; sabitmo na aha susumo gandum anu nahamo i ale'. Ututmo na aha susumo anggur i uno nu pompetian nobuke'mo sampe nolabe-labesmo.

¹⁴ No mada-madalamo na mian anu kiijo'mo i Bangka'nyo nu Pomputusian. Kalana ikiijo'mo mae na sinaa nu Tumpu malia'mo mae toka.

¹⁵ Batu nu sinaa tiba bitu'on pikatmo, ka' mule' to manda-mandala' madi'mo daagi majingka.”

Tumpu mombalakatimo mian-Nyo anu palesayamo

¹⁶ Tumpu notataemo daka-daka' aita' mae i bungkutnyo nu Sion, lengkat mae i Yerusalem sumomo ahi' gohung na potatae-Nyo. Langit tiba tano' ginayu'anmo kalana kakuasa'an-Nyo. Panyo Tumpu tataap monsangaja'i ka' monjagai Israel, mian-Nyo anu palesayamo.

¹⁷ “O, Israel uuka aiya osumbu'mo nu belemiu, saba' Akumo na Tumpu nu belemiu. Aku jojoong i Sion, i bungkutnyo anu Aku na tumpunyo. Sahingga Yerusalem suele timbalimo kota' anu susi' mian anu isalipu'an mae madi'mo daagi mompinsoopi.

¹⁸ Tempo'nyo aitu iwi-iwi na bungkutnyo mobuke'mo nu ale' nu anggur. Binatang anu opotuu' mongototmo hemput i iwi-iwi na puge'nyo anu ma'omuk. Iwi-iwi na kaunyo anu kiijo' i Yehuda, madi'mo toho' mo'oti na ueenyo. Sa'angu' na kaunyo mo ili lengkat mae Laigan nu Tumpu, ka' mongueeimo Bangka'nyo nu Akasia na ueenyo anu molino hondo.

¹⁹ Mesir timbalimo padang anu ewa hondo ka' mategesmo, ka' mule' Edom timbalimo tano' anu kuunmo madi'mo nu jojoongi nu mian. Kalana aha nontumbuhimo mian nu Yehuda, ka' nompateimo tumpu nu lipu' anu madi' kosala'nyo.

^20-21 Baso' nu aha Ku tuntutmo na pombolosinyo, aha nompatei Ku tobus suele nu mompatei. Panyo Yehuda tiba Yerusalem na saja' ahi' ko miannyo anu monjojoongi, ka' Bungkutnyo nu Sion na tataap ahi' saja' bau kajojoongan-Ku.” 12