YOËL 2 - KITAB NU TUMPU ALLA LELE MA'IMAI'

Nompo ingatmo Sinaa nu Tumpu anu toka saidi mae

¹ Puuhimo na tolompet, po'onyi'mo na tanda bahaya i bungkutnyo nu Sion anu susi' kajojoongan nu Tumpu. Langkakatanmo, o mian anu jojoong i Yehuda! Kalana Sinaa nu Tumpu ohanimo mae ka' malia-lia'mo mae toka.

² Sinaa aijo' pikat hondomi' kahomo sehu' madi'mo ko sahayanyo. Suludadu kihi-kihi' singkapmo mae toka, susumo kundom anu nanintingkimo aita' i bungkutnyo. Han anu susumo aijo' ma'isa toho' jinadi ka' madi'mo daagi' po'ule' jadi sampe toka sidu-sidutu'.

³ Susumo apu anu mompapui ka' montoyo'i aha nohansunimo iwi-iwi na anu osu'an. Momonanyo mae lipu' aijo' sumomo Eden, i natan nu Tumpu panyo lapas mae, sumomo padang bone' anu mapeges hondo. Madi'mo ko anu tinontuha' madi'mo kino sisanyo na tinumbuhan nu aha.

⁴ Balu-balu'nyo nu aha sumomo ajahan popadeka'nyo sumomo ajahan i totonga' nu pahampatean.

⁵ Aha mahalumpatan aita' i bungkutnyo onyi'nyo sumomo daladak nu kareta pahampate ka' sumomo titihika' nu apu anu nomea'mo hondo. Aha nobalismo susumo sa'angu' na tumpukan nu suludadu anu baani hondo, anu sasadiamo mongahopi pahampatean.

⁶ Tempo'nyo aha nolambanimo iwi-iwi' na mian i lakatnyomo iwi-iwi' na ohup nu mian i ne'esmo ka' nangkuyumo.

⁷ Susumo talenga' aha nontumbuhimo ka' noliba'mo i pagan sumen susumo suludadu anu baani. Aha nobalismo hondo-hondo mokiijo' i ahop madi'mo nosele-sele kabai nombali'i patuju.

⁸ Aha madi' mompaha genso-gensot posi-posi jalan i ahop na kalajangan nu aha. Hingga-hinggat na aha nontumbalakonmo iwi-iwi na benteng nu aha, madi' timbali balisa nu aha opobelenti.

⁹ Aha nontumbuhimo i uno nu kota' ka' nopadeka'mo aita i pagan mesen. Aha noliba'mo i uno nu to lai-laigan; susumo anu mombuling, aha minsoopmo i tolongan.

¹⁰ Hau-haunyo aha mongahopimo tano' i lakatnyomo, ka' langit suele ilakatnyomo. Lantas pinikatmo na batu nu sinaa ka' bitu'on ka' jingka nu to manda-mandala' i madi'mo.

¹¹ Potatae nu Tumpu sumomo gohung mombee'i tanda hi to sulu-suludadunyo. Talalo ahi' manjoo' na suludadunyo! Talalo ahi' mahoson na suludadunyo anu mombau palentah-Nyo! Talalo ahi' okabuhuk ka' hebat hondo na Sinaa nu Tumpu Madi' ko samian pe'e na moko ala mongewa.

Mompoita da kantumuu'an opoko ima'i

¹² Tumpu notatae, “Panyo uuka aiya pinsusule'mo mae hi beleng-Ku ka' totu-totu'unyomo ahi' na kinyonyoa, ka' bapuasa'mo, tumando' ka' humangmo.

¹³ Obeak na kinyonyoa nu beleyum ka' misa' ahi' pakean nu beleyum.” Mambamo mae hi Tumpu nu belemiu. Ia talalo saban ka' mongkalibosi hondo, ma'ima' na kinyonyoa ka' talalo hondo manonong. Sanang hondo na mongampuni ka' madi' mongka'ima'i mompokona hukuman.

¹⁴ Ugaat Tumpu nu belemiu mombali'imo tanga'an-Nyo ka' mombee'i balakat hi belemiu anu molabi-labi. Sahingga belemiu monsombahkonmo koloban anggur ka' gandum hi Tumpu nu belemiu.

¹⁵ Puuhimo na tolompet kiita' i Sion i bungkutnyo nu Tumpu, bebakonmo na sinaa nu puasa' baumo na kasihukan nu mian iwi-iwi'.

¹⁶ Posihukmo mae na iwi-iwi' mian da'isan palentah na mian anu sinihukmo. Pokau mae da toka na to tu'a-tu'anyo, to ana-anak ka' to bunga-bunga mea' suele. Ka' suele to boti-boting anu salaje' inika' tionyo ahi' toka mae. Pokau mae na aha mompala'i Salipi'nyo.

¹⁷ Pokau na to ima-imam anu montuluti palentah nu Tumpu, haangmo atina' i olot nu mezbah ka' i gandalia i ahop, ka' motatae, “Kalibosi na mian anu palesayamo hi Belento boli opojohok na anu nu belento dumo timbali anu moko ambang.” Sahingga to bansa-bansa sangga'at monsindin ka' motatae, “Iya mae na Tumpu nu aha?”

Tumpu poule'mo nompojadi tano' na'omuk

¹⁸ Lantas Tumpu nompalahatikanmo tano'-Nyo ka' nongkalibosimo mian-Nyo anu palesayamo.

¹⁹ Ia nontaami aha sumo uuka, “Uuka aiya belemiu iwi-iwi' Ku bee'imo gandum, anggur tiba lanya' nu zaitun da okaan da belemiu iwi-iwi' mobosu. Aku madi' mompojohok belemiu opopo ambang kabai nukokojoi nu to bansa-bansa.

²⁰ Sampahas na kihi-kihi' lengkat mae i utara Ku laa'je sambagian Ku laa' i padang bone'. Mamba' i Ambai Mate, Ku sigala na balisnyo anu momona mamba i Ambai anu Totonga'nyo, Ku salakon na balisan anu aitu mae imihinyo. To maya-mayatnyo mabusikmo saidi' mae. Aha Ku hansuni kalana nonsakisamo belemiu.

²¹ Boli mabuhuk, o ale' posanang na kinyonyoa nu beleyum; Ingat na han anu daka' hondo bibinaumo nu Tumpu hi belemiu!

²² O to bina-binatang boli gago' na kinyonyoa. To pada-padang hemput uuka aiya nolumba'mo. Talalomo hondo nahampe na bua'nyo nu to kau-kau' bua'nyo nu anggur tiba ara nolabi-labimo.

²³ O mian da'isan nu Sion, balame-lame'mo! Bilahimo ka' polo aismo! Kalana iwi-iwi' na anu ma'ima' lengkat mae hi Tumpu nu belemiu. I tempo'nyo nu polosuan binee'an-Nyomo sukup na ujan hi belemiu. I tempo'nyo nu bakin ujan tinudunakon-Nyomo mae. Ka' suele tempo'nyo nu pimbuhakan sumomo u'utu mae.

²⁴ Sahingga gandum mongisi mule' tampat pongututan; anggur ka' lanya' nu zaitun molabesmo i tampat pompao'an.

²⁵ Aku mombolosije apa-apaa na kalugi'an nu belemiu i taun taun tempo'nyo kihi kihi' nongkaanmo hasin nu ale' anu opadakmo nu belemiu. Kalana Akumo ahi' na nonsai sampahas na kihi-kihi' haha aijo' namba hi belemiu.

²⁶ Anu okaan nu belemiu sukupmo ka' mongoa'imo mobosu. Tumpu nu belemiu opopodaka'mo nu belemiu, kalana hi belemiu binau-Nyomo manjoo' na anu okabangangi. Mian-Ku anu palesayamo madi'mo daagi' lewa' nu alu nu mian!

²⁷ Sahingga osumbu'je nu belemiu, Israel, saba' Aku saja ahi' aiya hi belemiu, ka' Aku Tumpu, aijo'mo na Tumpu nu belemiu. Madi'mo ko Tumpu sangga'at, ola-olanyomo ahi' Aku aiya. Mian-Ku anu palesayamo madi'mo daagi lewa' opopo ambang!”

Sinaa nu Tumpu

²⁸ “Lapas na aijo' iwi-iwi' na mian Ku bee'imo rok-Ku. Sahingga to ana-anak mo'ane, boune mompoto'imo anu Ku potuun; to tu'a-tu'anyo atina' hi belemiu mongipimo anu otoa opotoamo hi olitau ka' langkoyang.

²⁹ Tempo'nyo aijo' roh-Ku Ku bee'mo suele hi aha to posa-posaihon mo'ane ka' boune.”

³⁰ I langit ka' i tano' Ku bauje manjoo'hondo na anu okabangangi. Ka' daagi'je ko anu monjujuhakon baso', moak nu apu ka' tibuk anu kumomponmo.

³¹ Batu nu sinaa tinimbalimo pinikat ka' bitu'on timbalimo momea' susumo baso'. Iwi-iwi' aijo' jadimo saidi' mae ma'isa pe'e Sinaa nu Tumpu toka mae, sinaa anu talalo ahi' ma'idek ka' okabuhuk!

³² Panyo de ihe na momoita tulung hi Tumpu saidi mae nu posalamatmo. Tumpu motataemo, “I Yerusalem to mia-mian anu pinile'an-Kumo oposalamatmo.”