YESAYA 9 - KITAB NU TUMPU ALLA LELE MA'IMAI'

¹ Bansa anu jojoong i uno nu kapintungan montoamo jingka lonsi-lonsinoan. Anu jojoong nu lolungi nu kapatean jiningkanmo nu sahaya anu majingka.

² O, Tumpu binee'anmo nu Belento kabilahian na aha anu taha-tahahumo Pinojadimo nu Belento na aha da lewa' nontaligalai. Aha ilame'mo kalana kanonongan nu Belento. Susumo mian anu binilahimo tempo'nyo nomposihukmo anu pinadakmo kabai nombagimo anu pinahuhuakon mae.

³ Belento nongalinimo tanggungannyo anu maboat ka' kau' anu simbu-simbu ibikoangnyo. Belento nompatundu'mo bansa anu saja' monsakisa anu lewa' mombee'i tanggungan toto boa-boat hi mian anu palesayamo hi Belento. Pokakana susumo naipuan mae tempo'nyo Belento nompatundu'mo suludadu nu aha Midian.

⁴ Sapatu nu suludadu anu ginalupakanmo ka' mule' baju' nu aha anu kahomo baso' saidi' mae mingkotmo mo'angot nu apu.

⁵ Samian na anak hampemo aiya hi kita; kita binee'anmo samian na anak mo'ane. Ia na saidi' mae timbali polaya'to. Ia osanggohi: “Anu pande na mombee'i Pokinde'i”, “Tumpu anu Baani”. “Tuuma au tumuu' Sampe toka sidu-sidutu'”, “Tomundo' anu Mompodame”.

⁶ Ia mompalentah salaku tomundo' lee' mae i Daud, kakuasa'annyo daka' hondo. Lipu'nyo saja'mo dame ka' mohumpakmo kantumuu'an ma'ima'; pamalentahannyo montoongi atulan tiba ka'adilan mulai uuka aiya sampe toka sidu-sidutu'. Tumpu Anu Daka' na Kuasanyo na tionyo mombau aijo'.

Tumpu nohukumo Israel

⁷ Tumpu nonabu'akonmo hukuman hi aha kalaja'an Israel.

⁸ Iwi-iwi' na bansa Israel tiba anu jojoong i Samaria saidi' mae monsumbu'je taalu' Tumpu ahi' na mombau aijo'. Uuka aiya aha binulonmo ka' kinobubuunmo. Aha notatae,

⁹ “Laigan to daka-daka' anu batu na binau nohobo'mo, panyo kami po ule'mo mombau laigan toto daka-daka' anu bu'ou anu batu na obau. Kau' ara singkapmo tina'an, panyo obolosimo mami nu kau' cemara i Libanon anu ma'ima' hondo”.

¹⁰ Tumpu noposinsumbu'mo sampobali' nu aha da mongewamo mae aha.

¹¹ Bansa Siria anu isasu kabete'an tiba bansa Filistin isasu kinsoban nongkuasaimo Israel. Panyo Tumpu daagi' tataap motambuha' ka' sabole-boleh ahi' mohukum.

¹² Bansa Israel ma'isa ahi' nompele-pele' mau aha ihukumo nu Tumpu Anu Daka' na Kuasanyo: aha ma'isa ahi' binalatobat hi Ia.

¹³ Kalana aijo' i uno nu sansinaa Tumpu nohukumo to pola-polaya' nu aha Israel tiba aha mian da'isan. Kinolong-Nyomo ka' ingalin-Nyomo na ubaknyo tiba ikunyo.

¹⁴ Ubaknyo aijo'mo to tu'a-tu'anyo ka' anu oholomati, ikuno aijo'mo to nabi-nabi anu nombee'i pangajalan anu madi' totu'u.

¹⁵ To pola-polaya' nu bansa haha aijo' nombee'imo pangajalan anu madi' totu'u ka' nompokalangkabutmo mian da'isan.

¹⁶ Bansa aijo' madi'mo pinalesaya hi Tumpu ka' mule' palalente, ka' iwi-iwi' na potatae nu aha madi'mo na'ima'. Kalana aijo' aha to oli-olitau mau pe'e samian madi' ko anu pinoluput nu Tumpu. Ia madi'mo nongkalibosi to balu-balu tiba anu madi'mo ko tuumanyo ka' tinanyo. Panyo Tumpu daagi' ahi' sabole-boleh motambuha' ka' sabole-boleh mohukum.

¹⁷ Palabuatan ma'idek nu bansa aijo' nompapu'i susumo apu nompapui kuhat anu kohii'nyo. Moaknyo sumomo alas na notoyo' anu lewa'mo nonsipunakon tibuknyo.

¹⁸ Tumpu Anu Daka' na Kuasanyo talalomo hondo notambuha' ka' hukuman anu Nu nabu'akon sumomo apu anu kino ilos-ilosmo ka' bansa aijo', aijo'mo na anu nu nu toyo'imo. Madi'mo daagi' kosamian na anu mongkalibosi utusnyo.

¹⁹ Isongko-songko na lipu' aijo' mian mo agomo maumo pa' apaa na anu timbali okaan panyo madi' mongoa'i mobosu. Aitu pe'e to sanga-sangalu nu aha na kaanmo nu aha!

²⁰ Aha mian nu Manasye tiba aha mian nu Efraim mompaha tumbu-tumbuhimo lantas mosangalumo mongewa Yehuda. Panyo Tumpu daagi' ahi' tataap motambuha' ka' tataap mule' ahi monabu'akon hukuman.