YESAYA 8 - KITAB NU TUMPU ALLA LELE MA'IMAI'

Anak i Yesaya salaku tanda hi bansa aijo'

¹ Tumpu notataemo hi belengku, “Ala na sa'angu' na batutulis anu daka' lantas tulisimo nu huru-hurup anu talang hondo; ‘Pahangagoan Pande hondo, Montomang Malia' hondo'.’

² Laga na mian ua'ah salaku sakisi anu timbali opalesaya, aijo'mo i Imam Uria tiba i Zakharia anak i Yeberekhya.”

³ Mamanga ahi bengkele'ku pinoboamo. Salatan anak mami ihampemo, Tumpu nompoto'imo mae hi belengku, “Sanggohi na ia, ‘Pahangagoan Pande hondo, Montomang Malia' hondo.’

⁴ Kalana ma'isa pe'e anak aijo' daka' da timbalimo montaloakon ‘Tuuma’ tiba ‘Tina’, iwi-iwi' na kakaya'an nu aha Damsyik ka' mule' iwi-iwi' na anu pinahuhuakon nu aha Samaria na balang, o'atomo oboa hi tomundo' Asyur.”

Tomundo' nu aha Asyur tinokamo mae

⁵ Tumpu notatae mule mae hi belengku,

⁶ Ia notatae, “Bansa aiya madi' mongala uee anu madi' masolok na moili lengkat mae ipanga' nu uee Syiloah ka' sanang na aha hi Tomundo' Rezin tiba hi Tomundo' Pekah.

⁷ Kalana aijo' Aku, Tumpu mompotokamo mae tomundo' nu aha Asyur tiba iwi-iwi' na suludadunyo da montumbuhimo Yehuda. Aha montumbuhimo susumo lapangnyo Kaunyo nu Efrat mosawe'mo ka' monganjuhakonmo iwi-iwi na tobinyo nu Kaunyo aijo'.

⁸ Nu letabimo nu aha na Yehuda susumo lapangnyo iaba' toka-tokamo igogohong na kotangkasnyo ka' mule' mongomokimo iwi-iwi na apaa.” Tumpu na monsangalui kita! Polipik-Nyo anu bibinokamo nonsalumbungimo lipu'to aiya.

⁹ Sihukmo mae ka' pabuhukmo o belemiu iwi-iwi' na bansa! Potombihing mae o belemiu iwi-iwi na puusnyo nu tano'. Pogogaumo kalana mahampatemo, panyo kinyonyoa mabuhuk! Yo donganmo pogogau panyo mabuhuk!

¹⁰ Pombau tanga'an panyo iwi-iwi' aijo' madi' mingkaliangan. Pongala kaputusan panyo madi' kogunanyo, kalana Tumpu monsangalui kami.

Tumpu nompokinde'imo i Yesaya

¹¹ Aku kinuasanmo nu Tumpu ka' pinokinde'anmo da boli montuluti jalan anu nu jalani nu bansa aijo'. Ia notatae,

¹² “Boli monsangka posa'angu'an anu kokoonyo nu sangka'an nu aha posa'angu'an, ka' mule' boli okabuhuk na hahan anu nu kabuhuk nu aha.

¹³ Jaga mae kalana Aku, Tumpu Anu Daka' na Kuasanyo aijo' susi'.

¹⁴ Kalana Aku susi' hondo, Aku baumo sabab batu tosumpunan nu aha mian da'isan Yehuda ka' Israel ka' timbalimo so'o anu mohakopmo mian anu jojoong i Yerusalem.

¹⁵ Manjoo' na mian tosumpunmo ka' ka' belaonmo. Aha mompeja'imo ka' nu konamo nu so'o.”

Pinoliwa'mo na momoita pokinde' hi sando

¹⁶ Belemiu aiya to muli-mulitku tionyo ahi montoongi ima-ima' ka' mule' monginau sinin na potuunon anu binee'mo nu Tumpu hi belengku.

¹⁷ Tumpu madi'mo nompotoa butong-Nyo hi lee' i Yakub, mian anu palesayamo hi Ia.

¹⁸ Aiya na aku tiba to ana-anak anu binee'mo nu Tumpu hi belengku. Tumpu Anu Daka' na Kuasanyo mompalentah i Bungkutnyo nu Sion nonsaimo mae kami da timbali tanda hi aha Israel.

¹⁹ Panyo aha to mia-mian mompokaumo belemiu da momoita pokinde' hi to sando-sando anu ola lewa' mo'oyong ka' maha kija-kijapan. Mian haha aijo motataemo, “Temisa' kita patut ahi'momoita pokinde' hi aha santuu' nu mian anu sinilakamo da bau kapentingan nu mian anu daagi' tutuu'?”

²⁰ Taami sumo uuka, “Ohongo na pangajalan nu Tumpu! Mian nau motatae madi' sosok ipangajalan aijo' madi' ko anu nu taha'imani imihinyo mae.”

Tempo anu saidi' mae susa'mo hondo

²¹ Aha to mia-mian anu sinoe'mo ka' no ohopmo sumolinsapmo ilipu' aijo'. Kalana no ohopmo, aha saja'mo motambuha' sahingga mongkutukimo tomundo' tiba Tumpu nu aha. Maumo pa' iya na nu tonto'i nu aha, mokiita

²² kabai mokaiyong madi' ko apa-apaa na anu nu toa nu aha ola ahi' samata-mata kasansala'an ka' kapintungan ka' mule' kasusa'an na tina'up. Aha saidi' mae olumbu'akonmo i tampat pintu-pintung aijo'.

²³ Panyo madi' ahi' sampemo sidu-sidutu' na lipu' aijo' molasai kasansala'an susumo aijo'. Daerah anu kajojoongan nu to tulu-tulunan nu bansa Zebulon tiba Naftali toho'mo inganggap nu Tumpu madi' kokaliangannyo. Panyo itempo' anu aiya mae o'ahopi Nu bee'imo kaholomatan hi aha songko-songko na daerah lengkat pe'e mae i Ambai anu i Totonga'nyo lau-laus sasu kabete'an toka-toka isantoa nu Kaunyo Yordan ka' mule' toka-toka i Galilea anu kajo-kajojoongan nu mian anu lengkat mae isalipu'an.