YESAYA 66 - KITAB NU TUMPU ALLA LELE MA'IMAI'

Tumpu momputusi to bansa-bansa

¹ Tumpu notatae, “Langit atina'mo na kajojoongan-Ku, ka' tano' katinjoan nu tengkeng-Ku. Jadi laigan anu mosia na anu nu bauakon hi beleng-Ku, ka' tampat iya mae na pombauan nu beleyum bau jojoongan-Ku?

² Songko-songko na dunia aiya, anu binau nu limang-Ku, saba' iwi-iwi' aijo' binaumo. Panyo anu Ku inde'i, aijo'mo mian anu ma'ima' na kinyonyoanyo, anu mongakui to dosa-dosa'nyo, anu mabuhuk ka' tulu-tulutan hi beleng-Ku.

³ Panyo bansa haha aijo' ola mosi bau pongka'oho' nu aha; aha sanang hondo na monsombah mae panyo bau-baunyo anu okahegati. Hi aha madi' ko bedanyo: mongkolobanakon sapi' lakinyo ka' mongkolobanakon mian, mongkolobanakon anak nu domba ka' mompato'akon gogohong nu dedeng; monsombahkon gandum ka' mongkolobanakon baso' nu bau', mompapui kamangian ka' monsombah patong.

⁴ Kalana aijo' Aku suele mombauje yayamo pongka'oho'-Ku ka' mompokonamo hi aha iwi-iwi na balaa' anu nukabuhuk nu aha. Kalana salatan Aku nolagamo madi' ko anu nontaami mae; salatana Ku notataemo madi' ko anu nompotombihing mae; Lebe nuka'ima'i nu aha na panggaga hi beleng-Ku, Aku nombaumo anu ma'idek.”

⁵ Potombihing apaa na anu nutaloakon nu Tumpu, o, belemiu anu mabuhuk ka' montuluti Ia, “Kalana belemiu tulu-tulutan hi beleng-Ku, daagi' ko anu atina' hi bangsa nu belemiu na anu mongka'ideki belemiu, ka' madi' mongka'oho' mosangalu tiba belemiu. Aha ola mompopo'ambang belemiu ka' potatae, ‘Bakas da Tumpu mompotoa katalasanggoan-Nyo, da kami montoa belemiu lame'mo.’ Panyo posi ahamo ahi' na na'ambang.

⁶ Potombihing! Daagi' ko onyi' nu lintup i kota'; daagi' ko potatae lengkat mae i Laigan-Ku; aijo'mo potataeng-Ku anu hau-haunyomo mombalosakon sampobali'!

⁷ Kota'ku anu susi' sumomo samian na tina anu mohampeakonmo padahan ma'isa pe'e nongka'oa'i anu nompohampemo anak mo'ane padahan ma'isa pe'e nongoa'i sakit nu nompohampe.

⁸ Ihe na tohomo nohongo han anu sumo aijo'? Ihe na toho'mo nontoa kajadian anu sumo aijo'? Panyo bansa Israel i hampemo tempo'nyo Sion mulaimo nongoa'i sakit nu mohampe.

⁹ Boli monsangka Aku momboa mian anu palesayamo hi beleng-Ku sampe toka na tempo'nyo opohampeamo ka' madi' mompojohok aha opohampe.” Sumo aijo' na koonyo nu Tumpu.

¹⁰ Balame-lame'mo tiba Yerusalem, o mian iwi-iwi' anu mongka'milui ia. Komiu anu sinusa'mo kalana ia, uuka aiya timbalimo balame-lame'.

¹¹ Belemiu mongoa'ije ka'ima'an nu kantumuu'an, susumo samian na anak monsusu hi tinanyo.

¹² Kalana Tumpu notataemo, “Belemiu Ku bee'ije kabilahian susumo kaunyo anu mo'ili; kakaya'an nu to bansa-bansa nuboaje mae hi belemiu susumo kanyo anu mosawe'mo. Belemiu sumomo anak anu oposusu ka' otangkung nu tinanyo, ka' osapu-sapumo aijo' tangku-tangkung hi ia.

¹³ Ku hase'je na belemiu i Yerusalem susumo samian na tina anu mohase' anaknyo.

¹⁴ Nontoa aijo', belemiu lame'je, ka' tinimbalimo mahoson ka' bikas susumo hemput anu montampu'unije tumuu'. Sahingga to posa-posaihon-Ku mongoa'ije kakuasa'an-Ku o-sampobali'-Ku mongoa'ije tambuha'-Ku.”

¹⁵ Memang, Tumpu tokamo mae tiba apu; Ia monsake'imo mae kareta-Nyo susumo antong anu daka' hondo, da mompotudunmo tambuha'-Nyo, ka' monsegaimo hoso-hoson.

¹⁶ Kalana iwi-iwi' na mian anu kosala'nyo nuhukumo nu apu tiba bajak, ka' manjoo'mo na anu i hukum mate.

¹⁷ Tumpu notatae, “Iwi-iwi' na mian anu momposusi'mo butongnyo ka' modoso'mo lantas mambamo i ale' anu lewa' ponsomban pilogot ka' monsombahmo aha saidi' mae mingkotmo tiba to mia-mian anu mongkaan bau' tiba bokoti' ka' mule' anu okaan sangga'at oka-okahumimi'i.

¹⁸ Ku sumbu' na pikilan tiba palabuatan nu aha. Aku toka mae momposihuk to mia-mian anu lengkat mae isongko-songko na bansa. De aha sihukmo aha montoamo kuasang-Ku.

¹⁹ Aku mompo'una'mo sa'angu' na tanda aijo' hi aha. Madi' manjoo' na anu aijo' hi aha na anu Ku posalamat. Aha Kusai mamba hi to bansa-bansa, ilipu' anu toto jo'o-jo'on, anu ma'isa toho' nohongo lele mongkona Aku kabai nontoa katalasanggoan tiba kuasang-Ku: mamba i Spanyol, i Libia, tiba i Lidia tiba anu to pande-pande na mompana', mamba i Tubal, tiba i Yunani. Aha saidi' mae mombebakonmo katalasanggoan-Ku i bansa haha aijo'.

²⁰ Lengkat mae ilipu' haha aijo' nu boamo mae nu aha na to utu-utus nu belemiu anu bubuu' bansa nu belemiu salaku palasen anu obee' hi beleng-Ku. Nu boamo mae nu aha na mian haha aijo' i puge'nyo anu susi' anu Aku na tumpunyo i kota' Yerusalem monsake'i mae ajahan, keledai tiba unta ka' mule' kareta tiba loda susumo kabiasa'an nu aha Israel momboa palasombahan i Laigan nu Tumpu aijo'mo gandum anu o'isi i gumbang anu belesi'.

²¹ Sambagian na aijo' aha Ku pojadimo imam tiba mian nu Lewi.

²² Susumo langit anu salaje binau tiba tano' anu salaje binau satataapnyo madi' ko kamingkotannyo kalana kuasang-Ku, sumo aijo' mule' na lee' nu beleyum tiba sanggo nu beleyum satataapnyo madi' ko kamingkotannyo.

²³ Salatan Bitu'onmo anu sala'je bete' ka' mule' salatan sinaamo nu Sabat iwi-iwi' na manusia tokamo mae monsombah Aku i kota' Yerusalem.

²⁴ De aha mambamo, aha montoamo bangke' nu to mia-mian anu notomuhukmo hi beleng-Ku. Las anu mongkaanmo bangke' nu aha madi' ahi' silaka, ka' mule' apu anu nompapuimo aha madi' ahi' mate: han aijo' de otoa memang ahi' talalomo okabuhuk nu mian iwi-iwi'.” 167