YESAYA 55 - KITAB NU TUMPU ALLA LELE MA'IMAI'

Tumpu kokahanda'mo mongkalibosi

¹ Tumpu notatae, “Imbo'mo na belemiu iwi-iwi' anu negotmo, inummo na uee anu sinadiamo. Toka mae na belemiu anu madi' ko doinyo, talimamo na gandum madi' opai oli, ka' kaanmo! Anggur ka' susu sinadiamo, alamo atina' ola obee'.

² Bau apaa na mongoli tulu-tulumo anu madi' moko pa'osa, ka' bau apaa na mokalaja de madi' momposanang? Batukimo na palentang-Ku, da belemiu mongkaan anu ma'ima', ka' molasaimo kaanon anu matami'.

³ Potombihing mae obansang-Ku, tokamo mae hi beleng-Ku, belemiu Ku bee'ije kantumuu'an anu totu'unyo. Kalana kalibosan ka' kanonongan anu jinanji'-Kumo hi Daud, Aku nontoongimo palajanjian anu madi' ko kamingkotanyo tiba belemiu.

⁴ Totu-totu'unyo, ia Ku pojadimo timbali bau polaya' ka' talenga', sakisi nukuasang-Ku toka hi to bansa-bansa.

⁵ Belemiu molagaje to bansa-bansa anu salipu'an mae, ka' aha sampaje toka mae hi belemiu, kalana Aku, Tumpu nu belemiu, Tumpu nu Israel anu susi', kalana Aku nompopodaka'mo sanggo nu belemiu.”

⁶ Pinsusule'mo hi Tumpu da daagi' ko kasampatan poto'imo pa' apaa na okahanda'i hi Tumpu da Ia daagi' ohani.

⁷ Tionyo ahi' mian anu ma'idek na gau'nyo mombabali'i kantumuu'annyo, ka' mombali'i pikilannyo. Sahanyo ahi' ia minsusule' mae hi Tumpu, da mohumpak pangasihan-Nyo. Tionyo ahi' ia po ule' mae toka hi Tumpunto, kalana Tumpu mongampuni nu kinyonyoa anu ma'ima.

⁸ Tumpu notatae, “Pikilan-Ku misa' sumo pikilan nu belemiu ka' jalan-Ku misa' sumo jalan nu belemiu.

⁹ Sumo kotangkasnyo nu langit i buan nu tano' sumo atina'mo na kotangkasnyo nu pikilan-Ku molingkudui pikilan miu, ka' jalan-Ku molingkudui jalan nu belemiu.

¹⁰ Susumo ujan tudun lengkat mae i langit, ka' madi'mo nobalik, panyo mohumpisimo tano', nompa'omuk tano' ka' mompotumuu'mo sosu'anon, mohasinakonmo bua'nyo anu osu'an ka' anu o kaan,

¹¹ sumo atina'mo suele na potatae anu tinaeakon-Kumo mai' mobalik mae hi beleng-Ku ola palasuma panyo ko hasinnyo mombau apaa na anu Ku kahanda'i, ka' montokai iwi-iwi' na anu Ku kahanda'i.

¹² Belemiu mompala'imo mae Babel ka' sanangmo hondo, ka' oboamo minsusule' ma'i-ma'ima'. Bungkutnyo ka' puge'nyo lame'mo ka' montatigalaimo to kau-kau' aijo' i ale' nohapa'imo lima.

¹³ Kau' lontio' mombolosakonmo kuhat kohi'nyo, bunga-bunga anu sinu'an nombolosakonmo kuhat. Aijo' jadimo da Aku talapuji'mo salaku tanda anu madi' okolilimi sidu-sidutu'.”