YESAYA 54 - KITAB NU TUMPU ALLA LELE MA'IMAI'

Kalibosan nu Tumpu hi Israel

¹ O, Yeruslaem, u'utu mae beleyum sumo boune anu lengke' anu madi' moko ala monganak. Panyo uuka aiya balame-lame'mo, ka' bila-libahimo na manyanyi! Kalana to ana-anak nu beleyum manjoo' hondo, molingkudui anak nu boune anu madi' nupala'i nu langkai'nyo.

² Po'ewamo na kema kajojoongan nu beleyum; pomantan na ponsegotinyo ka' pohoson na pontotolinyo!

³ Beleyum mompaka ewamo kowi ka' koanan, belemiu monjojoongimo tano' nu to bansa-bansa ka' monjoongimo kota' haha aijo' anu uuka aiya i liingmo hondo.

⁴ Boli mabuhuk, beleyum madi opopo'ambang; madi'mo o, alu ka' lewa' mahasasungonan. O kolilimimo nu beleyum na beleyum madi' namomong tempo'nyo daagi' olitau; madi'mo daagi' monginau' na beleyum iliing tempo'nyo beleyum binalumo.

⁵ Anu nompotimbalimo beleyum sumomo ahi' langkai' nu beleyum, Tumpu Israel anu susi' aijo'mo na anu Momposalamat beleyum. Tumpu Anu Daka' na Kuasanyo, atina'mo na sanggo-Nyo, Iamo na Tumpu anu mongkuasai songko-songko na dunia.

⁶ O Israel, beleyum sumomo bengkele' nu mian anu daagi' langkoyang anu nolibosmo kalana pinala'ianmo nu langkai'nyo. Panyo Tumpu po'ule'mo nolaga beleyum ka' notatae,

⁷ “Ola sasaingoni' na aku mompala'i beleyum; po'ule Ku ala na beleyum kalana okalibosi hondo.

⁸ Ola sasaingoni' na Aku madi'mo montonto'i beleyum, kalana tambuha'-Ku talalomo ahi. Panyo kalibosan-Ku anu madi' ko kamingkotannyo na mongkalibosi beleyum.” Sumo aijo' na koonyo nu Tumpu anu Momposalamat beleyum.

⁹ “Susumo tempo'nyo i Nuh Aku binalajanji'mo saba' uee anu talalomo hondo nosawe' madi'mo daagi' po ule' moleetabi dunia, sumo aijo'mo suele na Aku balajanji' saba' Aku madi'mo daagi' ma'idek kabai kahanda' mompatei mule' belemiu.

¹⁰ Maumo to ahi' bungku-bungkutnyo ka' puge'nyo iwi-iwi' gayu'anmo, Aku madi' belenti na mongkalibosi beleyum. Paladamean anu jinanji'-Kumo saja' Ku toongi,” na koonyo nu Tumpu anu mongkalibosi beleyum.

Yerusalem anu poule'mo binau

¹¹ Tumpu notatae, “O Yerusalem, kota' anu sinusa'mo, beleyum madi'mo moko ala mombau apa-apaa ka' madi'mo ko anu momposanang kinyonyoa. Pundasinyo haha aijo' po'ule'mo Ku bau akon, tiba to batu-batu anu halaga'nyo mahan.

¹² Bentengnyo haha aijo' batu dalimaje na Kubau to saba-sabatan anu toto daka-daka' batu mainanje na kubau to paga-pagan mesen nu beleyum intanje na obau.

¹³ Iwi-iwi' na mian anu jojoong hi beleyum timbalimo to muli-mulid-Ku, aha sanangmo ka' bilahimo na kantumuu'an nu aha.

¹⁴ Beleyum binaumo i uno nu kaadilan, madi'mo daagi' ko anu okabuhuk ka' kasansala'an.

¹⁵ De beleyum otumbuhi mae misa' Aku na nonsai, maumo pa' ihe na molambani mae beleyum tionyo ahi' motua'mo.

¹⁶ Akumo na nompotimbali topo tutuk besak anu nombusaimo apu da montutuk toongon bau pimuhuk. Akumo suele na nompotimbalimo suludadu anu mompake toongon aijo' da pompateimo.

¹⁷ Panyo toto sa'angu' na toongon anu tinutukmo mongewa beleyum, madi' kino hasinnyo. Ka' toto sa'angu' na tuduhan i uno nu pomputusianmo palakala nu pobukutimo taalu aijo' sala'. Ku bee'ije palasen salaku tanda imenangmo hi to posa-posaihon-Ku,” sumo aijo' na koonyo nu Tumpu.