YESAYA 48 - KITAB NU TUMPU ALLA LELE MA'IMAI'

Tumpu na balakuasa aiya mae i ahop

¹ Potombihing mae o, belemiu lee' i Yakub, lee' mae i Yehuda anu nompakemo sanggo Israel, beleyum notatae, tukooyum beleyum nongakuimo Tumpu nu Israel, ka binasumpa'mo i uno nu sanggo nu Tumpu. Panyo potatae nu beleyum aijo' madi' sahondo-hondonyo.

² Maumo sumo aijo' na beleyum mongakui totu-totu'u, tukooyum, beleyum mian anu jojoong ikota' anu susi'; ka' memang ahi' beleyum montaha'imanimo Tumpu Israel anu osa-osanggohi Tumpu Anu Daka na Kuasanyo.

³ Tumpu notatae, “Potombihing mae o, Israel! Apaa na anu jinadimo naipuan mae, pininmo na sola' pinoto'ing-Ku; apa na anu pinoto'ing-Kumo monti-montiik ahi' Ku baumo ka' Ku baumo ahi' salaku han anu timbali otoa.

⁴ Ku sumbu' na beleyum panggaga ahi' hondo madi' hondo mohongo-hongo.

⁵ Sahingga naipuan pe'e mae polo'mo kinila-kilang-Ku; ma'isa pe'e jinadi polo'mo kinila-kilang-Ku, da beleyum bolimo motatae, tukooyum aijo' palabuatan nu to pato-patong nu bapilogotan nu beleyum.

⁶ Iwi-iwi' apa na anu pinoto'ing-Kumo anu jadi aiya mae i ahop, anu iho-ihongomo nu beleyum jinadimo; beleyum tionyo ahi' mongakuimo taalu' potataeng-Ku aijo' memang ahi' totu'u. Uuka aiya Ku poto'i mule' na hahan anu ma'isa toho' jinadi, iwi-iwi na lahasia anu ma'isa sinumbu' nu beleyum.

⁷ Uukaje aiya na Ku potimbali ka' misa' anu u'utu mae; ma'isa toho' ihongo nu beleyum na han aijo', da beleyum madi'mo daagi' moko ala motatae, tukooyum polo'mo sinumbu' nu beleyum na aijo' iwi-iwi'.

⁸ Ku sumbu' na beleyum madi' timbali opalesaya, naipuan pe'e mae na beleyum tinalasanggomo mian anu palaganta. Mokonyo aijo' madi' nu sumbu' nu beleyum, mau santaa' pe'e na potatae, madi' ko anu tinoka ibihing nu beleyum.

⁹ Aku nongintimo tambuha'-Ku da sanggong-Ku talasanggo iyaya mae, Aku nongintimo tambuha' aijo' hi beleyum da beleyum boli osilakai.

¹⁰ Aku nonguji'mo beleyum i uno nu apu kasansala'an susumo salaka sinuangmo i uno nu apu.

¹¹ Aijo' binaung-Kumo kalana kapentingan-Ku, kalana madi' Ku pojohok na sanggong-Ku ohumimi'i; kaholomatan-Ku madi' Ku bagi maumo pa' hihe.”

I Kores aijo'mo na polaya' anu pinile'anmo nu Tumpu

¹² Tumpu notatae, “Potombihing mae Israel, mian anu ilagang-Kumo, Aku na tataap ahi' Tumpu nu beleyum Akumo na anu momonanyo mae, ka' Aku mule' na anu imihinyo mae.

¹³ Limang-Kumo aiya na nompokoko lananyo nu tano' ka' mule' nomboka aita' langa. De bisuanyo Ku lagamo na sanggo nu aha tokamo mae na aha malia-lia'.

¹⁴ Sihukmo mae na belemiu iwi-iwi' ka' potombihingmo mae! Aha aijo' to pilo-pilogot madi' ko anu nongkila-kila ahi' mian anu pinile'an-Kumo montumbuhimo Babel; ia mombaumo apaa na anu kinahanda'an-Kumo.

¹⁵ Akumo na anu nompoto'imo ka' mule' anu nolagamo ia, anu lewa'mo nompotiju' ia, sahingga ia ningkalianganmo.

¹⁶ Tokamo mae oha-ohani hi beleng-Ku, ka' potombihing mae, naipuan pe'e mae madi' pinohowining-Ku na nompoto'i; ka' potataeng-Ku saja' ko bukutinyo na anu Ku bau.” Uuka aiya Tumpu nonsaimo mae aku ka' kuasanya-Nyo binee'-Nyomo mae hi belengku.

Tanga'an nu Tumpu hi mian anu palesayamo hi Ia

¹⁷ Koonyo nu Tumpu nu Israel anu susi' anu Momposalamatmo beleyum, “Akumo na Tumpu nu beleyum anu nompogulu'mo hi beleyum apaa na anu mingguna hi beleyum, ka' nompotiju'mo beeyum jalan anu tionyo ahi' otului.

¹⁸ De bisuanyo beleyum mongintomakon ahi' palentang-Ku, saba' kantumuu'an nu balayum ma'ima'mo susumo kaunyo anu madi'mo toho' mo'oti, ka' mule' kadale'an nu beleyum sumomo bokon akaong i ambai, anu madi' toho' belenti.

¹⁹ Lee' nu beleyum timbalimo manjoo' susumo bone'; Aku na mompalakai aha sahingga madi' osilakai.”

²⁰ Lako'mo popalai ka' bolimo jojoong i Babel, ka' bebakonmo na lele aiya toka-toka iyaya mae. Poto'imo ka' pontaligalaimo lame-lame': “Tumpu nomposalamatmo posaihon-Nyo aha Israel!

²¹ Maumo ahi' Ia nompotiju'mo aha nontulu mae padang tampat anu kinunmo, aha madi' ahi' sinansala nu megot. Tumpu nombiha'mo bungkutnyo nu batu ka' nompolubatmo mae uee, lengkat mae aijo' ibatu pinolubat-Nyomo mae na uee bau kapalaluan nu aha.

²² Madi' ko kasalamatan hi aha mian anu ma'idek na palabuatannyo,” sumo aijo' na koo-Nyo nu Tumpu.