YESAYA 47 - KITAB NU TUMPU ALLA LELE MA'IMAI'

Babel oputusimo

¹ Tumpu notatae, “O, Babel pintatau', bolimo sumuhang atina' ikadela nu beleyum, ka' suhangmo i abu'. Beleyum madi'mo nompokopiani butong ka' madi'mo natopos susumo naipuan mae.

² Gilingmo na labu nu batu; buka'mo na kokudung nu beleyum, hangkat na baju' nu beleyum da kantoan na bitis nu beleyum, ka' taapmo na kaunyo iwi-iwi.

³ Da nu toa nu mian na beleyum ilanggo'mo, o, alumo ka' opopo ambangmo. Ku balosakonmo na idek nu kinyonyoang-Ku hi beleyum, ka' madi'mo daagi' ko samian na Ku pobebas.”

⁴ Tumpu nu Israel anu susi' mompobebasmo kita, sanggo-Nyo Tumpu Anu Daka' na Kuasanyo.

⁵ Tumpu notataemo hi Babel, “Bolimo mombau apa-apaa, ka' pinsoopmo i uno nu pikat. Beleyum madi'mo daagi' osanggohi ‘Tomundo' boune nu to kalaja'an-kalaja'an.’

⁶ Naipuan mae Aku nontambuha'imo mian anu palesayamo hi beleng-Ku, aha madi'mo daagi' Ku anggap Aku na tumpunyo, Lantas aha Ku bee'mo hi beleyum, ka' beleyum madi'mo nongkaliboso aha, ka' mule' to tu'a-tu'anyo pinosansalamo nu beleyum taha-tahahu.

⁷ Nu sangka nu beleyum, beleyum timbalimo tomundo' boune sampe toka sidu-sidutu', ka' madi' mompangalati'i kabai mompopikilakon ka ahenannyo mae.

⁸ Kalana aijo' potombihing mae na Aku, o, beleyum anu mongka'ima'i molio kasanangan! Pa' koonyo nu beleyum, kantumuu'an nu beleyum madi'mo ko anu mompoposia, ka' madi'mo ko anu pokakana susumo beleyum. Pa' koonyo nu beleyum, beleyum madi' mule' timbali balu, ka' kantumuu'an nu beleyum madi' mule' silaka.

⁹ Panyo ola sasaingoni' i uno nu sansinaa, ohu-ohua' na han aijo' monsainjadi-jadimo hingga-hinggat. Maunyomo ahi' beleyum mompakemo ponsumbu'an tiba do'a-do'a, langkai' nu beleyum tiba anak nu beleyum ohahumbitakonmo ahi' hoso-hoson.

¹⁰ Nu oa'i nu beleyum madi' ko anu mompoposia na beleyum mombau anu ma'idek, nu tutugi na palabuatan nu beleyum madi' opotomatakon. Beleyum sinala'mo na binapikin kalana sinaduakonmo nu kapandean tiba ilimu' nu beleyum, nu sangka nu beleyum madi'mo ko anu pokakana susumo beleyum.

¹¹ Panyo beleyum nu tokaimo mae nu balaa', ilimu' ponsumbu'an nu beleyum madi' moko ala mompoluput beleyum. Beleyum saidi' mae nu tokaimo mae nu kasilaka'an, ka' madi' ahi' opoko ala opimpali nu beleyum. Balaa' aijo' monti-montiik ahi' tokamo mae ka' madi' pinoko ala sinangka-sangka nu beleyum na han aijo' pa' jadimo mae.

¹² Kinyonyoaimo ahi' totu-totu'u na do'a-do'a tiba ponsumbu'a nu beleyum iwi-iwi', anu saja'mo nomposibuk beleyum salatanmo pe'e beleyum daagi' ana-anak. Ihe na monsumbu' aijo'memang ahi' mingguna hi beleyum, da bau ponggala-gala sampobali' nu beleyum.

¹³ Beleyum malawemo kalana manjoo'mo na pokinde'. Pokau da toka mae na to mia-mian anu saja' mongkila kila; mian na momposalamat beleyum, aha anu sola'mo nonselidiki iwi-iwi na langit songko-songko, ka' lewa'mo nonggulu'i apaa na alati'nyo nu mandala' toto sa'angu'. Ka' salatan bitu'onmo anu sala'je mae bete' mongkila-kilamo apaa na anu jadi ibutong nu belemiu.

¹⁴ Soba toa, aha sumomo ahi' hat anu nu kaanmo nu apu; madi' ahi' nu poko ala nu aha na mosi posalamat butong nu aha! Moak nu apu aijo' talalo ahi' mapanas na nu oa'i nu aha, misa' panas nu apu anu bau pinjohuan.

¹⁵ Aijo' na gunanyo nu aha anu lewa' mongkila-kila kantumuu'an nu belemiu, anu nomposibukmo beleyum salatanmo pe'e beleyum daagi' ana-anak; toto samian mambamo mompala'i beleyum, madi' ko anu toka mae montulungi beleyum.”