YESAYA 42 - KITAB NU TUMPU ALLA LELE MA'IMAI'

Posaihon nu Tumpu

¹ Tumpu notatae, “Aiyamo na posaihon-Ku anu Ku tinjohi, mian anu pinile'au-Kumo ka' mule' anu nomposanangmo kinyonyoang-Ku. Kuasang-Ku binee'-Kumo hi ia, da momboa ka adilan hi toto sa'angu' na bansa.

² Ia madi' moloboo' kabai motatae daka-daka', potataenyo madi' kahongoan ijalan.

³ Balo anu nopekokmo madi' opato'akon, sulu' anu mongkokihomo madi' opoho'. Tulu-tulutan hondo na ia mompoto'i han anu totu'u,

⁴ madi' bimbang kabai hentemo na kinyonyoa, sahingga ka adilan otoongimo i dunia aiya. Lipu' anu toto jo'o-jo'on mongindimo pangajalannyo.”

⁵ Tumpu nompotimbalimo ka' mule' nombokamo langit; Ia nontali'mo dunia ka' mule' iwi-iwi' na anu tumuu' i unonyo. Ia nombee'imo mian santuu' da tumuu' tiba kinyonyoa. Ia nompoto'imo potuunon aiya hi posaihon-Nyo,

⁶ “Aku, Tumpu nolagamo ka' nombee'imo pakalaja'an beleyum da mompojalanmo ka adilan. Beleyum Lewa'mo Ku pangajali ka' mule' Ku potuu'mo da baumo palajanjian hi aha mian ka' mule' baumo jingka hi aha iwi-iwi' na bansa.

⁷ Da mombuka' mata nu mian anu napisokmo, ka' mule' mompobebasmo mian da bolimo pintung i uno nu talungku'.

⁸ Akumo na Tumpu, aijo'mo na sanggong-Ku; kaholomatan-Ku madi' Ku bee' maumo pa' hihe; katalasanggoan-Ku madi' suele Ku bee' hi patong.

⁹ Uuka aiya anu lewa' kinila-kilang-Ku memang jinadimo; Aku kahanda'mo mompoto'i hahan anu ma'isa toho' jinadi; ma'isa pe'e han aijo' jadi polo'mo Ku poto'i hi beleyum.”

Nyanyian anu bau pompuji'

¹⁰ Nyanyiakonmo hi Tumpu na nyanyian anu salaje' ingajan, puji'mo na Ia, o, belemiu songko-songko na dunia! Pombuhokmo mae o, ndalangon ka' iwi-iwi' na anu jojoong i unonyo, lipu' anu toto jo'o-jo'on ka' iwi-iwi' na anu monjojoongi!

¹¹ Tionyo ahi' padang tampat anu mateges ka' iwi-iwi na kota'nyo mompuji'mo Tumpu, sahanyo ahi' anu jojoong i Kedar mompuji'mo Ia! Tionyo ahi' anu jojoong i kota' Sela lewa'mo montaligalai ka' lewa' moloboo' aita' mae ibungkutnyo!

¹² Sahanyo aha mongholomatimo Tumpu, ka' mompolelemo Ia iwi-iwi na lipu' anu toto jo'o-jo'on.

¹³ Tumpu mambamo mahampate susumo samian na talenga' susumo samian na suludadu anu binanimo na mahampate. Ia nongaisakonmo ais nu pahampatean, ka' nompotoamo ka untungan-Nyo mahampate de mongewamo sampobali'.

Tumpu binalajanji'mo montulungi mian anu palesayamo hi Ia

¹⁴ Tumpu notatae, “Pininmo hondo na Aku madi'mo notatae; Aku nomohokotmo ka' sinabaanmo. Uuka aiya tinokamo na tempo'nyo da mombaumo apa-apaa, Aku moloboo'mo susumo boune anu mompohampemo anak.

¹⁵ Bungkutnyo tiba puge'nyo Ku potimbalimo tano' anu kuunmo, Iwi-iwi' na anu tumuu' ikiijo' Ku potimbalimo magayou. Iwi-iwi na bangka'nyo nu kaunyo Ku abali'mo da timbalimo padang tampat anu mateges, iwi-iwi' na dowiwi Ku po'otimo.

¹⁶ Bansang-Ku anu napisokmo Ku taka'mo montulu jalan anu madi' nu sumbu' nu aha; aha Ku taka'mo montulu jalan anu madi' nu sumbu' nu aha. Kapintungan Ku potimbalimo da majingka hi aha, ka' jalan anu milebo-lebok Ku pohatamo. Aijo'mo na anu Ku bau hi aha, ka' memang ahi' Ku baumo.

¹⁷ Mian anu palesayamo hi patong nu pilogot, ka' mongakuimo ia salaku tumpu nu aha, saidi' mae o, alumo ka' mule' opopo ambangmo.”

Israel madi' mongka, oho' obee' pangajalan

¹⁸ Tumpu notatae, “Potombihing mae o, to mia-mian anu mabongon! Soba toa, o, to mia-mian anu mapisok!

¹⁹ Ihe na anu lebe mapisok molingkudui Israel posaihon-Ku? Ihe na lebe mabongon molingkudui anu sinaing-Ku mompotoka potuunon-Ku.

²⁰ O, Israel, manjoo'mo na anu tinoa nu beleyum panyo madi' nu palahatikan, bihing nu beleyum tabuka' panyo madi' beleyum mohongo.”

²¹ Tumpu situjumo na momposalamat; Ia mongkahanda'i da atulan-Nyo oholomati ka' opopodaka'.

²² Panyo bansa aijo' lapasmo binulingan; aha pinojoongmo i uno nu salipi' anu kaiyong i uno nu tano', ka' pinaha po, isimo i uno nu talungku', Ahamo aijo' na anu pinahabulingmo mae, ka' madi' ko anu tinoka mae nontulungi.

²³ Ihe na anu atina' hi belemiu mongka'oho' mompotombing han aiya, ka' saja' ahi' sabole-boleh mompalahatikan?

²⁴ Ihe na nombee'mo Israel da pinahuhuakon? Temisa' Tumpu ahi'? Hi Iamo na kita binaladosa'mo, kita madi'mo tinumuu' nombatuki palentah-Nyo, ka' madi'mo nontuluti pangajalan-Nyo.

²⁵ Sahingga binau-Nyomo nakita da nonta'up tambuha'-Nyo anu taha-tahahumo, ka' nongoa'imo kasansala'an kalana talalomo ahi' na lewa' nahampate. Tambuha'-Nyo nontoyo'imo Israel susumo apu, panyo kita madi' ahi' sininsumbu', ka' madi' binalagulu' ihan anu ingoa'antomo.