YESAYA 41 - KITAB NU TUMPU ALLA LELE MA'IMAI'

Tumpu nompoyakinmo Israel

¹ Koonyo nu Tumpu, “Pomohokotmo ka' potombihing mae na Aku, o, to mia-mian anu jojoong ilipu' anu toto jo'o-jo'on. Balasadiamo ka' mangadapmo hi mian kopian, lajangmo ka' poto'imo na palakala nu beleyum. Imbo' da kita opalesamo hingga-hinggat. Da oputusimo pa' ihe na anu totu'u kabai pa' ihe na sala'.

² Ihe na nompotuka anu balakuasa lengkat mae i kabete'an ka' saja'mo nompo untung ia nahampate? Ihe na nontulungi ia sahingga nompatundu'mo bansa-bansa ka' mule' nohungku'imo to tomu-tomundo' tina aluk hi ia? Bajaknyo na nombau aha da nohintutu susumo abu', pana'nyo na nompotatabumo aha susumo hat pinuhakonmo nu mombun.

³ Ia saja'mo nololoi' ka' namba madi' koanu labot nohalangi; tengkenyo malia' hondo mompai madi'mo tudun ijalan.

⁴ Ihe na nombaumo iwi-iwi' aijo'? Ihe na nontantukanmo da kinosisikonnyo? Aku, Tumpu, Akumo na anu momona, ka' tataap sabole-boleh daagi' sampe imihinyo mae.

⁵ Mian anu jojoong ilipu' anu toto jo'o-jo'on nontoamo mae apaa na anu binaung-Kumo. Aha tinolokengkengmo ka' ilakatnyomo kalana nabuhukmo, lantas sinihukmo hingga-hinggat ka' tinokamo mae.

⁶ Iwi-iwi' na mian nompaha tulu-tulungimo, ka' nompaha bebee'imo pikilan da mahoson nakinyonyoa.

⁷ Tukang kau' mompohoson kinyonyoa nu tukang mosoni' mian anu momponipis logam nu malatelu, mompuji' mian anu montutuk ilandasan. Ia notatae, ‘Ma'ima' hondo na pakalaja'an nu beleyum’; lantas pinaka pohosonnyo mule' nu paku' da madi' gayu'an.

⁸ Panyo beleyum Israel posaihon-Ku, mian anu pinile'an-Kumo beleyum lee' mae i Abram, sampobela'-Ku.

⁹ Beleyum ingalang-Kumo lengkat mae i pupus nu tano' ilagang-Kumo lengkat mae itampat anu toto jo'o-jo'on. Aku notatae, ‘Belentomo na posaihon-Ku; Aku sabole-boleh ahi' montalima anu pinile'an-Kumo.’

¹⁰ Boli mabuhuk kalana Aku na monsangalui beleyum, boli baat-bata, kalana Aku na Tumpu nu beleyum. Beleyum Ku pokododomo ka' Ku tulungimo, Ku taka'mo nu limang-Ku anu timbali otaha'imani.

¹¹ Soba toa na mian iwi-iwi' anu notambuha'mo hi beleyum, opatundu'mo ka' ma, ambangmo hondo. To mia-mian anu madi' tulut hi beleyum, silakamo ka' ingkoting.

¹² Beleyum moliomo aha to mia-mian anu madi' tulut hi beleyum, panyo madi' nu kabot na aha. Aha to mia-mian anu nahampate nongewa mae beleyum uuka aiya singkapmo sinilaka ka' imadi'anmo.

¹³ Kalana Aku, Tumpu, Tumpu nu belemiu nontoongimo ‘lima koanan nu beleyum.’ ”

¹⁴ Tumpu notatae, “Boli mabuhuk, Israel, maumo ahi' beleyum ise' ka' madi' mahoson. Aku Tumpu na montulungimo beleyum, Anu Susi' hondo, Tumpu nu Israel aijo'mo na Momposalamat beleyum.

¹⁵ Soba toa, pinotimbalimo nu Beleyum na aku susumo dopi' anu bau pongututan, anu salaje binau, matajom ka' kobese'nyo uanjiji' Beleyum mongututmo bungkutnyo iwi-iwi' ka' mohansunimo; puge'nyo iwi-iwi' nu potimbalimo susumo ota'.

¹⁶ Beleyum montapimo aha lantas aha nu lahabakonmo nu mombun ka' nu sagakonmo nu antong anu daka'. Beleyum lame'mo kalana Aku, Tumpu, ka' bilahimo kalana Aku, Tumpu nu Israel.

¹⁷ De bansang-Ku sisinoe'mo aijo' moliomo uee, ka' gogohong nu aha pakamo kalana negotmo, saba' Aku, Tumpu na montaamije do'a nu aha; Tumpu nu Israel na madi' ahi' mompala'i mian anu palesayamo hi Ia.

¹⁸ Ku bauimo kaunyo da mo ili ito puge-puge'nyo anu madi' ko anu montumuu'i; mata nu uee lubatmo, mimbulalakmo mae itotonga' nu katano'an. Padang tampat anu mateges Ku potimbalimo talaga; uee lubatmo mae lengkat itano' anu kinunmo.

¹⁹ Padang tampat anu mateges Ku su'animo kau' cemara, kau' zaitun, kau' murad, tiba kau' akasia. Padang tampat anu ewa Ku potimbalimo alas, alas nu kau' eru, kau' berangan, tiba kau' cemara.

²⁰ Sahingga iwi-iwi' na mian montoamo ka' monsumbu'mo taalu' Aku, Tumpu, na anu nompotimbalimo. Aha mompalahatikanmo ka' mule' mangalati'mo Tumpu nu Israel anu susi' na nompotimbali aijo' da jinadi.”

Tumpu nompisala'imo to pilo-pilogot

²¹ Tumpu, tomundo' nu Israel, notataemo hi to pilo-pilogot, “Kalakmo mae na palakala nu beleyum, poto'i mae pa' apaa na saba-sababnyo!

²² Tokamo mae, ka' kila-kilamo pa'apaa na anu saidi' mae jadi, da osumbu' mami pa' mosia na ka ahenannyo. Poto'i mae na hahan anu jinadimo naipuan mae, talangkan mae na alati'nyo da opalahatikan mami.

²³ Poto'i mae pa' apaa na anu jadi saidi' mae, da osumbu' mami na belemiu taalu' totu-totu'u ahi' ko kuasa nu Tumpu. Soba bau mae na anu ko gunanyo kabai anu mompolugi', da kami bangang na montoa.

²⁴ Memang ahi' belemiu ka' mule' palabuatan nu belemiu imadi'an ahi', ka' anu nusombah nu belemiu ola da okaideki.

²⁵ Aku nompotukamo samian anu lengkat mae i sasu kabete'an; Ilagang-Kumo na ia da montumbuhimo mae lengkat mae sasu utara. To mia-mian anu balakuasa nu pahampeja'akonmo susumo hensek, susumo mian anu lewa' mombau kuhon tano' mompahampeja'akonmo tano' ponto.

²⁶ Ihe na anu atina' hi belemiu nompoto'imo anu jadi aiya mae i ahop sahingga kami timbali mompototu'u ia? Panyo atina' hi belemiu madi' ahi' ko anu mae nompoto'i, madi' ko anu nohongo belemiu notatae.

²⁷ Aku, Tumpu na momona nompolele hi Sion; Aku na nonsai aku nomboa lele ma'ima' hi aha Yerusalem.

²⁸ Tempo'nyo Aku nolio ia hi aha to pilo-pilogot, madi' kosamian pe'e na nompotiju mae, madi' ko anu noko ala nontaami.

²⁹ Memang pilogot haha aijo' madi' kogunanyo, aha na ola ahi' patong anu sinuang anu madi' moko ala mongkohenggo, ka' madi' ahi' moko ala mombau apa-apaa.”