YESAYA 39 - KITAB NU TUMPU ALLA LELE MA'IMAI'

To mia-mian anu sinai mae lengkat i Babel

¹ Tempo'mo aijo', na tomundo' nu Babel aijo'mo i Merodakh Baladan anak i Baladan nohongo mae i Tomundo' Hizkia sala'je na alin isakitnyo. Sahingga ia nonsaimo mae mian nomboa mae sulat ka' mule' palasena nu obee' hi Hizkia.

² I Hizkia nolabotmo aha anu sinai mae aijo' ka' sinanangmo hondo na kinyonyoanyo ka' nompotoamo iwi-iwi na kakaya'annyo aijo'mo mosoni', tiba salaka, to lampa-lampa, ka' mule' minya-minya' ka' mule' iwi-iwi' na suludadunyo anu pinosadiannyomo. Madi' ko sa'angu' pe'e anu i uno nu laigan nu tomundo' ka' isongko-songko na kalaja'annyo na madi' pinotoanyo hi aha aijo'.

³ Lapas aijo' i Nabi Yesaya nangadapmo hi Tomundo' Hizkia ka' nompokilawamo, “Lengkat mae iya na mian haha aijo'? Apaa na koonyo nu aha?” Tinaamanmo i Hizkia, “Aha aijo' lengkat mae i Babel, lipu' anu majo'on hondo.”

⁴ “Apaa na tinoa nu aha ilaigan nu tomundo'?” na po ule' pinokilawa i Yesaya. “Iwi-iwi na apaa na koonyo i Hizkia. Madi' kobalang anu i no nu laigan nu tomundo' na madi' pinotoangku hi aha.”

⁵ Lantas notataemo na i Yesaya hi tomundo', “Tumpu Anu Daka' na Kuasanyo notataemo,

⁶ ‘Saidi mae tokaje na tempo'nyo iwi-iwi na kakaya'an i uno nu laigan nu tomundo' kajo-kajojoongan nu beleyum ka' anu pinosihukmo nu mompolee' nu beleyum sampe sinaa aiya oboamo i Babel. Madi'mo daagi' ko anu tontuha'.

⁷ Mompolee' nu beleyum daagi' ko anu o, ala ka' ohangkatmo bau pagawe da mokalaja ilaigan nu tomundo' da mombau apaa na anu nu pokauhakon nu tomundo' Babel.’ ”

⁸ Tinaaman i Tomundo' Hizkia, “Ma'ima' mule' ahi' na potuunon nu Tumpu anu pinoto'imo mae nu beleyum atina' hi belengku.” Ia nontaami sumo aijo' kalana tinutugannyo, “Asan kalaja'anku tataap madi' ko anu mompoposia ka' mule' saja' kokadamean hau-haunyo aku daagi' tutuu'.”