YESAYA 36 - KITAB NU TUMPU ALLA LELE MA'IMAI'

Aha mian nu Asyur nompopobuhukmo Yerusalem

¹ Itaun kinosampulu'nyomo ka' opat na itomundo' Hizkia nompalentah salaku tomundo' nu Yehuda, iwi-iwi' na kota'nu Yehuda anu kobentengnyo tinumbuhanmo ka' pinatundu'mo i Sanherib tomundo' nu aha Asyur.

² Lapas aijo' ia nonsaimo suludadunyo anu matangkas na pangkatnyo lengkat i Lakhis namba i Yerusalem tiba suludadunyo manjoo' hondo, mompakisa da i Tomundo' Hizkia ta'alukmo. Aha tinoka ikota' aijo' ka' binatampatmo i, ale' anu osanggohi Ale' Penatu koko sepe' nu uee anu mo ili mae lengkat italaga sasu aita' mae ibuannyo.

³ Lantas aha totolu na pagawe i Hizkia tinokamo mae nonsingkaboti suludadu nu Asyur anu matangkas na pangkatnyo aijo'. Aha totolu' na pagawe haha aijo' aijo'mo i Elyakim anak i Hilkia, anu mongkapalai auan nu laigan nu tomundo', i Sebna julutulis nu negara, tiba i Yoah anak i Asaf, julutulis nu laigan nu tomundo'.

⁴ Suludadu nu Asyur mata-matangkas na pangkatnyo aijo' notataemo hi aha, “Potokakon hi Hizkia na potatae itomundo' nu Asyur sumo uuka, ‘Kadaka' beleyum mongoa'imo butong nu beleyum mahoson?

⁵ Pa' kooyum mau ola motatae moko alamo mombolosakon kapandean tiba kahosonan nu suludadu? Ihe na nu takabunakon sahingga beleyum baanimo na mongewa mae Asyur?

⁶ Beleyum memang montaha'imani bantuan mae nu Mesir panyo aijo' pokakanamo sumo mompake batang nu padang da bau tokon; – saidi' mae tokon aijo' mopato' lantas lima nu beleyum nu susukmo. Sumo aijo'mo na tomundo' nu Mesir ka' mule' kona hi iwi-iwi' mian anu montaha'imani ia.’ ”

⁷ Suludadu nu Asyur mata-matangkas na pangkatnyo aijo' notatae mule', “Kabai ugaat belemiu notataemo, koonyo nu belemiu, belemiu montaha'imani Tumpu nu belemiu? Tempo'nyo i Hizkia nompalentahmo da aha mian nu Yehuda tiba aha mian nu Yerusalem ola ahi' monsombah Tumpu i, ahop nu mezbah anu daagi i Yerusalem, temisa' anu ingideannyo aijo' mezbah ahi' tiba iwi-iwi na tampat ponsomban Tumpu?

⁸ Uuka aiya aku motatae mompake sanggo nu tomundo' Asyur, baani batalo de kota nu belemiu obee'i ohua' na madala na ajahan, tantu madi' komian anu sumo aijo' na konjoo'nyo da timbali monsake'i.

⁹ Sadang mongewa suludadu mata-matangkas na pangkatnyo nu aha Asyur anu ma'isa pe'e talalo otaha'imani na kohosonnyo, belemiu atina' misa' pe'e ahi anu halus mongewa. Panyo belemiu tataap ahi' montaha'imani Mesir ka' nomboaimo mae bantuan kareta anu opake mahampate ka' gombuan nu suludadu anu monsake'i ajahan!

¹⁰ Osangka nu belemiu kami montumbuhi ka' mompatundu' lipu' nu belemiu misa' bantuan nu Tumpu? Tumpu ahi' na nonsaimo kami montumbuhi ka' mohansunimo.”

¹¹ Lantas notataemo na i Elyakim, i Sebna tiba i Yoah hi suludadu nu Asyur mata-matangkas na pangkatnyo aijo', “O, tuan potataemo mae nu basa' nu Aram tiba kami, kami mangalati'. Boli basisik nu basa' Ibrani dumo nu sumbu' nu aha mian da'isan anu aita' ipagan mesen nu kota' aitu.”

¹² Suludadu nu Asyur mata-matangkas na pangkatnyo aijo' nontaamimo, “Te ola toka hi belemiu tiba hi tomundo' nu belemiu na aku pinalentah mae nu tomundo' Asyur mompotoka potatae aiya iwi-iwi'? Aku suele ahi' motatae hi mian da'isan anu paha-paha suhang ipagan mesen aita' anu saidi' mae hingga-hinggat tiba belemiu mongkaan posi anu sala'nyo ka' mule' monginum posi tatidi'nyo.”

¹³ Lapas aijo' suludadu tangka-tangkas na pangkatnyo aijo' tinuminjomo ka' noloboo'mo nu basa' Ibrani, “Potombihing mae apaa na anu pinoto'i mae i tomundo' Asyur,

¹⁴ ‘Boli mongka'oho' nu akali i Hizkia! Ia madi' moko ala momposalamat belemiu!

¹⁵ Boli montuluti apaa na anu pinoto'inyo koonyo da montaha'imani ahi' Tumpu. Boli monsangka Tumpu na momposalamat belemiu kabai montewa' suludadu nu Asyur da madi' mongala kota' nu belemiu.

¹⁶ Boli mohongo i Hizkia! Aku, tomundo' nu Asyur mompoto'i da belemiu mosabat mae atina' ikota' ka' mangakumo kalah. Da belemiu timbali mongkaan bua' nu anggur anu i, ale' nu belemiu ka' monyamit bua' nu ara anu pinosi su'an nu belemiu ka' mule' monginum uee anu iposi bubung nu belemiu,

¹⁷ sampe belemiu ku boamo isa'angu' na lipu' anu momohopokakana lipu' nu belemiu. Ikiijo' mae ko ale' nu anggur anu mimbua' o, alamo nu belemiu ka' mule' ale' nu gandum anu obau labu da okaan nu belemiu.

¹⁸ Boli mohongo i Hizkia! Ia ola mongakali belemiu nu potataenyo tukoonyo Tumpu na momposalamatmo belemiu. Tetoho'mo kino pilogot nu bansa sangga'at timbali momposalamat lipu'nyo da madi' ku kuasai?

¹⁹ Iyamo mae na to pilo-pilogot nu lipu' nu Hamat tiba Arpad? Iyamo mae na to pilo-pilogot nu Sefarwaim? Ihemo na tinoka mae nomposalamat Samaria?

²⁰ Pilogot iya mae na toho'mo nompobebas lipu'nyo da madi' kinuasanku? Iya na moko ala na Tumpu momposalamat Yerusalem!’ ”

²¹ Nohongo potatae aijo' aha mian anu jojoong i Yerusalem madi'mo daagi' nontaami, kalana i Tomundo' Hizkia nompalentahmo da aha momohokotmo.

²² Sahingga i Elyakim, i Sebna tiba i Yoah nombea-beakmo baju' nu aha salaku tanda sinusa'mo lantas nambamo nompoto'i hi tomundo' apaa na anu pinoto'imo nu suludadu nu Asyur mata-matangkas na pangkatnyo aijo'.