YESAYA 34 - KITAB NU TUMPU ALLA LELE MA'IMAI'

Tumpu mohukumo anu monsampobali' Ia

¹ Imbo' sihuk mae, o, to bansa-bansa, ka' potombihing mae. Bakas da songko-songko na dunia ka' mule' iwi-iwi' na anu tumuu' i unonyo tokamo mae ka' mompotombihing.

² Tumpu nontambuha'imo iwi-iwi' na bansa ka' mule' hi iwi-iwi' na gombuan nu suludadu nu aha. Ia mohukumo ka' mule' monsilakaimo aha.

³ Iwi-iwi' na bangke' nu aha saidi' mae madi'mo olamun, panyo olamo ahi' opojohok da mahutak ka' mabusikmo. Iwi-iwi na bungkutnyo singkapmo momea' kalana nu iaba'imo nu baso' nu aha.

⁴ Batu nu sinaa, bitu'on ka' mule' iwi-iwi na mandala' hansunmo. Langit olulunmo susumo lulunan nu kalatas. Iwi-iwi na mandala' singkapmo manabu' susumo hon nu kau' anu mohontangmo.

⁵ Tumpu nomposadiamo bajak-Nyo kiita' isuluga', ka' uuka aiya bajak aijo' montuda'mo bansa Edom anu binee'anmo hukuman ka' osilakaimo.

⁶ Bajak nu Tumpu aijo' nu kampuhimo nu baso' ka' kahomo lompo' nu aha, sumomo ahi' baso' tiba lompo' nu binatang anu kinolobanakonmo. Kalana Tumpu nomposadiamo koloban i Bozra ka' nompahangkolotakonmo manjoo' hondo itano' nu Edom.

⁷ To mia-mian silakamo susumo sapi' anu ma'ela' ka' sapi' anu daagi' bata'nyo. Lipu' nu aha momea'mo nu baso' ka' kahomo lompo.

⁸ Aijo'mo na tempo'nyo nu tinjohimo nu Tumpu na Sion ka' mombalosakonmo idek nu kinyonyoa-Nyo hi aha anu monsampobali' mae.

⁹ Iwi-iwi na kaunyo nu Edom mongabali'mo sumomo ter, ka' tano'nyo timbalimo belerang. Ahennyo songko-songko na lipu' moakmo susumo ter opapuimo.

¹⁰ Sinaa tiba pihi moaknyo aijo' madi' mopoho' ka' mule' tibuknyo tumipuhamo lengkat mae aijo', sampe toka sidu-sidutu'. Tano' aijo' opala'imo madi'mo ko anu monjojoongi ka' mategesmo sampe molundu-lundu na tulunan ka' mule' madi'mo daagi' ko mian anu montulu ikiijo'.

¹¹ Tomonsi' undan tiba landak na jojoongmo ikiijo', mongkoek tiba papaa' na suele jojoong ikiijo. Tano' aijo' nu pokalangkabutmo nu Tumpu ka' madi'mo ko anu monjojoongi susumo ma'isa pe'e dunia pinotimbali.

¹² Madi'mo ko tomundo' mompalentah lipu' aijo' ka' iwi-iwi' na to pola-polaya'nyo imadi'anmo.

¹³ Iwi-iwi' na tampat bapilogotan nu aha ka' mule' iwi-iwi na kota'nyo anu ko bentengnyo nu tumuu'imo nu kuhat anu kohii'nyo tiba hemput ka' mule' nu jojoongimo nu dedeng nu kuhat tiba tomonsi' unta.

¹⁴ Binatang anu toto maha-mahangas sumisingkapmo i unonyo; te mongkoek mompaha tataamimo ka' mongkoek de pihimo moliomo ka uhomannyo.

¹⁵ Tampat aijo' baumo pimpetan nu ulo anu kobisa'nyo, minggalau', momanas ka' mule' mompotuu' to ana-anaknyo. Tomonsi' alap-alap suel sihukmo ikiijo' moto-moto osoa.

¹⁶ Soba lio ka' basa' i uno nu Kitab nu Tumpu; Madi' ko sa'angu' pe'e na binatang haha aijo iwi-iwi' ko anu molapus kabai anu madi' moto osoa. Kalana memang sumo aijo'mo ahi' na palentah nu Tumpu ka' posi Ia ahi' na nomposihukmo aha.

¹⁷ Tumpu na mombagimo lipu' aijo' hi aha ka' toto samian mohumpakmo pombagiannyo. Aha jojoongmo ikiijo' sampe toka sidu-sidutu', ka' mule' tano' timbalimo anu nu aha sampe molundu-lundu na tulunan.