YESAYA 31 - KITAB NU TUMPU ALLA LELE MA'IMAI'

Tumpu monjagaimo Yerusalem

¹ Silakamo na aha mian anu nambamo i Mesir nomoita da nu bantui mae nu aha! Aha montakabunakonmo kahosonan nu suludadu nu aha Mesir tiba gombuan nu suludadu nu aha anu monsake'i ajahan ka' mule' kuda nu aha anu toto hoso-hoson ka' mule' kareta nu aha manjo-manjoo' aijo'. Panyo aha madi' palesaya hi Tumpu, Tumpu nu Israel anu susi' ka' madi' aha nomoita da nu bantui.

² Tumpu pande hondo ka' Nu sumbu' apaa na anu kahanda' Nu bau. Pinotoka-Nyomo mae na balaa' ka' pinokona-Nyomo na hukuman hi mian anu ma'idek na kinyonyoanyo ka' mule' hi mian anu nontulungimo aha.

³ Aha mian nu Mesir ola mian misa' Tumpu. Ajahan nu aha ola binatang biasa, misa' sumo pikilan nu Tumpu. De Tumpu mombaumo anu nu bau bansa, anu nontulungimo aijo' tosumpunmo ka' mule' bansa anu nu tulungi aijo' tondahapamo. Sahingga aha ohu-ohua' aijo' silakamo.

⁴ Tumpu notataemo hi belengku, “Susumo singa molohu'mo da madi' o, agoi na kaanonnyo ka' madi' opoko ala opopobuhuk nu to pola-polaya' binatang maumo ahi' aha sanggombu na monsia'i ka' sola' molokihis anu pinalentahmo mongewa ia, sumo aijo'mo na Aku mahampate da boli o, hungku'i na Puge'nyo nu Sion.

⁵ Susumo sa'angu' na tomonsi' lewa'mo mompapa'i aita' i petaanyo monjagai soma'nyo, sumo aijo'mo na Aku, Tumpu Anu Daka' na Kuasanyo monjagai, montinjohi ka' mule' momposalamat Yerusalem.”

⁶ Tumpu notataemo, “O, bansa Israel, belemiu madi'mo nohongo-hongo mae Aku ka' binaladosa'mo hi beleng-Ku. Panyo uuka aiya po ule'mo mae toka hi beleng-Ku!

⁷ Tokaje mae na tempo'nyo saba' belemiu iwi-iwi' sola'mo mongalin iwi-iwi na patong bapilogotan nu belemiu anu salaka ka' mosoni' na binau nu belemiu ka' kaho dosa' aijo'.

⁸ Asyur saidi' mae osilakaimo i uno nu pahampatean, panyo misa' kalana samata-mata kahosonan nu manusia. Aha mian nu Asyur sadi' mae mopalaimo mompala'i pahampatean ka' to oli-olitau nu aha opotimbalimo posa-posaihon.

⁹ Tomundo' nu aha mopalaimo kalana mabuhukmo ka' to sulu-suludadunyo anu toto tangka-tangkas na pangkatnyo tolokengkengmo sahingga nu pala'imo nu aha na bandela'nu aha iwi-iwi'.” Tumpu notataemo, Tumpu anu osombah ka' mule' anu oholomati nu koloban anu opotunu i Yerusalem.