YESAYA 25 - KITAB NU TUMPU ALLA LELE MA'IMAI'

Nyanyian bau pompuji' Tumpu

¹ O, Tumpu, Belentomo na Tumpu Allah-ngku, ku popodaka' na Belento ka' mule' ku puji na sanggo nu Belento. Kalana apa-apaa na anu binaumo nu Belento talalo ahi' okabangangi; Belento notanga'imo mombau apa-apaa daagi' pe'e naipuan mae, ka' binaumo ma'i-ma'ima.

² Kota' aijo' ihansunanmo nu Belento; kota' anu kobentengnyo aijo' nohobo-hobo'mo. Laigan nu tomundo' anu binau nu mian anu lengkat mae isalipu'an ihansunmo, ka' madi'mo po ule' obau sampe toka sidu-sidutu!

³ Belento nu puji'mo nu to bansa-bansa anu toto hoso-hoson, ka' okabuhukmo iyaya mae na kota' nu to bansa-bansa anu buhingison.

⁴ Kalana Belento baumo palaian nu to mia-mian anu madi' mahoson, tampat anu madi' ko mian mompoposia hi aha mian anu kasiasi i uno nu kasusa'an. Belentomo na bau pihohungan de ko baleba' makansang, ka' pingkongan de talalo mapengges na singit. Kalana mian anu buhingison de montumbuhi pokakanamo ahi' susumo anton daka' itempo' nu ehua, susumo mombun mapanas itano' anu kuunmo.

⁵ Panyo belento nompomomo' sampobali' mami. Pinobelentimo nu Belento na ais nu to mia-mian anu buhingison, susumo kundom nohohungimo mae sahingga madi'mo mapengges na singit.

Tumpu momposadiamo anu okaan i bau-bauon

⁶ I Puge'nyo nu Sion, Tumpu Anu Daka' na Kuasanyo momposadiamo anu okaan i bau-bauon nu aha iwi-iwi' na bansa i dunia aiya. Nu tatuakonmo na kaanon anu toto ima-ima' hondo tiba anggur anu memang pinile'anmo.

⁷ Aita' i puge'nyo Nu alinimo na kundom mongompo kinyonyoa ka anu mongkukumbungi bansa-bansa.

⁸ Tumpu Anu Daka' na kausanyo mompateimo anu monsaduakon kapatean sampe toka sidu-sidutu'! Nu sapuimo na lolu' hi iwi-iwi' na ohup ka' mompojo'onmo anu monsaduakon sahingga ma'ambang, anu tinanggungmo nu mian anu palesayamo hi Ia isongko-songko na dunia aiya. Tumpu notataemo, ka' han aijo' memang tionyo ahi' jadi.

⁹ Tempo'nyo aijo' mian motataemo, “Memang totu'u, Ia ahi' na Tumpu-nto; Iamo ahi' ia na anu ota-otanda'into, da kita oposalamat. Totu'umo ahi' aiyamo na Tumpu; Iamo ahi' ia na anu ota-otanda'into. Uuka aiya poloaismo lame-lame', kalana Ia momposalamatmo kita.”

Tumpu mohukumo Moab

¹⁰ Nu jagaimo nu Tumpu na Puge'nyo nu Sion, panyo Moab opahampeja'akonmo susumo hat itampat nu duhehe.

¹¹ Mian anu jojoong i Moab montajuakonmo limanyo susumo mian anu kahanda'mo lumangu. Panyo nu pokalamo nu Tumpu na aha tala-talalo buulon sahingga aha madi'mo daagi' moko ala mombau apa-apaa.

¹² Benteng-benteng nu aha Moab ka' mule' pagannyo mesen anu toto tangka-tangkas Nu hobo'akonmo ka' mule' Nu sapahakonmo itano' sampe ia hansun susumo abu'.