YESAYA 23 - KITAB NU TUMPU ALLA LELE MA'IMAI'

Palakila'an apaa na anu jadi i Tirus tiba i Sidon

¹ Sumo uuka na potuunon mongkona Tirus. O, to mia-mian nu Spanyol anu lewa' balayan motaap indalangon toto daka-daka' haangmo! Tempo'nyo ninsusule'mo mae lengkat i Siprus pinoto'imo hi belemiu na kota' Tirus ihansunmo. Labuan nu kapan nu belemiu tiba laigan nu belemiu iwi-iwi' kahomo na'idek.

^2-3 Pongkabalatanmo, na belemiu mian anu jojoong isonibi nu ambai, to pada-padagang nu Sidon! Kalana biasa belemiu monsai mian mamba isantoa nu ambai mompobaluk balang-balang dagangan ka' mule' mongoli mae gandum nu Mesir ka' kahanda' badagang hi iwi-iwi' na bansa.

⁴ O, kota' Sidon, kaholomatan nu beleyum imadi'anmo! Ndalangon leleng madi'mo daagi' mongakui beleyum, ia notatae, “Aku ma'isa toho' nonganak, ma'isa toho' nompidaka'i anak mo'ane kabai boune.”

⁵ Ka' mule' aha mian nu Mesir tolokengkengmo ka' mabuhukmo de mohongomo Tirus ihansunanmo.

⁶ Hangmo, ka' palaimo mamba i Spanyol, o, belemiu mian anu jojoong isonibi nu ambai!

⁷ Soba toa na kota' nu belemiu aijo' Tirus anu daagi'mo salatanmo pe'e naipuan mae. Te aiyamo na kota' anu biasa balasana-sanang? Te aiyamo na kota' anu biasa monsai mian mamba motaap ambai montoa lipu' nu mian kiijo' mae?

⁸ Temisa' to pada-padagangnyo to mia-mian lee' mae ahi' nu tomundo' anu oholomati hondo i dunia aiya? Ihe na nongalamo kaputusan da momposa'angu'mo Tirus, kota' anu balakuasa hondo aiya?

⁹ Tumpu Anu Daka' na Kuasanyo, Iamo na nongala kaputusan aijo'. Ia nomputusimo da bolimo sola' takabun na miannyo anu jojoong ikiijo' maumo ahi' aha noko alamo nohumpak iwi-iwi na apaa, ka' nonteemo to mia-mian anu oholomati i dunia aiya.

¹⁰ Lako'mo mamba kalaja na ale' nu belemiu, o, belemiu mian anu jojoong i Spanyol kalana tampat pombauan kapan imadi'anmo.

¹¹ Tumpu nontangkakonmo lima-Nyo ibawo nu ambai, ka' nontua'akonmo to kala-kalaja'an. Ia nompalentahmo da benteng-benteng nu Funisia ohansunimo.

¹² Tumpu notatae, “O, kota' Sidon! Beleyum madi'mo daagi' balasana-sanang. Mian anu jojoong hi beleyum obee'imo kasansala'an. Maumo ahi' aha mopalai mamba i Siprus, aha madi' sanang na jojoong kiijo' mae.” (

¹³ Misa' bansa Asyur panyo bansa Babel ahi' na nompojohokmo kota' Tirus da kinuasan nu binatang anu mahangas hondo. Aha ahi' na nompotinjo laigan anu toto tangka-tangkas anu bau pontumbuhian, ka' nohobo'akonmo bentengnyo iwi-iwi' ka' mule' no hansunimo kota' aijo'.)

¹⁴ Haangmo na belemiu, o, to mia-mian anu biasa! Kota' anu ota-otakabu nakon nu belemiu ihansunmo.

¹⁵ Tokaje mae na tempo'nyo Tirus okolilimimo pitumpulu' nataun na kopinnyo pokakanamo umun nu samian na tomundo'. De tompoliumo na kopinnyo aijo', Tirus sumomo boune anu saja' masala' susumo koonyo nu nyanyian aiya:

¹⁶ Ala na kasapi', songkohi na kota' o, boune saja-saja' masala' ka' soe' anu kinolilimanmo! Kutimo na kasapi', ka' po ule' pe'e manyanyi, da beleyum poule' mule' o, inau'.

¹⁷ De lapasmo pitumpulu' nataun aijo' Tumpu po ule'mo monginau' Tirus ka' mompobee'mo ia po ule' mombau pakalaja'annyo susumo naipuan mae. Ia po ule'mo badagang tiba iwi-iwi' na kalaja'an idunia aiya.

¹⁸ Ka untungan tiba tambo nu mokalaja anu nu humpak madi'mo ola nu una', panyo nu palasombahkonmo hi Tumpu. Aha to mia-mian anu monsombahmo Tumpu monggunakonmo doi aijo' bau pongoli kapalaluan nu aha pihude tiba anu nu kaan nu aha.