YESAYA 21 - KITAB NU TUMPU ALLA LELE MA'IMAI'

Babel tinoa ihansunmo

¹ Sumo uuka na potuunon mongkona Babel: Sumo tombusisi' na pinolintup nontulu mae tampat padang anu mateges, sumo aijo'mo na balaa' toka mae lengkat ilipu' anu okabuhuk.

² Aku nontoamo han anu jinadimo ka' talalo ahi' okabuhuk; mongkona palabuatan anu talalo ahi' ma'idek ka' mule' lewa'mo nompatei. Sampa lambanimo, belemiu suludadu nu Elam, tumbuhimo! O, belemiu suludadu nu Madai, sampamo tiku! Tumpu mompobelentimo iwi-iwi' na kasansala'an anu sinaduakon nu Babel.

³ Anu tinoangku aijo' nompobingungmo hondo aku sampe aku madi'mo noko ala nontoa kabai nohongo. Aku nabuhukmo ka' mule' nasakitmo sumomo ahi' samian na boune anu kahanda'mo monganak.

⁴ Kinyonyoangku madi'mo sinanang; ku oa'i na buhukmo ka' mule' aku ilakatnyomo. Pihi anu saja ku ina-inau' ola mule' ahi' nompopangada' mae kinyonyoangku.

⁵ Aku nontoa mule' bau-bauon mongkakaan anu pinosadiamo; tampat kasuhangan nu anu tinaang pinosadiamo. Aha nongkaanmo ka' mule' nonginumo. Monti-montiik nohongomo palentah: “O, tosulu-suludadu anu toto tangka-tangkas na pangkatnyo! Posadiamo na kanta nu belemiu!”

⁶ Lantas Tumpu notataemo hi belengku, “Lako pojoong samian na anu monjaga ka' palentah na ia da nu poto'i hi beleyum apaa na anu saidi' mae nutoa.

⁷ De ia montoa gombuan nu suludadu anu monsake'i ajahan toka mae toto ua'aha, gombuan nu suludadu anu monsake'i keledai tiba unta, tionyo ahi' mian anu monjaga aijo' mompalahatikan totu-totu'u.”

⁸ Lapas aijo' mian anu monjaga notatae, “O, Tuan, aku nonjagamo sansina-sinaa mau pihi mau sinaa.”

⁹ Soba toa, aijo'mo na aha! Gombuan nu suludadu anu tinokamo mae toto ua-ua'aha mae. Lapas aijo' mian anu monjaga aijo' nompolelemo, “Babel pinatundu'mo! Iwi-iwi na patong nu nu sombah nu aha nohintutumo ka' notanatamo itano!”

¹⁰ Bansaku Israel! Beleyum pinahampeja'akomo ka' lewa'mo ilanda'an sumomo batu nu gandum. Uuka aiya ku poto'imo hi beleyum lele ma'ima' anu ihongongkumo hi Tumpu Anu Daka' na Kuasanyo, Tumpu nu aha Israel.

Palakila'an apaa na anu jadi i Edom

¹¹ Sumo uuka na potuunon mongkona Edom. Daagi' ko mian anu lewa' mae motatae daka-daka' hi belengku lengkat mae i Edom, “O, mian anu monjaga, daagi' pin na pihi uuka aiya? Daagi' sangkuka na jam mopatasje?”

¹² Tinaamanku, “Daagi' subu tokamo mae, panyo po ule' ahi' malom. De daagi' mompokilawa, yo po ule'je toka mae mompokilawa.”

Palakila'an apaa na anu jadi i Arab

¹³ Sumo uuka na potuunon mongkona Arab; O, belemiu mian nu Dedan, mian nu belemiu anu singkap mae nonsake'i unta binakemahmo itano' nu aha Arab anu kahomo kuhat.

¹⁴ O, belemiu anu jojoong itano' nu aha Tema, po inumi uee na mian haha aijo' anu negotmo titinokamo mae hi belemiu, ka' mule' bee'i mongkaan na aha to mia-mian anu nalaimo mae.

¹⁵ Kalana aha nopalaimo mae da madi' silaka nu bajak anu kineatmo, da madi' nukona nu pana' anu opeletakonmo, ka' mule' da madi' mahampate anu hau-haunyomo sinidamo na pahampatean.

¹⁶ Lantas Tumpu notataemo hi belengku, “Pas daagi' sataun kakaya'an nu to tulu-tulunan nu bansa Kedar mingkotmo.

¹⁷ Anu toto pande-pande na mompana' hi aha mian nu Kedar aijo'mo na mian anu toto babaani hondo. Panyo anu salamat na mian aijo' hi aha ola sangkiding. Aku, Tumpu Allah nu aha Israel notataemo.”