YESAYA 20 - KITAB NU TUMPU ALLA LELE MA'IMAI'

Nabi anu nilanggomo binaumo salaku tanda

¹ I Sargon tomundo' nu aha Asyur nompalentahmo da talenga' nu tomundo' Asyur montumbuhimo Asdod, sa'angu' na kota' nu aha Filistin.

² Totolu'mo nataun anu ihikuhakonmo ma'isa pe'e kino han aijo', Tumpu nonsaimo i Yesaya anak i Amos da mongukatakon sapatunyo ka' hude kalung anu pake-pake hi ia. Ia nontulutimo ka' ia ilumajangmo langgo-langgo ka' mule' madi'mo nisapatu.

³ Salatan kota' Asdod tinikumo, Tumpu notataemo, “Posaihon-Ku Yesaya totolu'mo nataun na ilanggo ka' mule' madi' nisapatu. Aijo'mo na salaku tanda apaa na anu saidi' mae jadi hi aha Mesir tiba hi aha Sudan.

⁴ Tomundo' nu Asyur saidi' mae mohakopmo to mia-mian anu hi ohua' na lipu' aijo' ka' aha oboamo langgo-langgo na lumajang. Anu motu'amo kabai anu ma'isa motu'a iwi-iwi' lumajang madi' mompusok baju ka' sapatu suele madi' mompusok jadi ahop nu aha kinantoaanmo salaku bau pongambangi aha Mesir.

⁵ Aha to mia-mian anu montakabunakon Sudan ka' mule' mombuulakon Mesir hentemo na mogogia' ka' madi'mo daagi ko anu nu taha'imani nu aha.

⁶ Tempo'nyo aijo' aha to mia-mian anu jojoong ibiwi nu ambai motataemo, ‘Soab toa apaa na anu jinadimo hi bansa anu ota-otakabunakonto monjagai mae kita da madi' nu poposia mae i tomundo' nu Asyur. Iyamule' na kita daagi' salamat?’ ”