YESAYA 2 - KITAB NU TUMPU ALLA LELE MA'IMAI'

Kadamean anu sampemo toka sidu-sidutu'

¹ Sumo uuka na pinotuun nu Tumpu mongkona Yehuda tiba Yerusalem anu tinalima i Yesaya anak i Amos:

² Isinaa anu aiya mae ihop puge'nyo tampat Laigan nu Tumpu matangkasmo ka' tuminjo'mo hodi-hodi' aita ito bungku-bungkutnyo ka' mule' to puge-puge'nyo. Iwi-iwi' na bansa moduyu-duyutmo mamba mokiijo',

³ aha iwi-iwi' motatae, “Imbo' da kita mokiita' mindako i ‘Bungkutnyo nu Tumpu,’ ilaigan nu Tumpu Israel. Laje na mongajan mae kita apaa na anu tionyo ahi' obaunto. Kita mombatukimo kajalanan-Nyo kalana ajalan nu Tumpu molengkat mae i Yerusalem, Ia motatae lengkat mae i Sion.”

⁴ Ia na momputusi aha to bansa-bansa, ka montantukan kaputusan nu palakala hi aha tulunan nu to bansa-bansa. Bajak otutukmo da timbalimo aja' ka' mule' talombo' otutukmo da timbali piso' bau pongkis. Aha to bansa-bansa madi'mo lewa' mompaha tubu-tumbuhi, ka' mule' madi'mo lewa' balasadia da mahampatemo.

⁵ O, lee' mae i Yakub, imbo' kita lumajangmo ijingka nu Tumpu!

Mian anu buulon opateimo

⁶ O, Tumpu Belento nompala'imo mian anu palesayamo hi Belento, lee' mae i Yakub! Kalana iyaya mae ilipu' aiya mian lewa'mo mompake pangatahuan anu nolengkat ame isasu kabete'an ka' anu nolengkat mae hi aha mian nu Filistin. Aha to mia-mian montulutimo adat nua aha mian anu lengkat mae isalipu'an.

⁷ Lipu' nu aha kaho' mosoni' tiba salaka, ka' mule' halata' nu aha manjoo' hondo. Ajahan nu aha manjoo' hondo ka' mule' kareta nu aha madi'mo opoko bilang na konjoo'nyo.

⁸ Iyaya mae ko bapilogotan, ka' mule' aha monsombah pato-patong anu nu posi bau nu aha.

⁹ Toto samian o'alumo ka' opopo ambangmo. Boli mongampuni aha o Tumpu!

¹⁰ Aha saidi' mae minsoopmo liang anu i to puge-puge'nyo nu bungkutnyo nu batu gahanggan kabai mongkekemo bolo' itano' bau paninsulukan da madi' nu kona nu tambuha' nu Tumpu tiba kuasa-Nyo anu talasanggo.

¹¹ Ola-olanyomo ahi Tumpu na anu opopodaka'.

¹² Toka isina aijo' Tumpu Anu Daka' na Kuasanyo mompopo'ambangmo iwi-iwi' na anu montige-tige ka' mule' mohukumo iwi-iwi' na anu buulon tiba anu lewa' montige-tige.

¹³ Iwi-iwi na kau' cemara anu toto tangka-tangkas i Libanon ka' mule' iwi-iwi' na kau' toto daka-daka' i Basan ohansunimo.

¹⁴ To bungku-bungkutnyo ka' mule' to puge-puge'nyo anu toto ima-ima' opohatamo.

¹⁵ Laigan toto tangka-tangkas ka' mule' iwi-iwi' na pagan mesen anu ko bentengnyo ohobo'akonmo.

¹⁶ Kapan anu toto daka-daka' hondo ka' mule' ma'ima' olomosimo.

¹⁷ Mian anu buulon opopo ambangmo ka' mule' mian anu lewa' montige-tige opota'alukmo. Ola-olamo ahi' Tumpu na anu opopodaka'.

¹⁸ To pilo-pilogot imadi'anmo ingko-ingkot.

^19-21 Salatan Tumpu totinjomo ka' monggayu'mo dunia aiya mian singkapmo minsoop iliang anu i to puge-puge'nyo nu batu gahanggan kabai mongkekemo bolo' itano' da madi' nu kona nu tambuha' nu Tumpu ka' mule' kakuasa'an-Nyo anu talasanggo aijo'. De sinaa aijo' tokamo mae to pilo-pilogot anu mosoni' na binau kabai salaka nunu sombah nu aha aijo' nu pala'imo nu aha madi'mo nu kali-kalinga nu aha timbalimo bahagian nu bokoti' tiba poniki'.

²² Jadi boli montaha'imani mian anu madi' tumuu' batu kalana ia madi' ko angga'nyo.