YESAYA 18 - KITAB NU TUMPU ALLA LELE MA'IMAI'

Tumpu mohukumo Sudan

¹ Lengkat mae i sa'angu' na lipu' isantoa nu kaunyo haha kiijo' i Sudan ihongomo na onyi' nu sipuyu.

² Lengkat mae ilipu' aijo' tinokamo mae na utusan anu notaapmo mae Kaunyo nu Nil sinumake' mae iduangan. O, utusan-utusan anu toto mako-makolit, sampamo pinsusule' ilipu' nu beleiu anu so' nusahak nu kaunyo haha aijo'. Boa na potuunon aiya sumo uuka toka hi bansa nu belemiu anu toto maho-mahoson ka' toto babaani, ka' mule' belemiu mian nu toto tangka-tangkas, ka' kilitnyo ma'ima' ka' okabuhuk isongko-songko na dunia.

³ O, belemiu iwi-iwi' anu monjojoongi dunia aiya! Soba palahatikan de bandela' opotinjo' ito bungku-bungkutnyo! Soba potombihing de tolompet opo'onyi'mo!

⁴ Tumpu notataemo hi belengku, “lengkat mae aita' ikajojoongan-Ku, Aku montudangmo mokaiyong madi' ko anu mokohenggo ka' talaang hondo sumomo ahi' kotalangnyo nu dondu'ok pihi kona itempo nu posinaa ka' mule kakona itempo nu pompadakan ka' mule' kotalangnyo sumomo ahi' singit sonsu'un na sinaa.

⁵ Ma'isa pe'e tempo' nu bua'nyo, laje buahaknyo na mohontangmo ka' bua' nu anggur ma'isa maha ipu'unnyo. Sudan nuhansunimo nu sampobali'nyo sumomo ahi' piso' mongkolongi panga'-panga' nu anggur na kodengkenyo.

⁶ Bangke-bangke' nu to sulu-suludadunyo opala'imo sahingga timbalimo kaanon nu to tomo-tomonsi' kakona itempo' nu posinaa, ka' mule' timbalimo kaanon nu to bina-binatang anu mahangas itempo nu bakin.”

⁷ Tokaje mae na tempo'nyo palasombahan-palasombahan obee'mo hi Tumpu Anu daka' na Kuasanyo lengkat mae ilipu' aijo' nunu sahak nu kaunyo haha aijo'anu lengkat mae i bansanyo anu mahoson ka' mule' baani, ka' mule' lengkat hi aha miannyo anu toto tangka-tangkas ka' kilitnyo ma'ima' ka' mule' okabuhuk isongko-songko na dunia aiya. Aha tokamo mae i Puge'nyo nu Sion itampat nu Tumpu Anu Daka' na Kuasanyo osombah.