YESAYA 17 - KITAB NU TUMPU ALLA LELE MA'IMAI'

Tumpu mohukumo Siria tiba Israel

¹ Tumpu notataemo, “Damsyik madi'mo daagi' sumo kota' panyo me tambulan nu anu ihansunmo.

² Iwi-iwi' na kota' i Siria opala'imo sampe toka sidu-sidutu' ka'timbalimo tampat nu gombuan nu potuu'on; madi' kosamian na anu molaa' aha.

³ Israel madi'mo daagi' ko anu monjagai ka' mule' Damsyik madi'mo daagi' maladeka'. Aha mian nu Siria anu daagi' tontuha' tumuu' madi'mo oholomati susumomo ahi' aha mian nu Israel. Aku, Tumpu Anu Daka' na Kuasanyo nontaloakonmo.”

⁴ Tumpu nontataemo, “Tokaje mae na tempo'nyo katalasanggoan nu aha Israel mingkotmo, ka' mule' ka'ima'an nu kantumuu'an nu aha lanyapmo.

⁵ Israel saidi' mae sumomo ale' kiijo' i Refaim anu ningkotmo pinadak na gandumnyo ka' me tinontuha' sangkiding.

⁶ Susumo kau' zaitun anu noko tipuanmo na bua'nyo ka' me tinontuha' pa' sangkuka itutuu'nyo nu panga'nyo sumo aijo'mo na Israel me sangkiding na miannyo na salamat. Aku, Tumpu, Tumpu nu aha Israel nompoto'imo.”

⁷ Isinaa aijo' mian po ule'mo momoita tulung hi anu Nompotimbalimo ia, aijo'mo Tumpu Allah nu aha Israel anu susi'.

⁸ Aha madi'mo daagi' montaha'imani hasin nu posi palabuatan nu aha, aijo'mo mezbah-mezbah tampat pompapuan kamangian ka' mule' iwi-iwi na patong Pilogot boune Asyera.

⁹ Toka isinaa aijo' kota-kota' Israel anu toto hoso-hoson na bentengnyo singkapmo hansun ka' liingmo hondo, susumo kota-kota' anu pinalaianmo nu aha mian Hewi tiba aha mian nu Amori tempo'nyo aha nopalaimo nompala'i Israel.

¹⁰ O, Israel beleyum nongkolilimo Tumpu anu nomposalamatmo ka' nonjagaimo beleyum susumo bungkutnyo nu batu anu mahoson hondo. Panyo ola mule' ahi' beleyum nonsu'anino ale' anu osombahkon hi pilogot.

¹¹ Panyo maumo ahi' anu osu'an aijo' balomo minsumpe ka' mimbunga isinaa pinonsu'anan nu beleyum atina' panyo madi' ahi kokaliangannyo. Anu daagi' ola ahi' kasusa'an ka' sakit na o, oa'i anu madi'mo daagi' ma'alin.

Lipu'-lipu' nu sampobali' opatundu'mo

¹² To bansa-bansa anu toto hoso-hoson ihengge'mo; onyi'nyo lintuban sumomo ahi' buhok nu bokon nu ambai anu taha-tahahumo.

¹³ Aha nolambanimo mae sumomo ahi' iaba' anu okabuhuk. Panyo Tumpu nompahatakutmo aha, lantas aha nopalaimo sampe najo'onmo. Aha iloloi'mo sumomo ahi' ota' i, ampinyo nu bungkutnyo anu ilahabakonmo nu tombusisi'.

¹⁴ De malomo o, oa'i tukan ahi' mabuhukmo hondo, panyo de ohanimo mopatas madi'mo ko anu otoa. Sumo aijo'mo na ukun nu mian anu lewa' mompahuhui kita.