YESAYA 16 - KITAB NU TUMPU ALLA LELE MA'IMAI'

Moab madi'mo daagi' noko ala nombau apa-apaa

¹ Lengkat mae ikota' Sela itampat padang anu mateges, bansa Moab nompakatumo anak nu domba anu opalasenakon hi mian anu balakuasa i Yerusalem.

² Aha to mia-mian nu Moab nontanda'imo isonibi nu Kaunyo Arnon ka' lewa'mo nahalajangan kalana biningongmo sumomo tomonsi' anu sinieanmo aijo' i petaanyo.

³ Aha notataemo hi bansa Yehuda, “Poto'i mae apaa na anu tionyo ahi' obau mami. Koongi ahi' mae na kami totu-totu'u de sinaa talalomo mapengges, ka' da kami saja' ahi' nu koongi mae nu belemiu. Kami aiya mian anu nopalaimo mae; posulukakon mae na kami ka' boli ahi' okabisa'i mae na kami.

⁴ Pobee' mae na kami jojoong madi' pin ilipu' nu belemiu. Jagaiakon mae na kami da madi' nu silakai nu to mia-mian anu kahanda'mo mompatei mae kami.” (Ponsakisan ka' mule' pompateian belentimo, ka' aha to mia-mian anu lewa' mohansuni ka' lewa' monsakisa lipu' Israel lanyapmo.

⁵ Lapas aijo' samian na lee' mai i Daud timbalimo tomundo' ka' mompalentahmo bansanyo ka' saja ahi ko kalibosan ka' ule' madi' geguan. Ia na montoongi ahi' ka adilan ka' mule' malia' ahi' na bala ulusan mombau anu sahondo-hondonyo.)

⁶ Bansa Yehuda notataemo, “Ihongomo mami na katabuulan nu bansa Moab. Osumbu' mami na aha talalo ahi' montige-tige ka' mule' talalo buulon. Potatae nu aha ola saja' molabi-labi padahan madi' kokaliangannyo.”

⁷ Kalana aijo' bakas da bansa Moab mompaha hahangimo. Bakas da aha tonginau' ikaanon anu to tami-tami bia-biasa nu kaan nu aha ikota' Kir-Hareset. Bakas da aha hentemo na montutugi apa-apaa ka' sola' nu bapisala.

⁸ Iwi-iwi na ale koko Hesybon ka' mule' iwi-iwi na ale' nu anggur anu ma'ima' hondo hi aha anu balakuasa i bansa ka' anu saja mompolangu aha. Naipuan mae ale' nu anggur haha aijo' binolamo toka-tokamo ikota' Yaezer; ka' sasu kabete'an toka-tokamo ipadang bone' ka' isasu kinsoban toka-tokamo isantoa nu Ambai Mate.

⁹ Uuka aiya aku mohangimo anggur anu kiijo' i Sibma susumo aku nohangimo Yaezer Aku nonjujuhakonmo lolu'ku kalana Hesybon tiba Eleale, kalana isi nu ale'nyo ingingkotanmo nu sampobali'.

¹⁰ Madi'mo daagi' ko samian pe'e na anu lame' i ale' anu toto lumba-lumba' haha aijo'. Madi'mo daagi' ko anu mompao' anggur da obau anggur inumon. Aku nontewa'mo aha sola' montaligalai.

¹¹ Kinyonyoangku nolokihismo ka' ihansunmo hondo-hondo montoa ka' ada'an nu aha Moab tiba Kir-Heres.

¹² Aha mian nu Moab binasusa-susa'mo nindako ipuge'nyo anu saja-saja' ponsombahkonan koloban ka' binalado'amo panyo madi' kinokaliangannyo.

¹³ Aijo'mo na potuunon anu naipuan mae pinoto'imo nu Tumpu mosia na ka ahenannyo mae na Moab.

¹⁴ Ka' uuka aiya Tumpu notataemo, “Pas daagi' totolu' nataun iwi-iwi' nakakaya'an anu nunu kabubunakaon nu Moab lanyapmo. Mian da'isan nu aha Moab timbalimo me sangkiding ka' madi'mo mahoson.”