YESAYA 11 - KITAB NU TUMPU ALLA LELE MA'IMAI'

Kalaja'an anu ko Kadamean

¹ Lee' mae i Tomundo' Daud pokakana susumo kau' anu tinaa'mo. Panyo susumo lapangnyo tu'o daagi' ahi' tumuu' mae na sumpenyo sumo aitumo na lee' mae i Daud daagi' ahi' ko samian na tomundo' na nu lee'akon mae.

² Kuasa nu Tumpu na mompotiju' ia, mompotimbali ia mingkinyonyoa ma'ima' ka' pande, pande na montantukan kaputusan ka' mompojalan kaputusan monsumbu' anu nukahanda'i nu Tumpu Allah ka' tulu-tulutan hondo hi Ia.

³ Anu talalo hondo nu ka'ima'i montuluti Tumpu. Ia momputusi ulusan madi' ola asan oputusimo kabai ola mohongo potatae nu mian sangga'at.

⁴ Mian anu kasiasi adin hondo na ia montantukan kaputusannyo, mian anu madi' monsumbu' apa-apaa na ulusan nu tinjohi ka' madi'; kopikilan tageo' hi mian aijo'; mian anu kokasala'an obee'i hukuman, mohongo palentahnyo, mian anu ma'idek na kinyonyoanyo nu patei.

⁵ Ia adin na mongala kaputusan ka' madi' tageo' na kinyonyoa i uno nu han iwi-iwi'.

⁶ Serigala mogalumo hingga-hinggat tiba domba, macan tutul lumukutmo koko mee'. Anak nu sapi' mongototmo hingga-hinggat tiba anak nu singa, ka' anak anu daagi' ise' mohela'mo aha.

⁷ Sapi' mongototmo hemput tiba beruang, to ana-anak nu aha mogalumo na lumukut hingga-hinggat. Singa mongkaanmo hat susumo sapi'.

⁸ Ka' mule' samian na bungamea' madi' belaon, de lewa' biang koko ulo anu kobisa'nyo.

⁹ I Sion, Puge'nyo nu Tumpu anu Susi', madi' ko anu ma'idek kabai ko anu mongidei. Lipu' kahomo monsumbu' apaa na aijo' Tumpu, pokakanamo susumo uee mompobuke'imo ndalangon.

Bansa anu pinojoongmo ilipu' anu isantano'an osule'akonmo mae

¹⁰ Tempo'nyo saidi' mae tokamo samian na tomundo' lee' mae i Daud baumo lewa' palahatian nu to bansa-bansa. Aha tokamo mae hi ia, ka' tampat kajojoongannyo saja' lewa' opuji-puji'.

¹¹ Toka isinaa aijo' Tumpu po ule' mule' monggunakon kakuasa'an-Nyo ka' monsule'akonmo mae mian anu palesayamo hi Ia anu tinasisa i Asyur ka' i Mesir, ka' mule' i iwi-iwi na lipu' Patros, Sudan tiba Elam anu kiijo' i Babel, ka' mule' Hamat tiba iwi-iwi' na togong anu toto jo'o-jo'on.

¹² Tumpu mompotinjomo sa'angu' na bandela' bau pontoan nu to bansa-bansa. Aijo'mo na tandanyo taalu' Ia po ule'mo nomposihuk bansa Israel, tiba bansa Yehuda anu noga'a-ga'atmo iyaya mae i dunia aiya ka' monsule'akonmo mae aha.

¹³ Kalaja'an Israel madi'mo daagi' mongka'ideki kalaja'an Yehuda, ka' mule' kalaja'an Yehuda madi'mo daagi' monsampobali' Israel.

¹⁴ Aha mosa'angu'mo ka' hingga-hinggat montumbuhimo Filistin anu isasu kinsoban ka' mule' lewa'mo mompahuhuakon to bansa-bansa anu isasu kabete'an. Aha mompatundu'mo bansa Edom tiba Moab, ka' mule' bansa Amon ta'alukmo hi aha.

¹⁵ Tumpu mompo'otimo Leoknyo nu Suez. Ia mompojadimo mae tempo nu posinaa sahinga mombunnyo tobungmo lantas Kaunyo nu Efrat mobagi-bagimo timbalimo popitu' na sepe'nyo nu uee anu toto lese-lese, ka' batu-batu mian timbalimo motaap mompake sapatu.

¹⁶ Kona hi aha mian anu palesayamo hi Ia dadaagi' tinasisa mae tabuka'mo na jalan daka' da posabatan mae lengkat i Asyur, susumo aha Israel nosabatmo mae lengkat i Mesir.