YEREMIA 9 - KITAB NU TUMPU ALLA LELE MA'IMAI'

¹ Ma'ima' hondo de ubaku sumo bubung anu pinobuke'anmo nu uee, ka' mataku sumo soluduk anu saja' mo ili na ueenyo! Sahingga aku timbali saja' humang sinaa tiba pihi, mohangi to mia-mian bubuu' bansangku anu pinateanmo nu sampobali'.

² Uuka aiya ipadang tampat anu mateges timbali ku kabot na tampat sinso'an male' nu mian anu ilumambanan! Sahingga ku pala'imo na bansangku ka' malaimo mamba kiijo' mae da matikojo'onmo madi'mo ohani hi aha. Aha iwi-iwi' saja' mombau palabuatan anu ma'idek sa'angu' na posa'angu'an nu mian anu madi' tulu-tulutan,

³ ka' saja' balaniat da baleko'. Isongko-songko na lipu' palabuatan anu totu'u madi'mo balakuasa, pakalaus kinyonyoa anu madi'mo hodi' jinadimo iyaya mae. Tumpu notatae, “Mian anu palesayamo hi beleng-Ku nombaumo palabuatan anu ma'idek madi'mo kinokabelentiannyo, aha madi'mo nongakui Aku salaku Tumpu Allah nu aha.”

⁴ Maumo ahi' sangalu, panyo batu-batu mian na saja' ahi' balajaga-jaga ka' mau mule' utus sa'a-sa'angu' na ma'alum madi'mo timbali opalesaya. Kalana, susumo i Yakub sumo aijo'mo na aha, toto samian nongakalimo utusnyo. Batu-batu mian mambamo iyaya mae da sola' monsisik pitana' hi mian ka' sola' baleko'.

^5-6 Iwi-iwi' mompaha aka-akalimo madi'mo ko anu motatae sahondo-hondonyo. Nganga' nu aha kinobisa'nyomo nu baleko' madi'mo nu poko pala'i nu aha na dosa' nu aha. Buhingison nompaka buhingisonmo mongakali nompaka pongakalimo sabole-bolemo saja nu bau nu aha aha madi'mo hondo-hondo montalima Tumpu.

⁷ Kalana aijo' Tumpu Anu Mahakuasa notataemo, “Susumo logam, mian anu palesayamo hi beleng-Ku Ku uji'mo da aha madi'mo daagi' ko galo-galo'nyo. Apaa mule' na daagi' Ku bau hi aha mian anu palesayamo hi beleng-Ku nonombaumo palabuatan anu ma'idek?

⁸ Potatae nu aha monsilakai hondo timbali mompatei susumo pana' anu ko bisa'nyo. Apaa na anu sola' nu taloakon nu aha saja' leko'. Potatae nu aha matami' hondo ka' timbali monggoda, panyo sabenannyo aha nonta'anmo so'o.

⁹ Te misa'o konanyo na bansa susumo aiya ka' madi' Ku nabu'akon na hukuman anu memang konanyomo ahi'? Ku balosakonmo na palabuatan nu aha Aku, Tumpu, notataemo!”

¹⁰ Aku, i Yeremia notatae, “Aku humangmo ka' susamo na kinyonyoa kalana padang tampat nu hemput anu mateges ka' aita' ibungkutnyo iwi-iwi' anu nanggasmo kinumahengkengmo ka' mule' madi'mo tinulu nu mian. Lewo' nu potuu'on madi'mo daagi' ko anu ihongo, binatang anu lumahap tiba binatang-binatang sangga'at nopalaimo ka' imadi'anmo.”

¹¹ Tumpu notatae, “Yerusalem Ku pojadimo tampat anu ihansunmo baumo tampat paninsulukan nu dedeng nu alas. Sinin na kota' nu aha Yehuda timbalimo liing, timbalimo tampat anu madi'mo ojojoongi.”

¹² Aku nompokilawamo, “Tumpu kadaka' lipu' aiya opojohokmo da kunmo ka' manggasmo susumo padang tampat anu mateges sahingga madi'mo daagi' ko anu montulu? Pa' daagi' ko anu pande hondo monsumbu' iwi-iwi' aiya? Hihe na pinompoto'ianmo nu belento katalangan da ia timbali mule' ahi' mompoto'i hi mian sangga'at?”

¹³ Tinaaman nu Tumpu, “Aijo' jinadimo kalana mian anu palesayamo hi beleng-Ku madi'mo daagi' mompalahatikan pangajalan-pangajalan anu binee'-Kumo hi aha. Aha madi'mo nontuluti Aku ka' mule' madi'mo ahi' suele nontuluti palentang-Ku.

¹⁴ Aha pinanggagamo ka' nonsombahmo to pilo-pilogot Baal susumo anu pinogulu'mo nu mompolee' nu aha.

¹⁵ Kalana aijo' potombihing mae apaa na anu Kubau, Aku, Tumpu Anu Mahakuasa, Tumpu Allah nu Israel; mian anu palesayamo hi beleng-Ku Ku bee'imo sosu'anon anu mapakat da okaan tiba lasung da o'inum.

¹⁶ Aha Ku bee'mo hi to bansa-bansa anu madi' nu sumbu' nu aha kabai mompolee' nu aha. Saja'mo Ku sai na suludadu anu montumbuhi aha sampe Ku pateimo na aha ingko-ingkot.”

Mian anu jojoong i Yerusalem nomoitamo tulung

¹⁷ Tumpu Anu Balakuasa notataemo hi mian anu palesayamo hi Ia, “Soba palahatikan apaa na anu hau-haunyomo jinadi ilipu' aiya, ka' sampamo laga mae na anu mohangi. Pokaumo na aha da tokamo mae ka' monyanyiakon nyanyian anu onyanyi de ko anumo silaka.”

¹⁸ Mian nu Yehuda notataemo, “Pokaumo na aha da sampamo monyanyiakon nyanyian anu onyanyi de ko anumo silaka, da kita iwi-iwi' mohongo, da lumelepmo mae na lolu'to mohumpisi gagisingto.”

¹⁹ Kiita' mae i Sion ihongomo na lewo' nu mian humang, “Kita silakamo ka' talalomo ingambangan. Lipu'to tionyo ahi' opala'intomo, laiganto iwi-iwi' hansunmo ka' motanatamo.”

²⁰ Aku notataemo, “Potombihing na potatae nu Tumpu, o, to bou-boune iwi-iwi'! Hi aha to lalangkoyang nu belemiu pogulu'akon na nyanyian mohangi, ka' hi to sanga-sangalu nu belemiu nyanyian anu onyanyi de ko anumo silaka.

²¹ Kapatean ninsoopmo nontulu tolongan, ka' ninsoopmo i uno nu laigan nu tomundo'; ia nongkaanmo to ana-anak anu aijo' ijalan tiba olitau ka' langkoyang aijo' ilapangan.

²² Bangke' nu mian notanatamo iyaya mae sumomo ahi' duhehe ibawo nu tano'; sumomo gandum anu pinadakmo lantas pinala'ianmo ka' madi'mo daagi' tinolukan. Sumo uuka na anu pinotuunmo mae nu Tumpu ka' anu tionyo ahi' opoto'iakon.”

²³ Tumpu notatae, “Mian anu pade madi' timbali buulon kalana kapandeannyo aijo' ka' mule' mian anu mahoson kalana kahosonannyo aijo' ka' mian anu kaya kalana kakaya'annyo aijo'.

²⁴ Ihe na mongka'oho buulonmo kalana apa-apaa, anu ahi' obuulakon aijo'mo ia monsumbu' ka' mompangalati'i Aku; tukoonyo ia monsumbu' taalu' Aku mongkalibosi sampe toka sidu-sidutu' ka' Akumo ahi' na nompodaagi' atulan tiba ka adilan idunia aiya. Iwi-iwi' aijo' momposanang mae kinyonyoang-Ku. Aku, Tumpu, na nompoto'imo aijo'.”

^25-26 Tumpu notatae, “Tokaje mae na tempo'nyo Kuhukumo na aha mian nu Mesir, Yehuda, Edom, Amon, Moab, tiba mian anu jojoong ipadang tampat anu mateges anu monggunting ubaknyo opokodo'. Aha iwi-iwi' sinunat pokakana susumo mian Israel, panyo maunyomo ahi' aha mau bansa Israel kalakuan nu aha sumomo ahi' to mia-mian anu madi' sinunat, kalana aha madi' ahi' montuluti palajanjian anu ilambangkan nu sunat aijo'.”