YEREMIA 8 - KITAB NU TUMPU ALLA LELE MA'IMAI'

¹ Tempo'nyo aijo' buku nu to tomu-tomundo' ka' to mia-mian anu ko pangkat mokalaja i pamalentah i Yehuda ka' suele buku nu to ima-imam, nabi tiba mian sangga'at anu jojoong i Yerusalem osabatakonmo mae lengkat ikubulan nu aha,

² misa' da oposihukmo ka' po ule'mo okubun panyo opojohokmo aijo' itano' susumo duhehe. Buku nu mian haha aijo' motanatamo nu pense' nu sinaa, bitu'on tiba to manda-mandala' anu nu anggapmo nu aha salaku pilogot, anu nu ka'ima'i nu aha, anu nu tuluti nu aha, anu nu sombah nu aha ka' anu pompoitan nu aha pokinde'.

³ Saba' aha to mia-mian anu daagi' tumuu' na bansa anu saja' balabuat ma'idek aiya anu gina'a-ga'at-Kumo namba iyaya mae lebemo mongka'ima'i silaka ka' madi'mo mongka'ima'i tumuu'. Aku, Tumpu Anu Mahakuasa hondo notataemo.”

Dosa' tiba hukuman

⁴ Tumpu nompalentahmo aku da mompoto'i sumo uuka hi mian anu palesayamo hi Ia, “De mian anu manabu' tantu ia po ule' mobula ka' de mian anu talas ijalan tantu ia po ule' minsusule' mae.

⁵ Panyo kadaka' na belemiu mian anu palesayamo hi beleng-Ku na sabau-baunyo ahi' palabuatan anu ma'idek ka' mohikumo mae Aku? Belemiu nontoongimo hondo-hondo ipilogot nu belemiu ka' madi'mo mae minsusule' hi beleng-Ku.

⁶ Aku nompotombihingmo ima-ima' panyo belemiu madi' motatae mae susumo ahi' anu sahondo-hondonyo. Madi' kosamian anu atina' hi belemiu na mompele-pele'mo ipalabuatannyo ma'i-ma'idek aijo'. Madi' ko anu motatae, ‘Apaa na kasala'anku?’ Belemiu iwi-iwi' montulumo posi jalan nu belemiu susumo ajahan montumbuhimo mokiijo' ipahampatean.

⁷ Tomonsi lalang nu sumbu' ahi' na tempo'nyo ia minsusule'; sapatau, tomonsi' laya-layang tiba murai nu sumbu' ahi' na tempo'nyo molalin tampatnyo. Panyo belemiu mian anu palesayamo hi beleng-Ku na madi' ahi monsumbu' atulan-Ku anu binee'-Kumo hi belemiu.

⁸ Baani hondo na belemiu motatae, tukoo miu belemiu pande ka' monsumbu' atulan-Ku! Soba toa mosia na atulan-Ku binali'anmo nu aha anu toto pande-pande i agama ka' geguan!

⁹ To mia-mian anu toto pande-pande atina' hi belemiu saidi' mae opopo ambangmo. Aha madi'mo moko ala bapikin ka' ohakopmo. Aha madi'mo mongka'oho' montalima pokinde'-Ku; jadi kapandean apaa na anu daagi' hi aha?

¹⁰ Kalana aijo' ale' nu aha Ku bee'mo hi tumpu nu tano' sangga'at, ka' mule' bengkele' nu aha Ku bee'mo hi mian sangga'at. Aha iwi-iwi' tu'anyo tiba anak molio ka untungan tiba jalan anu tageo'. Pakalaus mule' nabi tiba imam suele ahi' mongakali mian.

¹¹ Bela nu mian anu palesayamo hi beleng-Ku nu anggap nu aha ola bela ise-ise'. ‘Ah madi' mule' mongkuka,’ aha notatae, ‘iwi-iwi' ma'ima' ka' madi' ko anu mompoposia'.’ Padahan madi' ahi' sumo aijo'.

¹² O mian anu palesayamo hi beleng-Ku, sabenannyo ahi' belemiu na ambangmo kalana nombaumo iwi-iwi' na palabuatan anu moko ambang aijo'! Panyo belemiu madi'leges ka' madi' monsumbu' ma ambang. Kalana aijo' belemiu silakamo susumo mian sangga'at anu sinilakamo; madi'mo ko sisikonnyo na beleyum de Ku hukumo na belemiu.

¹³ Ko kahanda' hondo na Aku momposihuk mian anu palesayamo hi beleng-Ku, susumo mian momposihukmo isi nu ale'nyo. Panyo mian anu palesayamo hi beleng-Ku sumomo ahi' kau' anggur tiba kau' ara anu madi'mo nimbua', ka' mule' honnyo singkapmo nagayou. Mokonyo aijo' pinobee'-Kumo na mian anu isalipu'an mae tinoka aiya ka nongkuasaimo lipu' nu aha. Aku, Tumpu, notataemo.”

¹⁴ “Kadaka' kita madi'mo noko ala nombau apa-apaa?” na koonyo nu mian anu palesayamo hi Tumpu Allah. “Imbo' kita' mopalaimo mamba ikota-kota' anu ko bentengnyo, bakas da kita silakaje kiijo' mae. Noko putuskanmo nu Tumpu Allah na kita tionyo ahi' silakamo. Binee'an-Nyomo na kita lasung da o'inum kalana kita binaladosa'mo hi Ia.

¹⁵ Ola palasuma na kita montaha'imani paladamean ka' da ma'alin na opakuli'i kalana aiya anu daagi' olanyomo ahi' kasinggian.

¹⁶ Sampobali' aiyamo i uno nu kota' Dan; tihaha' nu ajahan nu aha kinahongoanmo ka' iwi-iwi' na lipu' nabuhukmo. Sampobali' tinokamo mae da mohansunimo lipu'to iwi-iwi' ka' suele kota'to tiba mule' ahi' iwi-iwi' na mian anu jojoong i aiya.”

¹⁷ “Palahatikan!” na koonyo nu Tumpu. “Uuka aiya Ku saimo na ulo mamba atina' hi belemiu da monsa'u belemiu, ulo anu ko bisa'nyo anu madi' opoko ala opuuhi' nu ilimu'.”

I Yeremia sinusa'mo na kinyonyoa na mompotutugakon bansannyo

¹⁸ Kinyonyoangku sumomo sinaya-saya' ka' nalanitmo, kaduka'anku madi'mo opoko pakuli'i.

¹⁹ Hongo ahi' isongko-songko nalipu' kinolongnyomo kihis tiba haang nu bansangku mompokilawa, “Pa' madi'mo daagi' ko Tumpu kiita' i Sion? Iyamo mae na tomundo'nyo uuka aiya?” Tinaamanmo nu Tumpu, tomundo' nu aha, “Kadaka' belemiu tinolodadupumo monsombah to pilo-pilogot anu madi' hondo-hondo ko gunanyo? Kadaka' sinakitanmo nu belemiu na kinyonyoang-Ku nononsombahmo to pilo-pilogot?”

²⁰ Aha mian nu Israel notataemo daka-daka', “Lonu mongalamo bua' nu ale ka' lonu nu posinaa uuka aiya tinomboliumo panyo kita ma'isa ahi' sinalamat.”

²¹ Kinyonyoangku inohintutumo kalana bansangku maboat hondo na sakitnyo; aku sinusa'mo ka' mule' madi'mo tinatap na kinyonyoa.

²² Pa' apaa na nonsaduakon sahingga bansangku sampe uuka aiya ma'isa ahi' na alin? Pa' isongko-songko na Gilead, madi'mo daagi' ko dokter kabai pakuli'?