YEREMIA 7 - KITAB NU TUMPU ALLA LELE MA'IMAI'

I Yeremia nohutuba'mo i Laigan nu Tumpu

^1-3 Tumpu nompalentahmo aku da mamba i Laigan-Nyo ka' tuminjo' isabatan daka' anu nu tului nu mian Yehuda anu toka mae monsombah Tumpu. Ia nompaletahmo aku da mompoto'i potuunon-Nyo aiya hi aha, “Bali'imo na kalakuan tiba jalan nu kantumuu'an nu belemiu sahingga Aku, Tumpu Anu Mahakuasa, Tumpu Allah nu Israel mompobee'mo belemiu da tataapmo jojoong i aiya.

⁴ Boli palesaya hi aha anu saja' mongakali nonotataemo, ‘Kita madi'mo ko anu mompoposia, kalana aiya Laigan nu Tumpu. Totu-totu'u aiya Laigan nu Tumpu!’

⁵ Bali'imo na jalan nu kantumuu'an nu belemiu tiba kalakuan nu belemiu. Obau ahi' na ka adilan hi samian ka' toka mule' hi samian.

⁶ Bolimo daagi' sola' monsuka-sukai mian anu lengkat mae isalipu'an, anak anu madi'mo ko tuumanyo tiba tinanyo ka' mule' to balu-balu. Boli mompatei mian anu madi' kosala'nyo ilipu' aiya. Boli monsombah to pilo-pilogot sangga'at, kalana han aijo' saidi' mae monsilakaimo belemiu.

⁷ De belemiu mombali'imo jalan nu kantumuu'an nu belemiu tiba kalakuan nu belemiu ka' mule' madi'mo mombau iwi-iwi' aijo', Ku pobee'mo na belemiu tataap jojoong ilipu' aiya anu binee'-Kumo salaku tano' pusaka' hi mompolee' nu beleyum.

⁸ Panyo sabenannyo ola ahi' palasuma na belemiu palesaya hi potatae anu baleko'.

⁹ Belemiu montomang, mompatei, masala', timbali sakisi anu baleko', monsombahkon koloban hi Baal ka' mule' monsombah to pilo-pilogot anu madi' osumbu' nu belemiu.

¹⁰ Salatan iwi-iwi' aijo' binaumo nu belemiu, belemiu tokamo mae mangadap hi belengku i aiya iposi Laigan-Ku ka' motatae, ‘Kami madi'mo ko anu mompoposia.’ Lapas mae po ule' mule' ahi' obau nu belemiu na palabuatan anu ma'idek aijo'.

¹¹ Pa' belemiu monsangka Laigan-Ku aiya peta nu anu saja' montololangi? Iwi-iwi' na palabuatan nu belemiu tinoang-Kumo.

¹² Lako'mo mamba i Silo kota' anu naipuan mae pinile'an-Kumo da bau tampat monsombah mae Aku. Soba toa apaa na nu binaung-Kumo kona hi tampat aiya kalana dosa' nu mian anu palesayamo hi beleng-Ku aha Israel.

¹³ Maumo ahi' Ku po uli-ulitmo na motatae hi belemiu, panyo belemiu madi' ahi' mongka'oho' mompotombihing mae. Belemiu mombau dosa' aijo' iwi-iwi' ka' madi' mongka'oho' montaami de Ku lagamo.

¹⁴ Jadi Laigan-Ku ota-otaha'imani nu belemiu ka' tampat anu binee'-Kumo hi mompolee' nu belemiu ka' mule' hi mompolee' nu belemiu ka' hi belemiu aiya saidi' mae Ku baumo susumo Silo naipuan mae.

¹⁵ Belemiu saidi' mae Ku laa'mo da bolimo ko anu aiya i ahop-Ku susumo Aku nolaa'mo to utu-utus nu mompolee' nu belemiu mian nu Israel.”

Mian anu panggaga hondo

¹⁶ Tumpu notatae, “O Yeremia boli mondo'akon mian haha aiya. Boli momoita tulung kabai mondoa'kon aha; boli mae montetengakon hi beleng-Ku kalana Aku madi' mohongo apaa na anu opoita nu belemiu atina'.

¹⁷ Pinosi toamo nu beleyum apaa na anu binaumo nu aha isinin na kota' nu Yehuda ka' mule' isinin na jalan i Yerusalem!

¹⁸ To ana-anak mongato mae kau' anu oposun, to momo'ane momposun apu ka' to bou-boune monggalo anu okompo-kompon bau kukis anu pontalakani pilogot anu osa-osanggohi nu aha Tomundo boune nu Suluga'. Ka' da bau ponsakiti nu aha kinyonyoang-Ku aha nonsombahkonmo anggur hi to pilo-pilogot sangga'at.

¹⁹ Panyo sabenannyo ahi' misa' Aku na nu sakiti nu aha panyo posi butong nu aha ahi' sahingga aha ma ambangmo.

²⁰ Aku, Tumpu Anu Matangkas na kuasanyo, mompotudunmo tambuha'-Ku anu opalias hondo i laigan ponsomban aiya, kona hi aha manusia, ka' mule' kona hi binatang suele ka' hi to kau-kau' ka' isi nu kuhat. Tambuha'-Ku moakmo susumo apu anu madi'mo opoko ala o'ati'i.”

²¹ Tumpu notatae, “O mian anu palesayamo hi beleng-Ku, osumbu' nu belemiu saba' palasombahan anu opotunu nu belemiu i mezbah aijo' tionyo ahi' opotunu sampe mingkot ka' palasombahan sangga'at na timbali ahi' okaan nu belemiu. Panyo Aku, Tumpu notataemo, kaanmo iwi-iwi'!

²² Tempo'nyo Aku nomboamo mompolee' nu belemiu nosabat mae lengkat i Mesir, Aku madi' nombee'i aha atulan mongkona koloban anu opotunu kabai koloban-koloban sangga'at.

²³ Aku ola nompalentahkon hi aha da montuluti Aku da Aku timbalimo Tumpu Allah nu aha, ka' mule' aha timbalimo mian anu palesayamo hi beleng-Ku. Aku nompalentahmo aha da tumuu' montuluti sinin na palentang-Ku da kantumuu'an nu aha timbali ma'ima'.

²⁴ Panyo aha madi' mongka'oho' mohongo ka' mule' madi' mongka'oho' mompalahatikan. Aha ola mule' ahi' montuluti pongka'oho' nu kinyonyoa nu aha anu bangilan hondo ka' ma'idek hondo aijo'. Aha misa' da tinimbalimo na ima' panyo ola mule' ahi'da lebe na idek.

²⁵ Salatanmo pe'e mompolee' nu belemiu nosabat mae lengkat i Mesir sampe sinaa aiya Aku saja'mo nongulus to posa-posaihon-Ku, to nabi-nabi namba hi belemiu.

²⁶ Panyo madi' ko anu mohongo kabai ko anu mompalahatikan. Belemiu ola mule' ahi' nompaka panggaga ka' naidek nolingkuduimo mompolee' nu belemiu.”

²⁷ Lapas aijo' Tumpu notataemo, “Kalana aitu o Yeremia, maumo ahi'beleyum mompoto'i iwi-iwi' aijo' hi aha mian anu palesayamo hi beleng-Ku, aha madi' ahi' mompalahatikan potatae nu beleyum. Maumo ahi' nu laga nu beleyum na aha, madi' ahi' nu taami nu aha.

²⁸ Jadi poto'i hi aha taalu' aha sa'angu' na bansa anu madi' mongka'oho' tulu-tulutan hi beleng-Ku, Aku, Tumpu Allah nu aha. Aha madi' mongka'oho' monginau' hukuman anu ingoa'anmo nu aha. Tulu-tulutan hi beleng-Ku imadi'anmo, pakalaus madi'mo daagi' binisalakon.”

Palabuatan anu ma'idek i Bangka'nyo nu Hinom

²⁹ Tumpu notatae, “O mian anu jojoong i Yerusalem, pongoa'imo susa' kalana ko anumo silaka! Guntingimo na ubak nu beleyum ka' alinmo! Nyanyiakonmo na nyanyian nu montando'i aita' mae ibawo nu to bungku-bungkutnyo, kalana Aku, Tumpu notambuha'mo ka' madi'mo nongala belemiu iwi-iwi'.

³⁰ Aha mian nu Yehuda nombaumo palabuatan anu ma'idek. Pilogot nu aha anu singkap Ku ka'ideki aijo' pinaha po una'mo nu aha i uno nu Laigan-Ku sahingga nohenyuimo.

³¹ Sa'angu' na mezbah anu sinanggohan Tofet pinotinjomo nu aha i Bangka'nyo nu Hinom bau ponsombahkonan to ana-anak nu aha salaku koloban anu opotunu. Padahan madi' pinokaung-Ku na aha mombau han aijo' pakalaus mule' madi' toho' tinonginau' na anu sumo aijo' i uno nu pikilan-Ku.

³² Kalana aijo' tokaje mae na tempo'nyo saba' tampat aijo' madi'mo daagi' osanggohi Tofet kabai Bangka'nyo nu Hinom, panyo timbalimo Bangka'nyo nu Pompateian. Tano' aijo' timbalimo tano' anu bau polamunan kalana madi'mo ko tampat sangga'at.

³³ Bangke' nu aha saidi' mae baumo kaanon nu tomonsi' tiba binatang anu mahangas, madi'mo ko anu mola'i aha.

³⁴ Lipu' aiya saidi' mae timbalimo padang tampat anu kunmo. Lewo'nu mian anu lame' tiba lewo' nu mian anu nombaumo bau-bauon nonika' Ku pobelentimo i kota-kota' Yehuda tiba i to jala-jalan nu Yerusalem.