YEREMIA 52 - KITAB NU TUMPU ALLA LELE MA'IMAI'

Yerusalem pinatundu'mo

¹ I Zedekia umunnyo inguampulu'mo ka' sa'angu' na taun tempo'nyo ia tinimbalimo tomundo' nu Yehuda. Ia nompalentahmo Yerusalem sinampulu' ka' sa'angu' na taun na kinopinnyo. Tinanyo sanggonyo i Hamutal, anak i Yeremia lengkat mae ikota' Libna.

² Susumo i Tomundo' Yoyakim, i Tomundo' Zedekia suele ahi' binaladosa'mo hi Tumpu.

³ Tumpu notambuha'mo hondo hi aha mian anu jojoong i Yerusalem tiba aha mian nu Yehuda sahingga ilaa'-Nyomo na aha ka' madi'mo daagi' nonjagai aha. I Zedekia notomuhukmo hi Nebukadnezar tomundo' nu aha Babel,

⁴ kalana aijo' i Nebukadnezar tiba iwi-iwi' na suludadunyo tinokamo mae ka' nontumbuhimo Yerusalem itanggan sampulu' bitu'on kinosampulu'nyomo kakona itaunmo kino osio'nyo na i Zedekia nompalentah. Aha nombaumo palung isambiha' nu kota', ka' mule' nombaumo mesen da bau pontumbuhian,

⁵ ka' saja'mo nontumbuhi kota' aijo' sampe tinoka itaun kino sampulu'nyomo ka' sa'angu' na Zedekia nompalentah.

⁶ Itanggan kino osio'nyomo bitu'on ko opatnyomo tauno ai-aijo', tempo'nyo balaa' kasusa'an i anu okaan tinahahumo hondo sahingga mian da'isan madi'mo daagi' ko anu okaan,

⁷ pagan mesen nu kota' tinobahakonmo nu sampobali'. Pihi-pihi aijo' maumo ahi' aha mian nu Babel hau-haunyomo nontumbuhi kota' aijo', iwi-iwi' na suludadu nu aha Yehuda nopalaimo namba i Bangka'nyo nu Yordan. Aha nontulu jalan monsahak taman ilaigan nu tomundo' lantas nosabatmo nontulu sabatan daka' anu kotusanannyo tiba ohu' na pagan mesen itampat aijo'.

⁸ Panyo suludadu nu aha Babel nololoi'mo ahi' i Tomundo' Zedekia ka' nohakopmo ia ihata'nyo nu Yerikho. Iwi-iwi' na suludadunyo nopalaimo nompala'imo ia.

⁹ Lapas aijo' i Tomundo' Zedekia binoamo hi Tomundo' Nebukadnezar kiijo' ikota' Ribla idaerah Hamat, lantas binee'anmo hukuman mate.

¹⁰ Ikota'mo aijo' suele na to ana-anaknyo pinateanmo i ahopnyo, ka' suele to mia-mian anu ko pangkatnyo ipamalentahan Yehuda pinateanmo.

¹¹ Lapas aijo' kinubatakonmo na mata i Zedekia lantas pinungumo nu lante besak ka' binoamo i Babel. Ikiijo' mae ia pinosoopmo i uno nu talungku', ka' madi'mo daagi' nosabat sampe ia sinilakamo.

Laigan nu Tumpu ihansunanmo

¹² Itanggan sampulu' bitu'on kino olima'nyomo kakonamo itaun ko sampulu'nyomo ka' osio' na i Nebukadnezar nompalentah tomundo' nu aha Babel, tinokamo i Yerusalem samian sanggonyo i Nebuzaradan. Ia anu lewa' mompokinde'i ka' anu saja' monsangalui i Nebukadnezar.

¹³ I Nebuzaradan nompapumo Laigan nu Tumpu, laigan nu tomundo' tiba laigan iwi-iwi' nu aha mian anu talasanggo i Yerusalem.

¹⁴ Lantas iwi-iwi' na suludadunyo nohobo'akonmo iwi-iwi' na pagan mesen nu kota' aijo'.

¹⁵ Lapas aijo' mian da'isan anu daagi' kiijo' ikota' aijo'mo aha mian anu pande mombau apa-apaa, anu daagi' tinontuha', tiba to mia-mian anu kasiasi, ka' mule' to mia-mian anu nopalaimo naninggalum hi aha mian nu Babel, iwi-iwi' binoamo i Nebukadnezar i Babel.

¹⁶ Panyo sambagian na mian da'isan anu talalo ahi' kasiasi ka' madi' ko halata'nyo na pinojohok ahi' nu jojoong i Yehuda ka' pinalentahnyomo mombau ale' nu anggur tiba ale' sangga'at.

¹⁷ Iwi-iwi' na ohi' tambaga' tiba kareta-kareta i Laigan nu Tumpu ka' mule' kuhon daka-daka' tambaga' biniha'mo nu mian Babel, lantas iwi-iwi' na tambaga anu daagi' ikiijo' binoamo nu aha ilipu' nu aha.

¹⁸ Aha mule' ahi' nomboamo iwi-iwi' na balang aijo'mo: iwi-iwi' na pamutu', sobang bau pongkula ponoha' i uno nu kuhon, tampat bau pongisian abu' nu mezbah, pakakas-pakakas bau pontutungian sulu', iwi-iwi' na mangko' bau ponsamonan baso' nu binatang anu okolot da bau koloban, iwi-iwi' na mangko' anu bau pompapuan kamangian ka' mule' iwi-iwi' na balang tambaga sangga'at anu opake de monsombahkonmo apa-apaa hi Tumpu.

¹⁹ Balang iwi-iwi' anu mosoni' na binau tiba salaka, aijo'mo mangko'-mangko' toto ise-ise' ka' mule' tampat pompo una'an oba nu apu, mangko'-mangko' tampat pongisian baso' nu binatang anu okolotmo bau koloban, tampat bau pongian abu', tengke nu sulu', mangko'-mangko' pompotimpasan kamangian, ka' mule' mangko'-mangko' anu opake mondudu'akon anggur anu osombahkon, iwi-iwi ingalamo i Nebuzaradan.

²⁰ Balang-balang tambaga anu pinoki bau i Tomundo' Salomo da opake iLaigan nu Tumpu, aijo'mo ohua' na ohii', kareta-kareta, kuhon tambaga, tiba sampulu' ka' ohua' na sapi' anu monsu'un kuhon tambaga ai-aijo', iwi-iwi' talalo ahi' maboat, sahingga madi'mo daagi' pinoko ala tinimbang.

^21-22 Ohu-ohua' na ohii' tambaga' ai-aijo' pokakana; toto sa'angu' ko tangkasnyo 8 meten, bootnyo 5,3 meten, ka' kiijo' i unonyo lulu. Ko butolu nu tambaga'nyo 75 milimeten. Aita' ituu'nyo nu ohii' aijo' toto sa'angu' binauan dompongnyo ko tangkasnyo 2,2 meten. Titikup idompongnyo nu ohii' haha aijo' daagi' ko anu inganyam ka' binunga-bungan nu anu susumo dalima, iwi-iwi' suele ahi' tambaga na binau.

²³ Bua' nu dalima anu pinokona i anyaman anu aita' itoto sa'angu' na dompongnyo nu ohii' aijo' konjoo'nyo sa'atu na batuaanyo, panyo ola siompulu' ka' anom na anu kantoan lengkat mae akaong i aluknyo.

Aha mian nu Yehuda binoamo i Babel

²⁴ Ka' mule', i Nebuzaradan nohakopmo i Imam Daka' Seraya, i Sefanya wakinnyo ka' totolu' na mian anu monjagai sabatan nu Laigan nu Tumpu,

²⁵ ka' mule' aha popitu' na mian anu saja' mompokinde'i tomundo' anu daagi' kiijo' ikota', ka' mule' talenga' tiba wakin nu talenga' anu mongulus administrasi nu suludadu, ka' mule' aha anompulu' na mian sangga'at anu toto tangka-tangkas na pangkatnyo.

²⁶ Iwi-iwi' aijo' binoanyomo hi Tomundo' Nebukadnezar ikota' Ribla,

²⁷ idaerah Hamat. Ikiijoo' mae aha sinakisamo lantas pinateanmo. Sumo aijo' na to mia-mian nu Yehuda binoamo lengkat mae ilipu' nu aha ka' binoamo itampat pinompojoongan aha,

^28-30 iwi-iwi'mo 4.600 na mian. I Nebukadnezar nomboamo aha sumo uuka na sola' nomboa: 3.023 na mian kinona itaun ko popitu'nyomo na ia nompalentah, 832 na mian anu lengkat mae i Yerusalem kinona itaun ko sampulu'nyomo ka' ualu' na ia nompalentah, ka' 745 na mian na binoa i Nebuzaradan kinona itaun ko uampulu'nyomo ka totolu' na i Nebukadnezar nompalentah.

³¹ Itanggan uampulu'mo ka' olima bitu'on ko sampulu'nyomo ka ohua' kinona itaunmo ko tolumpulu'nyomo ka' popitu' na i Yoyakhin polo-polo'mo binoa itampat pinompojoongan, i Ewil-Merodakh tinimbalimo tomundo' nu Babel. Lantas itaunmo aijo' na ia nolibosmo hi Yoyakhin ka' nompolapasmo ia madi'mo tinalungku',

³² ka' madi'mo ahi' nompoposia. I Yoyakhin binee'annyomo pangkat anu lebe matangkas molingkudui to tomu-tomundo' sangga'at anu suele binoa i Babel.

^33-34 Ia pinobee'mo nombolosi baju'nyo anu pinusok tempo'nyo tinalungku' ka' sidu-sidutu' ia na timbali ahi' mongkaan ilaigan nu tomundo' ka' sansinaa toka sansinaa obee'i doi da nu pake bau kapaluan nu kantumuu'annyo.