YEREMIA 5 - KITAB NU TUMPU ALLA LELE MA'IMAI'

Dosa' nu Yerusalem

¹ O mian anu jojoong i Yerusalem, tuusakon na jalan-jalan anu atina' ikota' nu belemiu! Lio iyaya mae ka' posi sakisimo. Soba palesa itampat-tampat anu loas na popasannyo atina' ikota' pa' daagi' ko anu hodi' na kinyonyoanyo anu bala usaha tulu-tulutan hi Tumpu Allah. De daagi' na nu ampuni ahi' nu Tumpu na Yerusalem.

² Belemiu natataemo, koonyo nu belemiu nonsombahmo Tumpu pada hal tanga'an nu belemiu na madi' ahi' sumo aijo'.

³ Anu sahondo-hondonyo ahi' nu tuntut nu Tumpu aijo'mo tulu-tulutan. Tumpu nondokemo belemiu panyo madi' ahi' opajuli nu belemiu. Ia nohansunimo belemiu panyo belemiu madi' mongka'oho' opokinde'i. Belemiu panggaga hondo ka' madi' mongka'oho' balatobat mompala'i dosa-dosa' nu belemiu.

⁴ Aku binapikinmo, “Ah aha olamo ahi' mian popololo anu madi' monsumbu' apa-apaa. Aha mombau apa-apa ponga' kalana madi' osumbu' pa' apaa na anu okahanda'i ka' pa' apaa na anu nu tuntut nu Tumpu Allah hi aha.

⁵ Sahanyo aku mamba hi aha to pama-pamalentah ka' mompoto'i hi aha. Tantu nu sumbu' nu aha apaa na nu kahanda'i tiba nu tuntut nu Tumpu Allah hi aha.” Panyo aha iwi-iwi' suele madi' ahi' mongka'oho' nu palentah nu Tumpu; aha madi' mongka'oho' montuluti Ia.

⁶ Mokonyo aijo' aha nu pateimo ahi' nu singa nu alas ka' nu bea-beakmo nu serigala anu lengkat mae ipadang tampat anu mateges. Macan tutul sumolinsapmo molio kaanonnyo koko kota-kota' nu aha, ka' ihehe na anu mosabat mae nu sa'umo. Iwi-iwi' aijo' saidi' mae jadimo kalana aha nanjoo'mo na binaladosa' ka' saja'mo nohiku mae Tumpu Allah.

⁷ Tumpu notatae, “Kadaka' Aku mongampunimo dosa-dosa' nu mian anu palesayamo hi beleng-Ku? Aha nompala'imo mae Aku ka' mule' nonsombahmo anu misa' Tumpu Allah. Aku na nombee'i anu okaan hi aha sampe aha nobosumo, panyo aha nasala'mo ka' toto minsan aha mambamo hi to mia-mian anu saja' masala'.

⁸ Aha sumomo ahi' ajahan lakinyo anu molompo' ka' jukut hondo pambehenyo; toto samian mongka'ima'imo bengkele' nu sangalunyo.

⁹ Apaa madi' pantasmo ahi' na Aku mohukumo bansa anu susumo aijo' ka' mombalosimo apaa na anu binaumo nu aha?

¹⁰ Ku saimo na sampobalinyo da nu ideimo nu aha na ale' nu anggur nu aha, panyo madi' ahi' da mohopu'imo aha. Ku palentahmo na sampobali'nyo aijo' da montutu'i panga' nua anggur nu aha kalana panga'nyo haha aijo' misa' anung-Ku.

¹¹ Mian nu Israel tiba Yehuda totu-totu'u nombusikimo mae Aku. Aku, Tumpu notataemo.”

Tumpu madi'mo nongala Israel

¹² Mian anu palesayamo hi Tumpu nontaloakonmo han anu madi' totu'u hi Tumpu. Aha nontaloakon, “Ah, Ia madi' mule' mombau apa-apaa. Kita madi' mule' nu kona nu balaa' ka' madi' mule' monta'up pahampatean kabai kasusa'an i anu okaan.

¹³ Anggapmo na nabi haha aijo' ola susumo mombun kalana madi' mule' ko potuunon nu Tumpu hi aha.”

¹⁴ Lantas Tumpu Anu Mahakuasa hondo notataemo mae hi belengku, “O Yeremia kalana mian haha aijo' notataemo sumo aijo', saba' aha nu tuda'imo mae nu balaa' anu kokoonyo nu aha madi' mule' jadi. Ku pojadimo na potataengku pokakana susumo apu i uno nu nganga' nu beleyum. Bansa aijo' sumomo kau' anu oposun ka' apu aijo' montoyo'imo aha sampe mingkot.”

¹⁵ O mian nu Israel, Tumpu hau-haunyomo mompotoka mae sa'angu' na bansa lengkat ilipu' anu majo'on da montumbuhimo belemiu. Bansa aijo' polo-polo'mo daagi' salatanmo pe'e naipuan mae, basa' nu aha madi' osumbu' nu belemiu. Aha mahoson hondo

¹⁶ ka' mule' anu topo pana' nu aha to babaani hondo; aha mompatei madi'mo daagi' monginau kalibosan.

¹⁷ Nu ingkotimo nu aha na isi nu ale' tiba anu okaan nu belemiu ka' mompateimo to ana-anak nu belemiu. Potuu'on sapi' tiba domba nu belemiu nu pahangkolotakonmo nu aha ka' mule' ale' nu anggur nu belemiu tiba kau' ara nu belemiu nu galisimo nu aha. Iwi-iwi' na kota' anu ko bentengnyo ota-otaha'imani nu belemiu nuhansunimo nu aha.

¹⁸ Tumpu notatae, “Maumo ahi' sumo aijo' toka itempo' aijo' mian anu palesayamo hi beleng-Ku madi' ahi' Ku hopu'i.

¹⁹ Panyo de nu pokilawa nu aha kadaka' Ku baumo na aijo' iwi-iwi' hi aha, poto'i Yeremia saba' susumo aha nompala'imo Aku ilipu' nu aha ka' nompalesayamo to pilo-pilogot nu bansang sangga'at, sumo aijo'mo na aha timbalimo posaihon nu to mia-mian anu isalipu' anu lengkat mae ilipu' sangga'at.”

Tumpu Allah nompokinde'imo mian anu palesayamo hi Ia

²⁰ Tumpu nompalentahmo mae aku da mompoto'i potuunon-Nyo aiya hi lee' i Yakub anu jojoong i Yehuda,

²¹ “Potombihing mae, o belemiu mian anu ponga' ahi taha-tahahumo! Belemiu ko mata panyo madi' montoa, ko bihing panyo madi' mohongo!

²² Aku na Tumpu; kadaka' belemiu madi'mo nongkabuhuk Aku? Sabenannyo belemiu tionyo ahi' langkakatan mae hi beleng-Ku! Aku na nompotimbali sonibi nu ambai binau potempasan nu ambai anu madi' nu poko ala nu tului sampe toka sidu-sidutu'. Ambai timbali mokokembong ka' bokon timbali mangamu', panyo madi' moko ala moliu-liu potempasan aijo.

²³ Panyo belemiu panggaga hondo ka' madi' mohongo-hongo; belemiu madi'mo tinulu-tulutan ka' nompala'imo Aku.

²⁴ Madi' toho' belemiu tinolotuka mongadati mae Aku, padahan Aku na nombee'i mae ujan maumo ipalatamanyo nu lonu nu ujan kabai ikamingkotannyo mo nu lonu nu ujan. Aku mule' ahi' na nombee'i belemiu lonu nu mongala isi nu ale' sataun toka sataun.

²⁵ Panyo dosa'mo nu belemiu haha atina' na nonsaduakon sahingga apaa na anu ma'ima' madi'mo ilasa nu belemiu.

²⁶ O mian anu palesayamo hi beleng-Ku, atina' hi belemiu daagi ko to mia-mian anu ma'idek na kinyonyoanyo. Susumo mian anu mondoyoni so'o anu pinota'annyo bau pohakop tomonsi'sumo aijo'mo na aha nonta'an so'o bau pohakop manusia.

²⁷ Susumo mian anu saja' mohakop tomonsi' nongisimo kalatannyo nu tomonsi' sumo aijo'mo na aha nongisi laigan nu aha nu bala-balang anu ihumpak kalana lewa' mongakali. Sumo aijo' na aha sahingga binalakuasamo ka' kinayamo.

²⁸ Ka' nolompo'mo ka' sinanangmo na kantumuu'an nu aha. Palabuatan nu aha anu ma'idek madi'mo ko batasnyo. Aha madi'mo kino ka adinan i uno nu palakala mongulus to ana-anak anu madi'mo ko tuumanyo tiba tinanyo, ka' madi' mompototu'uakon hak nu to mia-mian anu saja'mo osuka-sukai na mompalentah.

²⁹ Panyo, Aku, Tumpu, mohukumje aha kalana palabuatan haha aijo' iwi-iwi'; Ku balosimo na palabuatan-palabuatan nu bansa aiya.

³⁰ Apa-apaa na anu okabuhuk hondo jinadimo ilipu' aiya:

³¹ to nabi-nabi binaleko'mo, to ima-imam mombau anu nu palentahkon nu Tumpu ola yayamo pongka'oho' nu kinyonyoa nu aha ka' belemiu mian anu palesayamo hi beleng-Ku nongka'ima'imo han aijo'. Panyo apaa na anu obau nu belemiu saidi' mae de tokamo na sinaanyo anu imihinyomo mae?”