YEREMIA 49 - KITAB NU TUMPU ALLA LELE MA'IMAI'

Hukuman anu obee'mo hi aha Amon

¹ Sumo uuka na koo-Nyo nu Tumpu na aha Amon, “Kadaka' tano' nu aha tulunan nu bansa Gad ingalamo ka' jinojoonganmo nu aha to mia-mian anu monsombah Pilogot Milkom?

² Te madi'mo daagi' ko ahanyo mian nu Israel anu timbali mompo ago daerah aijo? Panyo tokaje mae na tempo'nyo Ku pojadije na mian anu jojoong i Raba, puso nu kota' nu lipu' Amon aijo' mohongomo ais nu pahampatean. Kota' aijo' mohobo'mo ka' kampung toto ise-ise anu idaerahnyo mopapumo ingko-ingkot. Lantas Israel po ule'mo mongala tano'nyo aijo' hi aha anu naipuan mae nongalamo.

³ O, mian nu Hesybon, haangmo kalana kota' Ai ihansunmo! O, to bou-boune kota' nu Raba pohangimo! Pompusokmo hude kalung salaku tanda sinusa'mo. Paha popadeka'anmo mokiijo' mae ka' mo uuka mae kalana biningongmo. Milkom pilogot nu belemiu oboamo itampat pomboan tiba to ima-imam ka' mule' to mia-mian anu kopangkatnyo ipamalentahan!

⁴ O, belemiu anu madi' tulu-tulutan! Kadaka' belemiu nontakabunakonmo bangka'nyo haha atina' nu belemiu anu toto lumba-lumba'? Apaa na sababnyo belemiu nontaha'imanimo kakaya'an nu belemiu? Iya na jadi na belemiu montaloakon, au' aitu madi' ko samian anu baani montumbuhi belemiu?

⁵ Belemiu monta'upmo kasinggian anu Ku potoka mae lengkat iyaya mae na tampat. Belemiu mopalaimo, toto samian bala usahamo momposalamat butongnyo, ka' madi'mo daagi' ko anu po ule' momposihuk belemiu.

⁶ Panyo imihinyo mae kantumuu'an nu aha bansa Amon po ule'mo ahi' Ku podaagi'. Aku, Tumpu, notataemo.”

Hukuman anu obee'mo hi aha Edom

⁷ Sumo uuka na koo-Nyo nu Tumpu Anu Mahakuasa na aha Edom, “Te aha mian nu Edom madi'mo daagi' noko ala pinande na bapikin? Te aha to mia-mian anu lewa' mompokinde'i madi'mo nompokinde'i aha? Pa' iningkotmo na kapandean nu aha!

⁸ O, mian anu jojoong i Dedan, pobalikmo ka' popadeka'mo! Lako'mo mamba paninsuluk. Ku hansunimo na lee' mae i Esau, kalana tempo'nyo tinokamo na Aku mohukumo aha.

⁹ De mian montipu bua' nu anggur saja' ko anu nu potuha' nu aha, ka' de tololang toka mae pihi, ia ola mongala apaa na anu nu ka'ima'i.

¹⁰ Panyo, Aku monsapuimo ingko-ingkot apaa na anu nu lee' mae i Esau ka' mompoto'imo lahasia tampat paninsulukan nu aha; aha madi'mo daagi' moko ala maninsuluk. Aha mian nu Edom tiba to utu-utus nu aha ka' mule' anu mompaha ohani laigan nu aha iwi-iwi' pinateanmo madi'mo daagi' ko samiannyo na tinumuu'.

¹¹ O, Edom! Pojoongmo na to ana-anak nu beleyum anu madi'mo ko tuumanyo tiba tinanyo hi beleng-Ku, Ku putu'je na aha. Sahanyo to balu-balu nu belemiu ko kapalesaya'an mae ahi' hi beleng-Ku.

¹² Mian anu madi' pantas ohukum kinonamo ahi' suele nu hukuman, kadaka' belemiu na madi'? Tantu belemiu tionyo ahi' ohukum!

¹³ Aku basumpa' atas sanggong-Ku saba' kota' Bozra timbalimo ahi' tampat anu okabuhuk hondo anu pinala'ianmo nu mian. Mian saidi' mae mongkokojoimo ia ka' mompakemo sanggonyo lewa' bau pontotobi'akon. Iwi-iwi' na kampung anu toto ise-ise' kiijo' idaerahnyo singkapmo ma'idek sampe toka sidu-sidutu'. Aku, Tumpu, notataemo.”

¹⁴ Aku, i Yeremia motatae, “O, Edom, aku nontalimamo lele lengkat mae hi Tumpu. Ia nompokaumo mian hi to bansa-bansa da mo palentah aha momposihuk suludadu ka' bagalagimo montumbuhi beleyum.

¹⁵ Nu pojadimo nu Tumpu na beleyum da madi' mahoson ka' nu popo ambangmo nu mian.

¹⁶ Buulon nu beleyum ati-atina na nongakalimo beleyum. Madi'mo ko anu mongkabuhuk beleyum susumo sangka'an nu beleyum. Beleyum jinojoongmo i olo-olot nu batu, majo'on aita' mae ibawo nu bungkutnyo. Panyo maumo ahi' nu bau na laigan nu beleyum itampat anu matangkas hondo, sumo kotangkasnyo nu peta nu bonyia', nu tau'akonmo ahi' nu Tumpu lengkat mae atina'. Tumpu na nontaloakonmo iwi-iwi' aijo'.”

¹⁷ Tumpu notatae, “Balaa' anu saidi' mae montokai Edom talalo ahi' daka' sahingga ihehe na mian anu motulu ikiijo' tolokengkengmo ka' mabuhukmo.

¹⁸ Susumo Sodom tiba Gomora ihansunanmo tiba kampung toto ise-ise' idaerahnyo sumo aijo'mo na Edom. Madi'mo daagi' ko samian na jojoong ikiijo'. Aku, Tumpu, notataemo.

¹⁹ Susumo singa nasasubamo mae lengkat i alas anu daka' hondo koko Kaunyo nu Yordan ka' nompanjolongimo padang tampat nu domba lewa' mongotot, sumo aijo'mo na Aku toka mae mompotolokengkeng mian nu Edom sahingga mopalaimo mompala'imo lipu' nu aha. Lantas Aku mompile'imo samian na anu timbali polaya' da mompalentah bansa aijo'. Ihe na timbali bau pompokakanakonan tiba Aku? Ihe na baani mahampalakala tiba Aku? Te daagi' ko polaya' anu moko ala mongewa Aku?

²⁰ Kalana aijo', potombihing mae apaa na anu tinanga'an-Kumo obau hi aha mian nu Edom, ka' apaa na anu kahanda'mo Ku bau hi aha mian anu jojoong ikota' Teman. To ana-anak suele nu aha o alamo ahi' ka' oboa ka' sinin na mian mabuhukmo.

²¹ De maluanyo Edom matundu'mo na kahengge'an anu daka' hondo sahingga songko-songko na dunia kalangkabutmo; tando' nu mian anu jojoong ikiijo' kahongoanmo toka-toka i Ambai Gelaga.

²² Susumo bonyia' monsabut nu boka na polipiknyo, sumo aijo'mo na sampobali' toka mae ka' monsabut Bozra. Toka isinaa aijo' suludadu nu Edom mabuhukmo susumo boune anu kahanda'mo mompohampe anak.”

Hukuman anu obee'mo hi aha Damsyik

²³ Sumo uuka na koo-Nyo nu Tumpu na aha Damsyik. “Mian anu jojoong ikota' Hamat tiba Arpad binata-batamo ka' nangada'mo bau nu buhuk kalana nohongomo lele anu madi' ma'ima'. Kinyonyoa nu aha kinalangkabutmo ka' madi'mo tinenda susumo bokon nu ambai.

²⁴ Mian anu jojoong i Damsyik madi'mo nahoson ka' nopalaimo kalana nabuhukmo.

²⁵ Kota' anu talasanggo ka' saja' lame' uuka aiya iliingmo madi'mo ko anu nonjojoongi.

²⁶ Toka isinaa aijo' to oli-olitaunyo silakamo ijalan-jalan nu kota'nyo, ka' iwi-iwi' na suludadunyo ohopu'imo.

²⁷ Pagan mesen nu kota' Damsyik Ku papumo, ka' iwi-iwi' na laigan i Tomundo' Benhadad Ku toyo'imo. Aku, Tumpu, Anu Mahakuasa hondo notataemo.”

Hukuman anu obee' hi aha tulunan nu bansa Kedar tiba kota' Hazor

²⁸ Sumo uuka na koo-Nyo nu Tumpu na aha tulunan nu bansa Kedar tiba daerah-daerah kakuasa'an nu aha Hazor anu ingalamo i Nebukadnezar tomundo' nu Babel. “O, Nebukadnezar, tumbuhimo na tulunan nu bansa Kedar ka' silakaimo na to mia-mian anu isasu kabete'an!

²⁹ Agoimo na potuu'on domba, unta tiba kemah nu aha haha aijo' tibamo isinyo iwi-iwi', ka' loboo'akon hi aha, ‘Kasilaka'an nontikubimo belemiu!’

³⁰ O, belemiu mian nu Hazor! Aku, Tumpu, mompoto': Palia-lia' lamba popalai, ka' paninsuluk, i Nebukadnezar tomundo' nu Babel kinotanga'anmo mae montumbuhi belemiu. Ia notataemo,

³¹ ‘Donganmo lambani! Imbo' otumbuhintomo na to mia-mian anu mongoa'i aman ka'madi' ko anu mompoposia. Kota' nu aha madi' ko anu mongompo kalana madi' ko tumbannyo anu daka' ka' mule' madi' ko supatnyo.’ ”

³² Tumpu nompoto'i mule' hi Nebukadnezar, “Agoimo na unta nu aha iwi-iwi' aijo' ka' mule' sinin na potuu'on nu aha! To mia-mian anu singkapmo ginunting kodo-kodo' na ubak nu aha Ku bee'mo mamba pa' iyaya mae. Ku potokamo mae na balaa' hi aha lengkat iyaya mae.

³³ Hazor madi'mo ko anu monjojoongi sampe toka sidu-sidutu', ka' baumo tampat paninsulukan nu dedeng nu alas. Madi'mo daagi' ko samiannyo na mian anu jojoong ikiijo' mae. Aku, Tumpu, notataemo.”

Hukuman anu obee' hi aha Elam

³⁴ Madi' pinin salatan i Zedekia tinimbalimo tomundo' nu aha Yehuda, Tumpu Anu Balakuasa hondo notataemo mae hi belengku apaa na saidi' mae jadi hi lipu' Elam.

³⁵ Tumpu notataemo, “Ku pateimo iwi-iwi' na anu pande mompana' anu nompohosonmo hondo Elam.

³⁶ Ku puhakonmo na mombun mamba hi Elam lengkat mae iyaya na tampat, ka' momposungkehetmo miannyo anu jojoong ikiijo' mamba iyaya mae sahingga madi' ko sa'angu' na lipu' na madi' kinalambanan nu mian anu nalai mae lengkat i Elam.

³⁷ Ku pojadimo na aha mian nu Elam da mabuhuk hi sampobali' nu aha anu kahanda'mo mompatei aha. Aku notambuha'mo hondo hi aha ka' mohansunimo aha. Ku pokaumo na suludadu anu mamba mompahampateakon aha sampe aha mingkotmo ahi' iwi-iwi'.

³⁸ To tomu-tomundo' tiba to mia-mian anu ko pangkatnyo aijo' hi aha, Ku hansunimo ka' aijo' ilipu' nu aha saidi' mae Ku potinjomo na kapalentahan-Ku.

³⁹ Panyo saidi' mae imihinyo kantumuu'an nu aha Elam po ule'mo ahi' Ku potinjo. Aku, Tumpu, notataemo.”